Mil düzündə alov büsatı

Məşəl Beyləqan və Xocavənddə alovlandı

Aprel ayının 26-da Azərbaycanın dövlət başçısı, Olimpiya Komitəsinin prezidenti

İlham Əliyevin paytaxt Bakıda əsrlərdən bəri şölələnən qədim “Atəşgah” məbədində yandırdığı Birinci Avropa Oyunlarının məşəli ölkəni oba-oba dolaşmaqdadır.

Ellərimiz hər yerdə odu toy-bayramla, çal-çağırla qarşılayır. Qədim Naxçıvanı dolaşan, Talış dağlarını aşan, zümrüd libaslı Muğanda səfərdə olan I Avropa Oyunlarının məşəli bərəkətli Mil düzünə təşrif buyurdu. Yeni ünvan Beyləqandır.

Beyləqan Azərbaycanın qədim yaşayış məskənlərindəndir. Torpağı münbit, adamları əməksevər olan bu rayonda əhalinin əsas məşğuliyyəti əkinçilik və heyvandarlıqdır. Dövlətin qayğısı sayəsində respublikanın digər bölgələri kimi Beyləqan da sürətlə inkişaf etmiş, rayon mərkəzi, kəndlər görkəmini dəyişib daha da gözəlləşmiş, əhalinin həyat şəraiti müqayisəedilməz dərəcədə yaxşılaşmışdır.

Mayın 9-da beyləqanlılar Birinci Avropa Oyunlarının məşəlinin qarşılanma mərasiminə yüksək əhval-ruhiyyə ilə toplaşmışlar. Sanki el-oba əziz bir el bayramını qeyd edir. Beyləqan şəhərinin qərb tərəfdən girişində böyük qələbəlikdir. Məşəlin Füzuli rayonu tərəfdən gələcəyi gözlənilir. Hər kəs bayram ovqatındadır. Fərəhli gözlər, təbəssümlü çöhrələr arasında istər-istəməz xoş duyğular, pozitiv anlar yaşayırsan. Hələ məşəlin gələcəyi ana xeyli vaxt var. Zamanın verdiyi imkandan istifadə edib mərasim iştirakçılarının təəssüratlarını öyrənmək istəyirik.

İlk müsahibimiz məşəlçi, SSRİ idman ustası, respublikanın əməkdar məşqçisi Əli Sarıyevdir.

- Həyatımda mötəbər idman yarışlarında çox iştirak etmişəm. Sevincli anlarım da az olmayıb. Amma heç bir zaman indiki qədər həyəcan keçirməmişəm. Mən idmançıyam. Dünyada idmana necə böyük əhəmiyyət verildiyinin canlı şahidiyəm. Bu gün azərbaycanlı olaraq qürur hissi keçirirəm ki, ilk dəfə həyata vəsiqə alan Birinci Avropa Oyunlarına Azərbaycan ev sahibliyi edəcək. Bu, tarixi bir uğurdur. Mən deyərdim ki, Azərbaycan Prezidenti İlham Əliyevin yenilməz iradəsi, müdrik siyasəti ilə bu mötəbər idman yarışının bizim ölkəmizdə reallaşması dövlət başçısının Azərbaycana olan sonsuz məhəbbətindən, onun böyük vətənpərvərliyindən qaynaqlanır. Əlbəttə, bu yarışların ölkəmizdə keçirilməsində əsas məqsəd Azərbaycanı dünyaya tanıtmaqdır. Bu, alqışa layiqdir. Bu gün mən bu hissləri keçirərək qürur duyuram. İndi həyəcanla məşəli gözləyirəm. Tarixdə ilk dəfə keçirilən Birinci Avropa Oyunlarının məşəlinin doğma Beyləqana gətirilməsi, onun daşınmasının dostlarımla bərabər mənə də etibar edilməsi həyatımın ən unudulmaz, ən fərəhli anı olacaq.

