“Bakı-2015" dünya mətbuatının gündəmindədir

I Avropa Oyunlarına 36 gün qaldı

Tarixdə ilk dəfə təşkil olunacaq Avropa Oyunları yaxınlaşdıqca, dünyanın diqqət mərkəzi Azərbaycana daha çox yönəlir. Müxtəlif ölkələrdə tamaşaçılar ekran qarşısında əyləşib Azərbaycandan birbaşa yayımlanan qitənin ən mötəbər idman yarışını izləyərək bu turnirə necə hazırlaşdığımızın canlı şahidi olacaqlar.

Artıq planetin bir sıra aparıcı KİV-ləri paytaxtımızda təşkil olunacaq tarixin ilk Avropa Oyunları barədə məqalələr dərc edir, ölkəmizin bu yarışı yüksək səviyyədə təşkil etməsindən bəhs edirlər. Ötən ayın 26-da birinci Avropa Oyunlarının məşəlinin alovlandırılması dünyanın aparıcı kütləvi informasiya vasitələrinin diqqət mərkəzində olub.

Azərbaycanın və dünyanın idman tarixində əlamətdar hadisə ilə bağlı videomaterial “Euronews” kanalında da yayımlanıb. Bakıda birinci Avropa Oyunlarının məşəlinin alovlandırılması ilə bağlı yayımlanan süjetdə aprelin 26-sının ilk Avropa Oyunları həyəcanının başlanğıc günü kimi tarixə düşdüyü vurğulanır. Bildirilir ki, Olimpiya ənənəsinə uyğun olaraq, qədim od məbədi olan Atəşgahdan başlayan estafet maraqlı bədii proqramla müşayiət edilir. Birinci Avropa Oyunlarının məşəli 47 gün ərzində Azərbaycanın hər bir guşəsini gəzib dolaşaraq, Oyunların açılış mərasimində Bakı Olimpiya Stadionuna gətiriləcək.

Süjetdə Prezident İlham Əliyevin ilk Avropa Oyunlarının Təşkilat Komitəsinin sədri, Azərbaycanın birinci xanımı Mehriban Əliyevanın və Avropa Olimpiya Komitəsinin prezidenti Patrik Hikkinin müşayiəti ilə Oyunların məşəlini alovlandırması, dövlət başçısının məşəli “Bakı-2015” Avropa Oyunlarının ilk məşəlçisi, Olimpiya çempionu Rəfiqə Şabanovaya verməsi, beləliklə də birinci Avropa Oyunlarının məşəlinin səyahətinin başlaması nümayiş olunur.

Türkiyənin “TRT Haber” televiziya kanalı da “Bakı-2015” birinci Avropa Oyunlarına hazırlıq işləri ilə bağlı geniş reportaj yayımlayıb. Reportajda ilk Avropa Oyunlarına ev sahibliyi edəcək Bakıda hazırlıq işlərinin yekunlaşdığı bildirilib. Vurğulanıb ki, nəhəng idman obyektlərinin əksəriyyəti artıq istifadəyə verilib və Bakı turistləri, idmançıları qəbul etməyə hazırdır.

Reportajda, həmçinin birinci Avropa Oyunları məşəlinin alovlandırılması mərasiminin əks olunduğu görüntülər nümayiş etdirilib. Süjetdə Prezident İlham Əliyevin məşəlin alovlandırılması mərasimindəki çıxışına da geniş yer verilib, Atəşgah məbədindən start götürən birinci Avropa Oyunlarının məşəl estafetindən bəhs olunub. Dövlət başçısının ilk Avropa Oyunlarının idman və dostluq bayramına çevriləcəyi barədə fikirləri süjetdə xüsusi diqqətə çatdırılıb.

Pakistanın “Centreline” jurnalında və “Diplomatic News Agency” İnformasiya Agentliyində “İlk Avropa Oyunları Bakıda keçiriləcək” sərlövhəli məqalə dərc edilib. İngilis dilində dərc olunan məqalələrdə 2015-ci il iyunun 12-28-də Azərbaycanın paytaxtı Bakıda ilk Avropa Oyunlarının keçiriləcəyi bildirilir.

