Alovun hərarəti Muğama yayıldı

Məşəl Saatlı və Sabirabadda alovlandı

Təbiətin çölü-çəməni zümrüd libasa bürüdüyü yazın bu oğlan çağında doğma vətənimiz Azərbaycanda bayram əhval-ruhiyyəsi yaşanır. Birinci Avropa Oyunlarının alov səyahəti mərhələsi uğurla davam etməkdədir. Məşəlin keçdiyi kəndlərdə, şəhərlərdə gerçək bir bayram ovqatı yaşanır.

Məşəllə gələn sevinc payının növbəti ünvanı Saatlı rayonudur. Saatlıda bu tədbirə neçə vaxtdı hazırlıq görülür. Hər tərəfdə abadlıq, səliqə-sahman göz oxşayır. Adamlar xeyli əvvəldən məşəl gələcək yolboyu düzülüblər. Gözlərindən sevinc yağan, çöhrələrindən təbəssüm oxunan mərasim iştirakçılarının nəzərləri məşəlin gələcəyi səmtə yönəlib.

Yaranmış ani fürsətdən istifadə edərək mərasim iştirakçılarının biri ilə həmsöhbət olmaq, onun təəssüratını öyrənmək istəyirik. Özünü təqdim edir: əməkdar müəllim Lətif Şimşəkov:

- Doğrusu, çox həyəcanlıyam. Müəllim yoldaşlarımın da, dərs dediyim şagirdlərin də əksəriyyəti buradadır. Bir baxın, hamı sevinc içərisindədir. Bu gün mən də iftixar hissi keçirirəm. Bir ziyalı, bir vətəndaş olaraq ölkəmizin müstəqillik illərində qazandığı misilsiz nailiyyətlərlə necə qürur duymayasan. Xalqımızın ümummilli lideri Heydər Əliyevin müəyyən etdiyi siyasi kurs, bu siyasəti uğurla davam etdirən Prezident İlham Əliyevin müdrikliyi bizi qələbədən-qələbəyə aparır, dövlətin qayğı və diqqəti həyatımızı daha firavan edir. Bu gün Azərbaycanın Birinci Avropa Oyunlarına ev sahibliyi etməsi qazanılan dinamik sosial-iqtisadi inkişafın məntiqi nəticəsidir. Məncə buna sıradan bir idman yarışı kimi baxmaq sadəlövhlük olardı. Bu, Avropaya, bütün dünyaya Azərbaycanın sülh, dostluq, qardaşlıq, əməkdaşlıq çağırışıdır. Mətbuatdan bilirəm ki, Birinci Avropa Oyunlarında əlliyə yaxın ölkənin idmançıları təmsil olunacaqdır. Özümüzü, Azərbaycan həqiqətlərini Avropaya təqdim etmək üçün bu, son dərəcə gözəl bir şansdır. Əminəm ki, bu imkandan maksimum səmərəli istifadə olunacaqdır. Hər kəsə uğurlar arzulayıram.

Budur, gözlənilən an gəlib çatır. “Atəşgah”dan od almış məşəl etibarlı əllərlə ölkəni dolanaraq Saatlı rayonuna gətirilir. Alqış sədaları altında Saatlı nümayəndələri məşəli qəbul edirlər. Məşəlin qəbulu və estafet qaydasında nəzərdə tutulan məntəqəyə çatdırılması üçün rayonun idman həyatında fəal iştirak edən 10 nəfər əvvəlcədən nəzərdə tutulmuş və onlar həyata keçirəcəkləri missiya barədə yetərincə məlumatlandırılmışlar.

Saatlı nümayəndəsi Əbülfəz Əliyev məşəli qəbul edib başı üzərinə qaldırır. Geniş və yaraşıqlı Heydər Əliyev prospekti boyunca hərəkətə başlayır. Yolun hər iki tərəfində əllərində üçrəngli milli bayraqlar, al-əlvan gül-çiçəklər tutan Saatlı sakinləri vətənin, dövlətin, Prezidentin şərəfinə şüarlar səsləndirirlər.

Rayonun tanınmış idmançıları sırasından seçilmiş məşəlçilər Mirqiyas Qiyasov, Elşən Əzizov, Pərviz Məmmədov, Mehriban Ağayeva və başqaları müəyyən edilmiş ardıcıllıqla estafeti bir-birilərinə ötürərək nəzərdə tutulan məsafəni qət edirlər. Nəhayət, nəzərdə tutulan məkana yetişilir. Rayon mərkəzində ulu öndər Heydər Əliyevin adını daşıyan meydanda qoyulmuş piyalə formasındakı alov kasası gətirilən məşəllə yandırılır. Alov piyaləsi alışır, meydanı alqış sədaları bürüyür. Xoş ovqat, yüksək əhval-ruhiyyə könüllərə hakim kəsilir.

