Zərdabi yurdunda idman növrağı

Məşəl Zərdab və Tərtərdə alovlandı

Zərdablıların da çoxdan həyəcan və sevinclə gözlədikləri gün gəlib çatdı. I Avropa Oyunlarının məşəli Ağdam rayonundan sonra Zərdabi yurdunda alovlanmalıdır. Bunun üçün Zərdabda hərtərəfli hazırlıq işləri görülüb. Yolların, küçələrin səliqə-sahmanından, təmizliyindən tutmuş hər şeyə xüsusi diqqətlə yanaşılıb. Son vaxtlar yaşıllıq zolaqları xeyli artmış Zərdab şəhəri bayraqlarla, plakat və şüarlarla bəzədilib.

Böyükdən-kiçiyə hamı bayram ovqatındadır. Şübhəsiz, belə yüksək səviyyədə hazırlığa son illər rayonda görülən abadlıq, tikinti-quruculuq işlərinin də təsiri böyükdür. Dövlətin yüksək qayğısı sayəsində Zərdab çox dəyişib, çox yeniliklərə nail olub. Müxtəlif istehsal sahələri yaradılıb, yeni iş yerləri açılıb, insanların həyat tərzi, gün-güzəranı yaxşılaşıb.

Zərdab rayonunun mərkəzinə çatmamış yolun sağında “32 hektar" adlanan ərazidə yeni qəsəbə salınıb. Şəhərə bitişik olan bu qəsəbənin əsası 2010-cu ildə qoyulub. Həmin ilin yazında Kür çayının daşması nəticəsində çayqırağı ərazini tamamilə su basmış, sakinlərin evləri qəzalı vəziyyətə düşmüşdü. Dövlətin, Prezident İlham Əliyevin yüksək qayğısı sayəsində bu gözəl qəsəbə salındı və zərərçəkən insanlar bu qəsəbəyə köçürüldü. Hər cür infrastruktura malik bu müasir qəsəbədə 132 şagirdlik yeni məktəb binası da tikilib istifadəyə verilib. Qəsəbə sakinləri yaradılan şəraitə və qayğıya görə dövlət başçısı İlham Əliyevə minnətdarlıqlarını bildirirlər. Bu qəsəbədən danışmaqda məqsədimiz həm də odur ki, Zərdabi yurduna daxil olan I Avropa Oyunlarının məşəlini “32 hektar" ərazisinin sakinlərinin alqışları müşayiət edəcək.

Zərdabın idman həyatı da zəngindir. Təkcə bir faktı xatırladaq ki, 30 yanvar - 1 fevral 2015-ci il tarixdə İsmayıllı rayonunda şəhidlərimizin xatirəsinə həsr olunmuş karatenin VKC növü üzrə uşaqlar, yeniyetmələr, gənclər və böyüklər arasında keçirilən Azərbaycan çempionatında Zərdab idmançıları 5 qızıl, 5 gümüş və 4 bürünc medal qazanıblar.

Bu gün məşəli qarşılamağa gələnlər isə, şübhəsiz ki, yalnız idmançılar və idman sahəsində çalışanlar deyil. İstər rayon mərkəzindən, istərsə də rayonun ayrı-ayrı kəndlərindən bu gözəl bayrama qoşulanlar arasında hər yaşda insana rast gəlmək mümkündür. Zərdablılar bu günü əsl el bayramına çeviriblər. 92 yaşlı müharibə veteranı Muradəli Heydərovu da mərasim iştirakçıları arasında görəndə çox sevinirik. Üç “Şöhrət" ordenli Muradəli kişi məşhur 416-cı Taqanroq diviziyasının tərkibində faşistlərə qarşı vuruşub. Özünün dediyi kimi, alman faşizmini diz çökdürmək üçün sonuncu güllə atanlardan biri olub. Neçə ildir Prezident təqaüdü alır.

