Azərbaycan istənilən mötəbər yarışı keçirməyə qadirdir

Dinamik inkişaf edərək regionun lider dövləti statusunu təmin edən Azərbaycan artıq müxtəlif mövzulu - siyasi, iqtisadi, mədəni, humanitar tədbirlərin keçirildiyi məkana çevrilib.

Bütün bunlar ölkəmizin artan gücündən və nüfuzundan xəbər verir. Artıq Azərbaycanın multikulturalizm, humanitar forum, eləcə də mədəniyyətlərarası və sivilizasiyalararası dialoq üzrə mərkəz rolunu oynamasını bütün dünya qəbul edir.

Bunlarla yanaşı, Azərbaycan son illər həm də bir çox nüfuzlu idman yarışlarına da ev sahibliyi edib. Məlum olduğu kimi, beynəlxalq səviyyəli yarışların hər hansı ölkədə baş tutması üçün ciddi rəqabət aparılır, hər bir dövlət ev sahibi olmaq istəyir. Sevindirici haldır ki, Azərbaycanın beynəlxalq idman tədbirlərinin də keçirildiyi ünvana çevrilməsi reallıqda özünü göstərən həqiqətdir. İdman sahəsində gerçəkləşdirilən dövlət siyasəti, Olimpiya ideallarının təbliği, idmanın maddi-texniki bazasının möhkəmləndirilməsi, tikilmiş müasir Olimpiya kompleksləri və digər tədbirlər nəticəsində ölkəmiz mötəbər beynəlxalq idman yarışlarının keçirildiyi məkana, dünyanın idman mərkəzlərindən birinə çevrilib.

Artıq indiyədək onlarla ali, mötəbər idman tədbiri ölkəmizdə təşkil olunub. Ən əsası, Azərbaycan təkcə müəyyən kateqoriyalı beynəlxalq yarışlara deyil, eyni zamanda qitə və dünya çempionatlarına ev sahibliyi edən dövlətdir. Bunu son illər Bakıda bədii gimnastika, boks, bodibildinq, güləş, həndbol, şahmat və idmanın digər növləri üzrə onlarla beynəlxalq turnirlərin yarışlarının keçirilməsi də təsdiq edir. Bu tədbirlərin ən yüksək səviyyədə baş tutması üçün ölkəmizdə təşkilati baxımdan yüksək şərait, imkan var. Bunu dünya idman təşkilatları təsdiqləyir və bu səbəbdən də bu yarışlar reallaşır. Futbol üzrə FİFA U-17 qadınlararası dünya çempionatı və Formula-3 yarışları Azərbaycanda ən müxtəlif idman tədbirlərinin keçirilməsi üçün böyük imkanlara malik olduğunu təsdiq edib. Ən mühüm uğurlarımızdan biri odur ki, 40-dan artıq Olimpiya idman kompleksinin tikilməsi ölkəmizdə beynəlxalq yarışları təkcə Bakıda deyil, regionlarda da təşkil etməyə imkan verir. Bu da Azərbaycanın idman sahəsindəki uğurlarının, dövlətin bu sahəyə qayğısının nəticəsidir.

Hər il müxtəlif beynəlxalq yarışların Azərbaycanda keçirilməsi ölkəmizin idman şöhrətini daha da ucaldıb. Bu mənada 2012-ci ilin dekabrında Avropa Olimpiya Komitəsinin I Avropa Oyunlarının Bakıda keçirilməsi barədə qərarı təsadüfi deyildi. Məlum olduğu kimi, 2012-ci il Azərbaycanda “İdman ili” elan olunmuşdu. Bu baxımdan Avropa Olimpiya Komitəsinin tarixdə ilk dəfə keçiriləcək bu möhtəşəm idman tədbiri ilə bağlı qərarı ölkəmizdə “İdman ili”ndə həyata keçirilən fəaliyyətin və qazanılan uğurların məntiqi nəticəsi idi.

Prezident İlham Əliyev 2013-cü il 17 yanvar tarixində “I Avropa Oyunlarının 2015-ci ildə Bakı şəhərində keçirilməsi üzrə Təşkilat Komitəsinin yaradılması haqqında” sərəncam imzalayıb. Sərəncama əsasən, Heydər Əliyev Fondunun prezidenti, Azərbaycan Respublikası Milli Olimpiya Komitəsi İcraiyyə Komitəsinin üzvü, UNESCO-nun xoşməramlı səfiri Mehriban Əliyevanın sədrliyi ilə 2015-ci ildə Bakı şəhərində I Avropa Oyunlarının keçirilməsi üzrə Təşkilat Komitəsi yaradıldı.

