“Bakı-2015” Azərbaycan idmançıları üçün növbəti qələbə meydanı olacaq

I Avropa Oyunlarına 28 gün qaldı

Özünün uzunmüddətli inkişaf strategiyasının istiqamətlərini müəyyən edən Azərbaycan bu gün dünya miqyasında iqtisadi artım sürətinə görə islahatçı ölkə kimi tanınır. Prezident İlham Əliyevin yeni dövrün tələblərinə uyğun həyata keçirdiyi düşünülmüş siyasət nəticəsində Azərbaycan son 11 il ərzində dünyada iqtisadi artım templərinə görə ən sürətlə inkişaf edən ölkədir.

Davos Dünya İqtisadi Forumunun hesablamalarına görə, 2014-cü ildə Azərbaycan iqtisadiyyatı dünyada rəqabət qabiliyyətliliyinə görə 38-ci yerə layiq görülüb. Bu isə həqiqətən, çox böyük nailiyyətdir.

Bu inkişafda idman sahəsinin də xüsusi yeri var. İdmanın inkişaf etdirilməsi istiqamətində görülən genişmiqyaslı işlər sayəsində ölkəmiz Avropanın idman mərkəzlərindən birinə çevrilib. 2012-ci il dekabrın 8-də Romada Avropa Olimpiya Komitəsinin 41-ci Baş Assambleyasında I Avropa Oyunlarının Azərbaycanda keçirilməsi barədə qərarın qəbul edilməsi buna əyani sübutdur. Bu qərarın qəbul edilməsi respublikamızda çoxsaylı idman yarışlarının, Avropa və dünya çempionatlarının yüksək səviyyədə keçirilməsinə, idmançılarımızın beynəlxalq yarışlarda əldə etdikləri nailiyyətlərə, ümumilikdə Azərbaycanda idman sahəsində görülmüş işlərə beynəlxalq və Avropa Olimpiya Komitəsi tərəfindən verilən yüksək qiymətdir. I Avropa Oyunlarının Bakıda keçirilməsi ölkəmiz üçün, ümumiyyətlə, bütün Avropa Olimpiya hərəkatı üçün tarixi hadisədir. Regionun lider dövlətinə çevrilən Azərbaycanın sürətli inkişafı, dünya birliyində tutduğu mövqe, mövcud ictimai-siyasi sabitlik beynəlxalq ictimaiyyətdə əminlik yaradıb ki, ölkəmiz bu mötəbər tədbirə uğurla ev sahibliyi edə biləcək.

Digər tərəfdən Avropa Oyunları Azərbaycanın həm güclü dövlət kimi özünü təsdiq etməsi, həm də idmançılarımızın öz imkanlarını nümayiş etdirmək üçün şansdır. Çünki ölkəmizdə idmana göstərilən dövlət qayğısı və beynəlxalq arenalarda idmançılarımızın qazandıqları uğurlar deməyə əsas verir ki, Avropa Oyunlarında Azərbaycanın həm də idman ölkəsi olduğunu idmançılarımızın qazandıqları medallar təsdiqləyəcək. Azərbaycan diğər infrastrukturlarının inkişafı ilə bərabər, idmanı ilə də dünyaya səs salacaq. Olimpiya Oyunlarında idmançılarımızın qazandıqları uğurlar da göstərir ki, Azərbaycan dövlətinin idmana qayğısı hədər getmir. Müstəqillik dövründə Azərbaycan idmançılarının Olimpiya Oyunlarında qazandıqları nəticələrin artan dinamikası da bunu sübut edir. Prezident İlham Əliyevin qeyd etdiyi kimi, Olimpiya Oyunlarında göstərilən nəticə yalnız dövlətin idman həyatının deyil, onun iqtisadi potensialının, ictimai, sosial-mədəni həyatının göstəricisidir. Olimpiya Oyunlarında qazanılan yüksək nəticələr beynəlxalq miqyasda ölkənin imicini qaldırmaqla yanaşı, onun imkanlarını nümayiş etdirir.