Beyləqan gerçək bir bayram sevinci yaşayır. İstehsal etdiyi bol kənd təsərrüfatı məhsulları ilə ölkənin ərzaq təhlükəsizliyinə sanballı töhfələr verən bu bölgə həm də cəsur idmançılar diyarıdır. 2014-cü ilin 8-9 noyabrında İtaliyanın Milan şəhərində keçirilən hərtərəfli döyüş növü üzrə dünya çempionatında Azərbaycanı təmsil edən Yusif Sadıqov 55 kiloqram çəki dərəcəsində bütün rəqiblərinə qalib gələrək dünya çempionu olmuşdur. Keçən ilin sentyabrında Bakıda keçirilən sərbəst güləş üzrə respublika turnirində Beyləqanın yetirməsi Nurlan Ağazadə birinci yeri tutmuşdur. 2014-cü il fevral ayında Bakı şəhərində keçirilən cüdo idman növü üzrə Azərbaycan birinciliyində Beyləqan təmsilçisi Leyla Quluzadə ikinci yerə sahib çıxmışdır. Keçən il olimpiya çempionu H.Qureviçin xatirəsinə həsr olunmuş gənclər arasında XX Beynəlxalq güləş turnirində beyləqanlı Nicat Abdullayev üçüncülük qazanmışdır. Haqqında söhbət açdığımız nailiyyətlər Beyləqanın son bir ildə idman həyatında qazanılan uğurların bir hissəsidir.

Uzaqdan məşəli gətirən karvanın görünməsi izdihamı canlandırır. Məşəl yaxınlaşdıqca sanki adamların həyəcanı da artır. Nəhayət, bu da gözlənilən an... Respublikanın əməkdar məşqçisi, idman ustası Əli Sarıyev məşəli qəbul edib başı üzərinə qaldırır, müəyyən edilmiş marşrut üzrə hərəkətə başlayır. Beləcə, Birinci Avropa Oyunlarının məşəli Mil düzünə qədəm qoyur. Rayonun idman həyatında özünəməxsus xidmətləri olan məşəlçilər Elxan Gəraylı, İlkanə Qəhrəmanlı, Türkanə Mehdiyeva, Gülşən Cahidli, Günel Bəndəliyeva, İlham Quliyev, Sahib Nəsibov, Bəxtiyar İsrafilli estafeti bir-birinə ötürərək alovu mənzil başına çatdırırlar. Məşəlçi Nofəl Hüseynov isə alqış sədaları altında Heydər Əliyev parkındakı Gənclər Mərkəzinin qarşısında qurulmuş səhnəyə qalxır. Əlində gətirdiyi məşəllə alov piyaləsini alışdırır.

Növbəti müsahibimiz isə Beyləqan Rayon Gənclər və İdman İdarəsinin rəisi Sənan Quliyevdir. O, sevincini bizimlə bölüşür:

- Bu gün bütün ölkəmizdə olduğu kimi, Beyləqanda da bayram əhval-ruhiyyəsi yaşanır. Birinci Avropa Oyunlarının Azərbaycanda keçirilməsi ölkəmizin hər bir vətəndaşına qürur verir. Həmişə arzulamışıq ki, doğma Azərbaycanın adı dünya dövlətləri sırasında hörmət və ehtiramla çəkilsin. Artıq bu arzu gerçəkləşir. Biz gənclər respublika Prezidenti İlham Əliyevə minnətdarıq ki, Azərbaycanı dünyaya tanıtdırmaq yolunda böyük qətiyyət, yenilməz iradə nümayiş etdirir, dünyanı heyran qoyan uğurlara imza atır.

Bizi sevindirən, həyəcanlandıran bir məqam da odur kİ, Birinci Avropa Oyunlarında Azərbaycanı təmsil edəcək idmançılar arasında Beyləqanın yetirməsi də var. Rayonun Yeni Mil qəsəbəsində doğulub boya-başa çatan Aytən Səmədli karate üzrə dünya çempionudur. Aytən Birinci Avropa Oyunlarına ciddi hazırlaşıb. İnanırıq ki, həmyerlilərini yenə də sevindirəcəkdir. Aytənlə bərabər, bu mötəbər yarışlara qatılacaq bütün Azərbaycan idmançılarına qələbə arzulayıram.

Beyləqanda Birinci Avropa Oyunlarının məşəlinin yaratdığı coşqu davam edir. Bu əlamətdar hadisədən, məşəlin Mil düzünə gətirilməsindən qürur duyan mərasim iştirakçıları bir-birini təbrik edir, gözaydınlığı verirlər. Beyləqanda od alan məşəl isə yarışlar başa çatanadək şölələnəcəkdir.

Azərbaycan.-2015.- 13 may.- S. 8.