Azərbaycanı dəyişən məhəbbət

Və ya Olimpiya ideallarının təntənəsi

İdmanın tarixi çox qədimdir. Hələ iki min beş yüz il əvvəl dünyada olimpiya oyunları keçirilirdi. Olimp yunan allahlarının məskəni olan dağ idi. Oradakı oyunlar sadəlövh bir məqsəd güdürdü: qədim allahların gücünə, sağlamlığına, döyüş ruhuna təqlid kimi düzənlənirdi. Zaman keçdikcə həmin yunan allahları yavaş-yavaş dəbdən düşdülər, amma idman oyunları ənənəsi əbədi olaraq yaşadı. Çünki bütün dövrlərdə idman oyunları sağlam və dözümlü əsgər hazırlamaq üçün də ən etibarlı vasitə idi: əsgərlər məşqlərdə döyüşü təqlid edib onun sirlərini öyrənirdilər və beləliklə, idmanla məşğuliyyət bütün cəmiyyətlərdə insanların yaşayış tərzində qaldı və öz yerini möhkəmlətdi.

Bunun bir səbəbi də, yəqin ki, hər bir fiziki məşqdə oyun elementinin olmasıdır. “Olimpiya oyunları”, “Avropa Oyunları” ifadələrində “oyun” sözü olduqca yerindədir. Bəzən qulaq sözlərə öyrəşəndə onların mənasına fikir verən olmur. Amma şübhəsiz ki, idman iki min il əvvəl olduğu kimi, bu gün də oyundur, bu gün də təqliddir. Keçmişdə yaşamış ən sağlam, ən qoçaq döyüşçülərimizə, ümumiyyətlə, iradəli insanlara təqliddir.

Mən müəlliməm, ədəbiyyatçıyam. İdmanla çox da əlaqəm olmayıb. Yaxın günlərdə ölkəmizdə “Bakı-2015” Avropa Oyunlarının keçiriləcəyindən qürur duyuram. Onu da bilirəm ki, ölkəmizdə bu beynəlxalq tədbirə iki ildən artıqdır ki, hazırlıq gedir, misilsiz bir həcmdə, bəli, misilsiz bir həcmdə quruculuq və tikinti işləri görülüb. Bu işlərin miqyasını hər dəfə düşünəndə fərəhlənirəm: cəmiyyətimiz dünyaya olduğundan da yaxşı görünmək istəyir. Bu, idealdır, cəmiyyətimizin yetkinlik mərtəbəsidir, özünü dəyişmək səyidir! Bir müəllim kimi bilirəm ki, adi şagirdin də özünü dəyişmək, daha yaxşı olmaq cəhdi yetkinlik və tərəqqi göstəricisidir. Hər bir insanda belə düşüncənin yaranması artıq yeniləşmə işarəsidir. Fəqət bir cəmiyyət olduğundan yaxşı olmaq istəyirsə, bunun üçün konkret proqramlar və layihələr həyata keçirirsə, bu, ən azı sağlam tərəqqi yolunda olan və gələcəyini düşünən bir cəmiyyətdir. Bu, yetkinlikdir. Təsəvvür etmirəm ki, torpağını, xalqını sevən bir adam bütün bunlara sevinməsin.

Amma mətbuata baxanda xaricdəkilər bir yana, öz bədxahlarımızın Oyunlara dodaq büzdüklərini görürük. Bəzi insanlarımız, “hüquq” müdafiəçiləri bu qrant “paylayan” dövlətlərin əlində oyuncağa, alətə çevrilib. Təəssüf ki, bu alət Azərbaycan dövlətçiliyinin ən sağlam və faydalı, gələcəkli işlərinə, bizim qurub-yaradan əlimizə, iradəmizə qarşı yönəlib. Xaricilərin niyyəti adidir, bütün müsəlman ölkələrində yeridilən xətdir. Bütün vasitələrlə rəsmi Bakını xaricdən gələn göstərişlərlə işləməyə vadar etmək! Amma anlamırlar ki, bu gün Azərbaycanı xaricdən idarə etmək mümkün deyil!

Prezident İlham Əliyevin qətiyyətli və ardıcıl siyasəti onların arzularını dəfələrlə ürəklərində qoyub.