Mərasim iştirakçısı, rayonun fəallarından olan Əzizağa Quliyev fərəhini bizimlə bölüşür:

- Ölkəmizdə fərəhli günlər yaşanır, təbii ki, bu günün sevincini mən də yaşayıram. Azərbaycan xalqının başı zaman-zaman çox müsibətlər çəkib. Rus imperiyası ötən əsrin əvvəlində qazanılan dövlət müstəqilliyini 23 aydan artıq yaşamağa qoymadı. 37-ci illərin repressiyasında xalq qeyrətli oğullarını itirdi. Böyük Vətən müharibəsində nə qədər qurbanlar verdik. Artıq 24 ildir ki, müstəqil dövlətin vətəndaşı olmağımızla qürur duyuruq. Buna da hər vasitə ilə mane olurlar. Dünyanın aparıcı dövlətlərinin dəstəklədiyi Ermənistan torpaqlarımızın 20 faizini işğal edib. Bir milyon soydaşımız qaçqın və köçkün vəziyyətində yaşamağa məhkum olunub. Yolumuzda yaradılan kifayət qədər ciddi maneələrə, böyük problemlərə baxmayaraq Azərbaycan bütün dünyanı heyran qoyan bir sürətlə inkişaf edir. Qarşımıza çıxarılan əngəllər dövlət başçısının müdrik siyasəti ilə dəf olunur. Bu gün Avropanın, elə dünyanın da gözü Azərbaycandadır. Çox gənc olan bir dövlətin belə möhtəşəm tədbirə necə ev sahibliyi edəcəyi bəzi qüvvələri çox maraqlandırır. Amma bir ağsaqqal kimi deyirəm. Heç kim narahat olmasın. Biz çox qonaqpərvər xalqıq. Qonağı qarşılamağı da, yola salmağı da yaxşı bacarırıq.

Növbəti müsahibimiz Saatlı Rayon Mərkəzi Xəstəxanasının baş həkimi Ələkbər Əkbərov keçirdiyi qürur hissindən söz açır:

- Şahidi və iştirakçısı olduğum bu təntənə ürəyimi qürurla doldurur. Birinci Avropa Oyunlarına çox qısa bir zamanda hazırlıq görülmüşdür. Yarışların keçiriləcəyi idman arenalarının yüksək səviyyədə hazırlanması ilə yanaşı, sevimli paytaxtımız Bakı da çox gözəlləşib. Gözəlləşən, yeniləşən təkcə Bakı deyil. Ölkəmizin yaxın-uzaq bölgələri də yeni görkəm alıb. Bir bizim Saatlıya nəzər salın. Yeni salınan parklar, xiyabanlar, müxtəlif təyinatlı sosial obyektlər, abad prospekt və küçələr, geniş və rahat yollar rayon mərkəzinə yaraşıq verir. Əsaslı təmir edilib müasir avadanlıqlarla təmin olunmuş rayon mərkəzi xəstəxanasında rayon əhalisinə nümunəvi səhiyyə xidməti göstərilir. Demək istəyirəm ki, dövlət xalqın firavanlığı üçün lazım olan hər şeyi edir. İştirakçısı olduğum bu təntənədən doğan qürur isə tamam fərqlidir. Ölkəmizin tarixində ilk dəfədir ki, belə mötəbər idman yarışına ev sahibliyi edirik. Bu, tarixi hadisədir. Dünya Azərbaycanı yaxından tanıyacaqdır. Minlərlə avropalı Azərbaycan həqiqətlərini öz gözləri ilə görüb dəyərləndirəcəkdir. Bu tarixi fürsəti öz müdrik siyasəti ilə reallaşdıran respublika Prezidenti İlham Əliyevə və Birinci Avropa Oyunlarına hazırlıq üzrə Təşkilat Komitəsinin sədri Mehriban xanım Əliyevaya minnətdarıq. Bu səmimi minnətdarlığı Saatlıda hər kəsin dilindən eşitmək olar.

Beləcə daha bir məkanda, bərəkətli torpağı, əməksevər, qədirbilən və eyni zamanda qonaqpərvərliyi ilə seçilən adamlarıyla tanınan Saatlı rayonunda da Birinci Avropa Oyunlarının alovu şölələnir. Heç şübhəsiz, vətənini, xalqını, elini, obasını sonsuz məhəbbətlə sevən, dövlətinə, rəhbərinə, sədaqəti olan könüllərə bu alovdan yeni hərarət payı düşəcək, hər ürəkdə bir məşəl alovlanacaqdır.

Azərbaycan.-2015.- 7 may.- S. 12.