Bugünkü bayram sevincini Muradəli Heydərov belə bölüşür: - 92 yaşım olsa da, özümü bu cavanların sırasında hiss edirəm. Düşünürəm ki, bu tarixi hadisədən, bu gözəl bayramdan mən niyə kənarda qalım. Sevinən insanların arasında olmaq ömrü uzadır. Mən çox yaşamaq, erməni işğalçılarının cavabını vermək və alman faşizmi üzərində Qələbənin 80 illiyini də görmək istəyirəm. Möhtərəm Prezident İlham Əliyev bizə ki belə qayğı göstərir, əminəm ki, o günü də görəcəyik. Bu Avropa Oyunlarının Bakıda keçirilməsi də Prezident İlham Əliyevin hünəridir, onun gördüyü işlərin, ölkəmizi dünyada layiqincə tanıtmasının nəticəsidir. Bu qədər inkişaf etməsək, güclü olmasaq, kim idi bizim qapımızı döyən? Acından ölən Ermənistanda belə tədbirlər keçirərlər? Heç vaxt! Bu gün Zərdabda Avropa Oyunlarının məşəlini qarşılamağa çıxmışam. On il, iyirmi il, əlli il əvvəl buna inanmaq olardımı? Bu gözəl bayramı bizə bəxş etdiyinə görə möhtərəm Prezident İlham Əliyevə bir ağsaqqal, veteran kimi bütün zərdablılar adından dərin minnətdarlığımı bildirirəm.

Nəhayət, alqış sədaları altında I Avropa Oyunlarının məşəlini Zərdabi yurduna gətirən karvan görünür. Həyəcan və qürur dolu anlar başlanır. Bayraq meydanında rayonun gənc fəallarından olan Bəxtiyar Nurəliyev məşəli təhvil alır. Sonra estafetə uyğun olaraq daha bir gənc fəal - Murad Həsənov, taekvondo üzrə ölkə yığmasının üzvü Elnur Babayev, gənclər və idman idarəsinin əməkdaşı Ehtiram Osmanov, karatenin VKC növü üzrə Avropa və dünya çempionu Nərmin Camalzadə və digər məşəlçilər I Avropa Oyunlarının məşəlini 3,53 km məsafə boyunca başları üzərinə qaldırırlar. Bayraq meydanından sonra məşəl H.B.Zərdabinin ev-muzeyinə “qonaq" olur, İkinci Dünya müharibəsi veteranlarının abidəsi önündə “sükuta dalır", Kür çayında gəmi ilə gəzintiyə “çıxır", Şəhidlər xiyabanından, Dədə Qorqud meydanından, Heydər Əliyev prospektindən keçərək Heydər Əliyev Mərkəzinə gətirilir. Burada isə karatenin VKC növü üzrə dünya ikincisi Nurəddin Əliyarlı Oyunların sonunadək saxlanılmaq üçün yandırılan çırağı təhvil alır.

Mərasimi böyük sevgi və məhəbbətlə izləyən zərdablıların sevinci yerə-göyə sığmır. Təəssüratını soruşduğumuz insanlar bu möhtəşəm günü ömürləri boyu unutmayacaqlarını, bu əvəzsiz duyğuları onlara bəxş etdiklərinə görə dövlət başçısı İlham Əliyevə minnətdarlıqlarını bildirirlər.

Fürsətdən istifadə edib Nərmin Camalzadənin fikirlərini öyrənirik: - Bu gözəl gündə məşəli daşımaq da, elə mərasim iştirakçısı olmaq da çox qürurvericidir. İlk Avropa Oyunlarının məşəli Zərdabda alovlanır. İlk Avropa Oyunlarına Azərbaycan ev sahibliyi edir. Bu bir daha onu göstərir ki, bizim ölkəmiz sülh ölkəsidir, bütün Avropaya, bütün dünyaya məhəbbətlə qucaq açmaq iqtidarındadır. Həmişə böyük idman yarışlarının keçirildiyi ölkələrə qibtə, həsəd hissi ilə baxmışıq. Ancaq bu il o möhtəşəm duyğuları yaşamaq bizə də qismət oldu. Bütün zərdablıları, bütün xalqımızı bu gözəl idman bayramı münasibətilə təbrik edirəm. İnanıram ki, Oyunlarda iştirak edən idmançılarımız öz qələbələri ilə hər birimizi sevindirəcəklər.

Elnur Babayevin də ürəyi doludur: - Zərdabın tarixində bənzərsiz bir gün yaşanır. Vaxtilə ucqar bir kənd rayonu olan Zərdab indi inkişafı, müasirliyi ilə göz oxşayır. Ölkəmizi dolanıb gəzən məşəl bu gün biz zərdablılara da sevinc, qürur dolu anlar bəxş edir. İnanırıq ki, bu bayram ovqatı işgüzarlığımızı, qurub-yaratmaq əzmimizi daha da artıracaq. Yeniyetmə və gənclərin idmana olan marağı daha da artacaq. Daha məsuliyyətli və daha vətənpərvər olacağıq, axı bütün dünyanın gözü bizdədir.

Bir azdan zərdablıların məşəl bayramı sevincinə çal-çağır sədaları da qarışır.

Telman NƏZƏRLİ,

Azərbaycan.-2015.- 13 may.- S. 11.