2012-ci ilin dekabrında I Avropa Oyunlarının Azərbaycanda keçirilməsi barədə qərar qəbul olunan kimi düşmənlər qeyzləndi, dostlar isə sevindi. Pis niyyətli adamlar öz daxili naqisliklərini ortaya qoydular. Amma Azərbaycanı sevənlər bunu bayram kimi qarşıladı, ölkəmizin tarixi bir uğuru kimi dəyərləndirdilər və öhdələrinə düşən işlərə girişdilər. Artıq iki il əvvəl, 2013-cü il iyunun 12-də “Bakı-2015”in rəsmi internet saytı açıldı və tədbirə qədər qalan 700 gün ərzində xarici informasiya kanallarına birinci əldən xəbər verməyə başladı. İnternet səhifəsi hazırlıq işlərinin gedişi ilə əlaqədar dövri olaraq yeniləşir, insanlara ilk Avropa Oyunlarının proqramı, yarışların keçiriləcəyi meydançalar və onların miqyası, tədbirdə yer alacaq idman növləri və yerləri haqqında məlumat almağa şərait yaradır. Saytda həmçinin Bakını və Azərbaycanı tanıtmaq baxımından keyfiyyətli informasiya yerləşdirilir, ölkənin coğrafiyası, tarixi, iqtisadiyyatı, idmanı, mədəniyyəti və paytaxtımızın tarixi, sosial həyatı, nəqliyyatı, quruluşu haqqında gərəkli məlumatlar təqdim olunur.

Avropa Oyunlarının keçirilməsi və hazırlıq işlərinin gedişi ilə bağlı Londonda, Parisdə, Moskvada, Budapeştdə, Brüsseldə, Romada, Davosda, İstanbulda, Berlində, Afinada böyük təqdimat mərasimləri keçirildi. Bunların təşkilinə nə qədər enerji, əzmkarlıq lazım olduğunu izah etməyə ehtiyac yoxdur. Uzaq ölkələrdə bu tədbirlərin təşkilinin və uğurla keçirilməsinin əsas qurucusu ölkəmizin birinci xanımı, Heydər Əliyev Fondunun prezidenti Mehriban Əliyevadır. Biz hamımız ondan, onun işgüzarlığından, vətənpərvərliyindən nümunə götürməliyik. Ən çox da məqsədyönlü işləmək baxımından, ardıcıl olmaq cəhətdən. Əlbəttə, cəmiyyət, Avropa idman hərəkatının başçıları bunları görür və qiymətləndirirlər. Bizdə də ölkənin birinci xanımı Mehriban Əliyevanı dəstəkləyənlər bir hərəkat təşkil edir. Məhz onların Mehriban xanıma səmimi sevgisi və sədaqəti sayəsində bu tədbir ölkəmizdə el bayramına çevrilib, əlamətdar hadisəni xatırladan nişanələr bu gün hər yerdə, hər addımda görünür.

Belə bir həmrəylik qarşısında bədxahların mövqeyi nə qədər cılızdır. Amma xırdalıqlar da hərdən ürək bulandıra bilir. Bu qaraniyyətlilər nə istəyir axı bizim cəmiyyətimizdən? Bəzən onların məntiqini anlamağa çalışıram. Amma heç nə anlaya bilmirəm.

Mənə belə gəlir ki, bizim bədxahlarda birinci növbədə çatışmayan milli qürur hissidir. Yurdumuzu, həyatımızı gözəlləşdirən və sağlamlaşdıran faktlara necə sevinməmək olar? Onlar öz övladlarını, onların sabah harada və necə yaşayacağını düşünmürlər?.. Yəqin ki, düşünmürlər və siyasətlə məşğul olmaq iddiasında olan bu adamların milli iftixar boşluğu məni heyrətə gətirir. Bəs bu adamlar ölkəmiz üçün nə arzulayırlar? Ancaq bütün yaxşı işlərə qara demək üçünmü? Övlad anasına belə yanaşarmı? Axı böyük Səməd Vurğun vətənlə onun balasını ana və övladla müqayisə etmişdi. “Sən bir uşaq, mən bir ana, odur ki bağlıyam sana!” Bu andı pozanlara nə ad vermək olar? Azərbaycan dilində belə söz yoxdur, mən belə söz bilmirəm.

Bu tarixi tədbirin Azərbaycanda keçirilməsi haqqında 2012-ci ilin dekabrında qərar qəbul ediləndə Avropanın Olimpiya Assambleyasının üzvü olan 41 ölkə bizə etimad göstərdi. Həm də Roma şəhərində bu etimad qərarı gizli səsvermə nəticəsi kimi çıxarılmışdı. İndi 41 xarici dövlətin etimadı hara, dünya erməniliyinə xidmət edənlərin boykot çağırışları hara!

