Sumqayıtda kitab bayramı

Sumqayıtda ulu öndər Heydər Əliyevin möhtəşəm abidəsinin önündə qələbəlik yaşanırdı. Burada ümummilli liderin anadan olmasının 92-ci ildönümü ilə əlaqədar ənənəvi kitab bayramı keçirilirdi.

Abidənin ətrafına düzülən masalarda respublikanın aparıcı nəşriyyatlarının son bir ildə işıq üzü görən kitabları sərgilənmişdi. Ümummilli liderin həyat və yaradıcılığına həsr olunan nəşrlər, tariximizi özündə əks etdirən monoqrafiyalar, uşaq ədəbiyyatı nümunələri buraya gələn hər kəsin maraqla qarşıladıqları kitablar idi.

Mərasimə xüsusi rövnəq verən, onu daha da yaddaqalan edən ulu öndərin abidəsi önündə düzülən güllərin fantaziyası idi. İnsan əlləri ilə yaradılan gül dünyası hamını heyran edirdi.

Şəhər icra hakimiyyətinin başçısı Eldar Əzizov və nümayəndə heyəti sərgilənmiş kitablarla yaxından tanış oldular. Qonaqlara məlumat verildi ki, yeni nəşrlər bütün sahələri özündə əks etdirir. Azərbaycanın elə bir sahəsi yoxdur ki, həmin kitablarda özünə həyat qazanmasın. Qəbul edilən qərarların uğurlu nəticələri, yüksələn iqdisadiyyatımız, tariximiz, şair və yazıçılarımızın dəyərli əsərləri tədbirdə oxuculara təqdim edilirdi.

Sərgilənən kitablar içərisində ümummilli lider Heydər Əliyevin həyat və yaradıcılığını özündə ehtiva edən əsərlər xüsusilə fərqlənirdi. Dövlətçilik ənənələrimiz, müasir Azərbaycanın memarı ulu öndərin respublikaya rəhbərlik dövrünün kitab dünyası sumqayıtlıların maraqla qarşıladığı əsərlər idi. Ümummilli lider Heydər Əliyevin siyasətini uğurla davam etdirən Azərbaycan Prezidenti İlham Əliyevin quruculuq missiyasını, möhkəm təmələ əsaslanan daxili və xarici siyasətini əks etdirən kitablar da böyük maraqla qarşılandı.

Elə buradaca Sumqayıtda fəaliyyət göstərən teatr kollektivlərinin ifasında Azərbaycanın tarixi qəhrəmanlarının səhnələşdirilmiş obrazları şənliyə “hədiyyə” edildi. “Əli və Nino” əsərindən göstərilən səhnəcik alqışlarla qarşılandı. Sumqayıt incəsənət ustalarının ifasında bəstəkarların əsərləri səsləndirildi, şeirlər oxundu. Tədbirdə xüsusi vurğulandı ki, nümayiş etdirilən kitabların çoxu Heydər Əliyev Fondunun yardımı və dəstəyi ilə nəşr olunmuşdur.

Nəşriyyat rəhbərləri, kitab evlərinin nümayəndələri ilə görüşən şəhər icra hakimiyyətinin başçısı E.Əzizov onları bayram münasibətilə təbrik etdi.

Tədbir bayram konserti ilə davam etdirildi.

Akif ƏLİYEV,

Azərbaycan.-2015.- 14 may.- S. 12.