Müstəqil dövlət kimi, Azərbaycan Olimpiya Oyunlarına ilk dəfə 1996-cı ildə qatıldı. Həmin Olimpiadada sərbəst güləşçimiz Namiq Abdullayev ölkəmizə ilk Olimpiya medalını bəxş etdi. 2000-ci ildə isə Sidney Yay Olimpiya Oyunlarında Azərbaycan idmançıları 2 qızıl, 1 bürünc medal qazanıb, 199 ölkə arasında 34-cü yerdə qərar tutdular. Olimpiya yığma komandamızın bu möhtəşəm yarışlarda Avropa ölkələri arasında 23-cü yeri tutması idmanımızın böyük qələbəsi idi.

2004-cü ildə Afinada təşkil olunan Yay Olimpiya Oyunlarında millimiz 1 qızıl, 4 bürünc medal qazanaraq 202 dövlət arasında 37-ci yerə layiq görüldü.

2008-ci ildə Pekində keçirilən Yay Olimpiya Oyunlarında idmançılarımız yeni rekord müəyyənləşdirdilər - 7 medal: 1 qızıl, 2 gümüş və 4 bürünc medalla Vətənə döndülər.

2012-ci ildə Azərbaycanda “İdman ili” elan edildi. Bu da Azərbaycan dövlətinin idmanın inkişafına xüsusi diqqət yetirdiyini bir daha təsdiqlədi və eyni zamanda, idmançılarımızın London Yay Olimpiya Oyunlarına daha məsuliyyətli hazırlaşmaları üçün bir stimul oldu. London Yay Olimpiya Oyunlarında idmançılarımız 2 qızıl, 2 gümüş və 6 bürünc medal qazandılar. Ölkələrin cədvəlində Azərbaycan London Yay Olimpiya Oyunlarında 30-cu, medalların sayına görə 24-cü, Avropa ölkələri arasında 15-ci, müsəlman ölkələri arasında

3-cü yeri tutdu. Bu, tarixi nailiyyətdir. Bu, Prezident İlham Əliyevin rəhbərliyi ilə Azərbaycanda həyata keçirilən sosial-iqtisadi inkişafın, o cümlədən idman və Olimpiya hərəkatı sahəsində görülmüş işlərin bariz nümunəsi, ölkəmizin uğurlu inkişafının göstəricisidir.

Olimpiadadan sonrakı illərdə də idmançılarımız uğurları davam etdirmişlər. Ümumiyyətlə, son on ildə Azərbaycanda 300-ə yaxın beynəlxalq səviyyəli idman tədbiri yüksək səviyyədə keçirilmişdir. İdmançılarımız 2013-cü ildə 82 təlm-məşq toplanışında, 148 beynəlxlq yarışda iştirak edərək 248 medal əldə edə bilmişlər. 2014-cü ildə isə bu göstəricilər aşağıdakı kimi olmuşdur: 88 təlim-məşq toplanışı, 165 beynəlxalq yarış, 250 medal.

Son 3 ay ərzində isə respublikamızda 23 ölkə yarışı, 8 beynəlxalq yarış təşkil edilmiş, yığma komandaların 129 üzvü 24 beynəlxalq yarışa və 18 təlim-məşq toplanışına ezam edilmişlər. Yarışlarda Azərbaycan idmançıları 16 qızıl, 13 gümüş, 29 bürünc medal qazanaraq I Avropa Oyunlarına hansı səviyyədə hazır olduqlarını əyani şəkildə göstərmişlər.

Əlbəttə ki, idman sahəsindəki qələbələr, nailiyyətlər uzunmüddətli dövr üçün hazırlanan proqramların nəticəsində əldə olunub. Prezident İlham Əliyevin qeyd etdiyi kimi, idmanın inkişafı dövlət siyasətidir və bu inkişafı müəyyən edən bütün amillər Azərbaycanda var. Azərbaycan, sözün əsl mənasında, idman dövlətidir.

Birinci Avropa Oyunlarının Azərbaycanda keçirilməsi isə Azərbaycan dövlətinin və xalqının böyük qələbəsidir. Avropa Oyunlarından 2 il sonra 2017-ci ildə Azərbaycanda IV İslam Həmrəyliyi Oyunları keçiriləcək. Odur ki, qarşıda bizi böyük sınaqlar - beynəlxalq turnirlər, Avropa, dünya çempionatları, 2016-cı ildə Rio-de-Janeyro Yay Olimpiya Oyunları gözləyir.

Rəşad BAXŞƏLİYEV,

Azərbaycan.-2015.- 14 may.- S. 7;9.