Bu, adi bir etimad deyildi, cənab İlham Əliyevin Azərbaycanın Milli Olimpiya Komitəsinin prezidenti seçildiyi 1997-ci ildən bəri onun özünün və bir qrup həmkarının neçə illik zəhmətinin, idmana qayğısının, bu sahayə ayrılan investisiyaların nəticəsi idi. Həmçinin ölkəmizdə bir-birinin ardınca nüfuzlu beynəlxalq yarışları uğurla təşkil etməklə indi biz dünyanın idman mərkəzlərindən birinə çevrilmişık. “İdman tədbiri” sözdə iki kəlmədir, amma əməldə bu, sürətli tikinti işləridir, quruculuqdur, yeni idman sarayları və meydançalarıdır, onların fasiləsiz abadlaşdırılmasıdır. Mən keçirilən tədbirlərin adlarını saymıram, çünki çox böyük bir siyahı olardı. Amma Azərbaycanı, Prezidentimizi və onun işlərini sevənlər bunu yaxşı bilir, çünki hamısı gözümüzün qabağında olub. Hər qonaq gələndə həyəcanlanmışıq. Amma həm də səfərbər olmuşuq, xalqın başını uca etmişik.

Bu sahədə əldə edilən dəyərli təcrübəni yüksək qiymətləndirən Prezident İlham Əliyev özü də deyib ki, “beynəlxalq yarışların keçirilməsi üçün bizim kifayət qədər geniş təcrübəmiz var. Son illər ərzində Azərbaycanda çoxsaylı dünya və Avropa çempionatları keçirilmişdir. Azərbaycanın sürətli iqtisadi inkişafı, əlbəttə ki, bu qərarın qəbulunda öz rolunu oynamışdır. Sevindirici cəhət odur ki, Azərbaycan əhalisi bu qərarı böyük sevinclə və qürur hissi ilə qarşılamışdır”.

Bu tədbirin Azərbaycanda keçirilməsini şərtləndirən amillərə ən yaxşı səciyyəni Prezident İlham Əliyev özü verib və göstərib ki, “bu Oyunların Bakıda keçirilməsi haqqında qəbul edilmiş qərar bir neçə amillə bağlıdır. İlk növbədə bunu idmançılarımızın uğurlu çıxışı mümkün etmişdir. Son Yay Olimpiya Oyunlarında Azərbaycan komandası 30-cu yerə layiq görülmüşdür. Avropa ölkələri arasında isə biz 15-ci yerə yüksəlmişik. Eyni zamanda, Azərbaycanda gözəl gənc nəsil yetişir. Gənc idmançılarımız da bizi sevindirir. Keçən il Yeniyetmələrin Olimpiya Oyunlarında Azərbaycan komandası 10-cu yerə yüksələ bilmişdi. Bu, tarixi nailiyyətdir”.

Bununla bərabər, son illər ərzində Azərbaycanda müasir idman infrastrukturu yaradılmışdır. Respublikanın bölgələrində 40-dan çox olimpiya idman mərkəzi tikilib gənclərin istifadəsinə verilib. Bakı şəhərində yaradılan və əsaslı şəkildə təmir edilən bütün idman obyektləri ən yüksək standartlara uyğun qurulub. Ölkə Prezidenti inamla bildirib ki, bundan yüksək standart mümkün deyil.

Doğrusu, ilk Avropa Oyunlarını Bakıda təşkil etmək əvvəlki tədbirlərdən qat-qat mürəkkəb və çətin bir işdir. İlk növbədə tikib qurmalı, görülməli işlər həddən çox idi. Ona görə də Prezident İlham Əliyev bu Oyunlara hazırlıq işlərinin aparılmasını xüsusi fərmanı ilə öz tale dayağına - ölkənin birinci xanımı Mehriban Əliyevaya tapşırdı. Məsuliyyət böyük, çiyinlər isə zərif idi. Amma Prezident Mehriban xanımın ardıcıllığına, məqsədyönlü təşkilatçılığına bizim hamımızdan yaxşı bələd idi. İndi hazırlıq işlərinin, demək olar ki, bitdiyi günlərdə bunu bir daha aydın görürük. Külli miqdarda tikinti-quraşdırma, abadlaşdırma, infrastruktur işləri vaxtından əvvəl və yüksək keyfiyyətlə təşkil edilib. Bu, Mehriban xanımın, mən deyərdim ki, tarixi işlərindən biridir. Bunlar bir neçə adamın yox, bir dövlətin məqsədyönlü siyasətidir, xalqımızın keçdiyi fəxr etməli bir yoldur! Və bu yolun adı milli tərəqqidir, özünü yenidən yaratmaq və tanıtmaqdır. Buna qiymət vermək, bunun qədrini bilmək lazımdır!