Məlum olduğu kimi, Yay Olimpiya Oyunlarına ev sahibliyi edəcək dövlətin hazırlıq üçün ən azından 7-8 il vaxtı olur. Azərbaycanın isə Avropa Oyunlarına hazırlıq üçün cəmi iki il yarım vaxtı vardı. Bundan başqa, Yay Olimpiya Oyunlarının keçirilməsində artıq böyük təcrübə mövcuddur və Beynəlxalq Olimpiya Komitəsi demək olar ki, hər bir sahə üzrə öz göstərişlərini verir. Mövcud təlimatlarda hər bir istiqamət üzrə müəyyən edilmiş metodiki qaydalar var. I Avropa Oyunları üçün isə heç bir təlimat və təcrübə yox idi. Belə olan halda bütün məsuliyyət, təşkilati məsələlərin yoluna qoyulması Azərbaycanın üzərinə düşürdu. Cəmi iki il ərzində Bakıda yeni idman infrastrukturunun yaradılması və oyunların təşkili üzrə digər işlərin sürətlə və vaxtında həyata keçirilməsi göstərir ki, Mehriban xanım Əliyevanın rəhbərlik etdiyi Təşkilat Komitəsi üzərinə düşən işləri layiqincə yerinə yetirib. Hazırlıq işləri demək olar ki, başa çatıb. Bakı şəhərində yaradılan və əsaslı şəkildə təmir edilən bütün idman obyektlərimiz ən yüksək standartlara cavab verir. Mühüm məsələlərdən biri odur ki, Avropa Oyunlarının keçirilməsi ilə bağlı standartları Azərbaycan müəyyən edib. Ona görə növbəti belə yarışlarda Azərbaycanın nümunəsi əsas götürüləcək.

Aprelin 26-da Azərbaycanın və dünyanın idman tarixində əlamətdar hadisə baş verdi. Həmin gün Bakıda Birinci Avropa Oyunlarının məşəli alovlandırıldı və bununla da möhtəşəm idman hadisəsi özünün yeni mərhələsinə qədəm qoydu. Artıq I Avropa Oyunlarının məşəlinin səyahəti başlayıb. Estafetə 1000 nəfərdən çox məşəlçi cəlb olunub və hər regionda “Alov festivalı”nın keçirilməsi nəzərdə tutulub. Məşəl Bakıya gətirilənədək təxminən 5500 kilometr məsafə qət edəcək. Məşəlin gövdəsi “Bakı-2015” brendində yer alan nar ağacını xatırladır, alovu qoruyan mis başlıq da nar formasındadır. Onun 50 çəyirdəyi Oyunlarda iştirak edən ölkələrin sayını təmsil edir. Məşəlin alovlandırılması mərasimində Prezident İlham Əliyev deyib: “2012-ci ilin sonunda Avropa Olimpiya Komitəsi Birinci Avropa Oyunlarının Azərbaycanda keçirilməsi haqqında qərar qəbul etmişdir. Bu, tarixi bir qərar idi. Çünki başqa qitə oyunlarından fərqli olaraq, Avropada Oyunlar heç vaxt keçirilməmişdir. Bu, Azərbaycana Avropa Olimpiya ailəsi tərəfindən göstərilmiş böyük etimad idi. Bu qərara görə Avropa Olimpiya Komitəsinə və onun prezidenti cənab Patrik Hikkiyə Azərbaycan xalqı adından minnətdarlığımı bildirmək istəyirəm. Bu qərar bizi çox sevindirdi, Azərbaycan xalqını sevindirdi. Bu, bizim üçün həm böyük şərəf, həm də böyük məsuliyyətdir. Vaxtımız məhdud idi. Ona görə biz dərhal işə başladıq, Təşkilat Komitəsi yaradıldı. Bu müddət ərzində Təşkilat Komitəsi çox fəal və böyük uğurla işlədi. Bu gün artıq Azərbaycan və Bakı şəhəri bu oyunların keçirilməsi üçün tam hazırdır”.