Diqqətə çatdırılır ki, Oyunlara hazırlıqla bağlı 2013-cü il yanvarın 17-də Azərbaycanın birinci xanımı Mehriban Əliyevanın sədrliyi ilə Təşkilat Komitəsi yaradılıb. Mehriban Əliyevanın mötəbər beynəlxalq tədbirlərin keçirilməsində böyük təcrübəsi olduğunun vurğulandığı yazılarda Azərbaycanın birinci xanımının 2012-ci ildə Bakıda “Eurovision” mahnı müsabiqəsinin hazırlıq işlərinə rəhbərlik edərək bu tədbirin böyük uğurla təşkilini təmin etdiyi də diqqətə çatdırılıb. Qeyd edilib ki, Təşkilat Komitəsinə nazirlər, dövlət məmurları, Olimpiya çempionları daxildir. Hazırlıq işlərinə 2012-ci ildə Londonda keçirilən Yay Olimpiya Oyunlarının təşkilində iştirak edən ekspertlər cəlb olunub.

Yazılarda həmçinin ilk Avropa Oyunlarına hazırlıq işləri,idman obyektləri haqqında məlumat verilir, 50 ölkədən 6 min atletin mübarizə aparacağı qeyd olunub. Vurğulanır ki, Oyunların proqramına salınan idmanın 20 növündən 16-sı Olimpiya, 4-ü isə qeyri-olimpiya növləridir. İdmanın bəzi növləri üzrə Oyunlarda medal qazanan atletlər Rio-de-Janeyroda keçiriləcək Yay Olimpiya Oyunlarına lisenziya qazanacaqlar.

İtaliyanın “İl Faro” xəbər saytında “Bakı-2015”-in Avropanın idman tarixində önəmli hadisə olması ilə bağlı məqalə yerləşdirilib. Məqalədə deyilir: “Bu yarışda Avropanın müxtəlif ölkələrindən 6 minə yaxın atlet bir araya gələcək. Onlar Olimpiya ruhunun sehrinə qapılaraq, bütün güclərini səfərbər edərək “Köhnə qitə”nin ən yaxşısı olmaq uğrunda mübarizə aparacaqlar. Bu yaxınlarda Bakıdakı Atəşgah məbədində ilk Avropa Oyunları məşəlinin alovlandırılması mərasimi keçirilib. Məşəlin alovlanması ilə minlərlə idmansevərin ürəklərinə bir istilik gəldi. Tədbir zamanı Prezident İlham Əliyev məşəli “Bakı-2015” Avropa Oyunlarının ilk məşəlçisi, Olimpiya çempionu Rəfiqə Şabanovaya verdi. Yarışlar start götürənədək bu məşəl Azərbaycanın bütün şəhərlərini dolaşacaq”.

“Bakı-2015” Avropa Oyunlarından bəhs edən silsilə reportajlardan biri də yaxın günlərdə Berlin TV kanalı ilə yayımlanacaq. Bundan əvvəl təqdim olunmuş üç reportajda Bakıda qədimliyin və müasirliyin vəhdətindən, İçərişəhərdən, eləcə də son illər paytaxtımızda tikilmiş müasir obyektlərdən söhbət açılıb. Süjetlərdə Bakının tolerant şəhər olduğu, buradakı bir sıra qədim abidələrin UNESCO tərəfindən qeyri-maddi mədəni irs siyahısına salındığı qeyd edilib.

Birləşmiş Ərəb Əmirliklərində ərəb dilində böyük tirajla dərc olunan nüfuzlu “Əl-İttihad” qəzeti Bakıda keçiriləcək Birinci Avropa Oyunlarının yay turizminin inkişafına təkan verəcəyini yazıb. Azərbaycanın müasir turizm imkanlarından bəhs edən müəllif Nəsrin Dərzi “Sivilizasiyaların mərkəzində füsunkar təbiət” sərlövhəli yazıda may-sentyabr aylarında Azərbaycanın turizm potensialının spesifik xüsusiyyətlərindən bəhs edib. Müəllif bildirib ki, Azərbaycan dövləti ölkənin coğrafi imkanlarını turizmin inkişafı istiqamətində dəyərləndirir və yay mövsümünün turistləri üçün təkcə günəşli çimərliklərdə yox, həm də Qafqaz dağlarının ətəklərində, füsunkar təbiətin qoynunda müalicəvi resurslar, istirahət və gəzinti imkanları təqdim edir.

Göründüyü kimi, məmləkətimiz haqqında materiallar dərc edən xarici KİV öz rəy və arzularında bu ölkəyə üz tutmaq istəyində olduqlarını səmimiyyətlə dilə gətirirlər. Çünki əsrlər boyu multikulturalizmə öz töhfəsini verən, tolerantlığın, dözümlülüyün zirvəsində dayanan Azərbaycan bütün dünya üçün nümunədir.

Elçin CƏFƏROV,

Azərbaycan.-2015.- 7 may.- S.1;11.