Bu gün Azərbaycanın dünyanın idman mərkəzinə çevrilməsi ölkəmizdə həyata keçirilən idman siyasətinin bəhrəsidir. Bu siyasətin gətirdiyi uğurları biz peşəkar idmançılar daha yaxından hiss edirik. Mənim idmanla ilk dəfə məşğul olduğum illər sovet dövrünə təsadüf edir. O zaman Azərbaycan idmançılarının beynəlxalq yarışlarda iştirak etmək imkanları çox məhdud idi, idman infrastrukturu da indiki kimi deyildi. Dövlət müstəqilliyimizin ilk illərində isə Azərbaycanda idman demək olar ki, tənəzzülə uğramışdı. Yalnız ulu öndər Heydər Əliyevin ölkəmizə rəhbərliyindən və İlham Əliyevin Milli Olimpiya Komitəsinə prezident seçilməsindən sonra Azərbaycan idmanı tamamilə yeni mərhələyə qədəm qoydu. Ötən 18 ildə idman infrastrukturu tamamilə yenidən qurulub, Olimpiya hərəkatı inkişaf edib, idmançılarımız hər il yüzlərlə qızıl və gümüş medal qazanıblar. Fəxr edirəm ki, mən də bu dövrdə pauerliftinq üzrə dəfələrlə dünya və Avropa çempionu olmaqla, dünya rekorduna imza atmaqla Azərbaycan bayrağını zirvələrə ucaltmışam.

İdmançı həyatımda ən yadda qalan hadisələr nailiyyətlərimin xalqımızın ulu öndəri Heydər Əliyev və Prezident İlham Əliyev tərəfindən yüksək qiymətləndirilməsidir. 2002-ci ildə ümummilli lider Heydər Əliyev təhsil aldığım Azərbaycan Dövlət İqtisad Universitetinə gəlmişdi. Həmin vaxt mənə dahi şəxsiyyətlə şəxsən görüşmək müyəssər oldu. Heydər Əliyev qazandığım nailiyyətlərlə yaxından maraqlandı, müdrik tövsiyələrini verdi və yeni qələbələr arzuladı. Bu, mənim həyatımın ən xoş və həyəcanlı anı idi. Bu görüşdən sonra bir idmançı kimi üzərimdə daha böyük məsuliyyətin dayandığını hiss etdim. Ulu öndərin layiqli davamçısı, Prezident İlham Əliyev tərəfindən 2009-cu ildə mən “Azərbaycan Respublikası Prezidentinin Fəxri Diplomu” ilə təltif olunmuşam. 2011-ci ildə isə dövlət başçısı idmandakı nailiyyətlərimə görə mənə mənzil hədiyyə edib. Bütün bunlar həyatımın qürurverici anlarıdır.

İdman sahəsində gerçəkləşdirilən dövlət siyasəti, Olimpiya ideyalarının təbliği, idmanın maddi-texniki bazasının möhkəmləndirilməsi, tikilmiş müasir Olimpiya kompleksləri və digər tədbirlər nəticəsində ölkəmiz mötəbər beynəlxalq idman yarışlarının keçirildiyi məkan kimi şöhrət qazanıb. Dünya idmanının tarixində ilk dəfə keçirilən Avropa Oyunlarına ev sahibliyi etmək missiyası isə Azərbaycan üçün daha böyük önəm daşıyır. Hazırkı mərhələdə qarşıda duran ən vacib vəzifə yarışların yüksək səviyyədə keçirilməsidir. 20 idman növü üzrə 6000-dən çox idmançı yarışacağı Oyunların bütün infrastrukturu hazırdır.

I Avropa Oyunları Azərbaycanın gələcəkdə də mötəbər və daha böyük idman yarışlarına ev sahibliyi etmək imkanlarını yüksəldəcək. Ən əsası, Azərbaycanın Yay Olimpiya Oyunlarına təşkilatçılıq etmək şansları yüksələcək. Bu mənada I Avropa Oyunlarının Azərbaycana həvalə olunması gələcəkdə Yay Olimpiya Oyunlarının da Bakıda təşkili üçün gözəl zəmin yaradır. Azərbaycan bütün dünyaya sübut edəcək ki, istənilən mötəbər yarışı keçirməyə qadirdir.

Vüqar NAMAZOV,

Azərbaycan Respublikası Prezidentinin fəxri diplomçusu, ağırlıqqaldırmanın

pauerliftinq növü üzrə dünya və Avropa çempionu, dünya rekordçusu

Azərbaycan.-2015.- 7 may.- S. 11.