Əslində biz idmanın inkişaf səviyyəsinə görə artıq Avropanın qabaqcıl ölkələrinə çatmışıq. Bu nailiyyətlər həm də onlarla beynəlxalq tədbirin, Olimpiya hərəkatı liderlərinin ölkəmizə çoxsaylı səfərlərinin nəticəsidir. Bu etimad bütün xalqımızın, idmançılarımızın dəyəridir və biz onu qorumalıyıq. Ona görə qorumalıyıq ki, onun əsasında daha da irəli addımlayaq, idmanın, sağlam həyat tərzinin, Avropaya inteqrasiyanın yollarında daha da irəli gedək, başımız uca olsun!

Avropada bizim idman sahəsindəki siyasətimizi, gördüyümüz işləri qiymətləndirən, bunların qədrini bilən insanlar da çoxdur və biz onlara öz minnətdarlığımızı bildiririk. Azərbaycanın xaricdəki səfirlikləri, müvafiq ölkələrdəki diaspor nümayəndələri, saysız-hesabsız rəsmilər bizim tədbirlərimizdə, xüsusilə I Avropa Oyunları layihəsinin təqdimatlarında fəal iştirak ediblər. Azərbaycanın idman və xarici işlər nazirliklərinin, “Bakı-2015”in baş əməliyyat direktoru Simon Kleqqin zəhmətləri qeyd olunmalıdır.

I Avropa Oyunlarının tarixi mənası təkcə ölkəmizi təbliğ etməsində deyil. Bu məna həm də bu Oyunlarla əlaqədar ölkəmizin özünün yenidən qurulması sayıla bilər. Hər kəs Bakıdan kənara çıxanda sürətli Zığ yolu ilə Mərdəkana və ya Pirallahıya gedibsə, bu yolların kənarlarını görüb. Keçmiş daş karxanalarından qalan qalıqlar, tullantılar adamın qanını qaraldırdı. İndi bir də bu yolla gedin, görün oraları tanıya biləcəksinizmi? Yolların kənarı təmizlənib, yaşıllaşdırılıb, lazımi yerlər şumlanıb. Axı bu, on yeddi kilometrə yaxın ərazidir və bu rəqəmi dildə demək asandır. Amma onun yaşıllaşdırılmasına və abadlaşdırılmasına nə qədər insan enerjisi, maddi xərclər qoyulub. Adamın ürəyi açılır! Həm də görülən işlərin miqyası haqqında düşünürsən. Əvvəlki vəziyyət də bizdə idi, yeni vəziyyət də bizdədir. Amma mən inanıram ki, özümüz dəyişmədən heç nə dəyişə bilməzdi. Bəlkə biz bu dəyişikliyi yaxşı hiss etmirik hələ, amma hiss edəcəyik. Hiss edəcəyik ki, biz başqa bir Bakıda yaşayırıqsa, həm də başqa adamlarıq artıq, xüsusilə gəncliyimiz bunu hiss edəcək və bundan faydalanacaq, həyatımız yeni mərhələyə, yeni keyfiyyətə qədəm qoyacaq.

Çəkdiyim misal bəlkə görülən işlər sırasında bir detaldır, dəryada bir damladır. Amma mənim üçün ən mənalı detaldır. Bu detalda mən dəyişikliklərin həm də dərinliyini görürəm. Daha doğrusu, ərazi abadlaşdırılması ilə vətəndaş şüurumuz, torpağımıza məhəbbətimiz, gələcəyimizə qayğımız arasında tarixi yeniləşmə mənası daşıyan əlaqəni görürəm. Bütün bu tarixi işlərin içərisində milli düşüncə, özünüdərk keyfiyyətindəki, bunların nüvəsindəki dəyişiklikləri görürəm və bir vətəndaş kimi mənim üçün ən qiymətlisi, fərəhlisi bunlardır.

Deyirlər, məna və gözəllik ayrılmazdır. Mən onları ayırardım. I Avropa Oyunlarına gözəllik baxımından qiymət versək, şübhəsiz ki, birinci yerdə göz önünə təzə tikilmiş Bakı Olimpiya Stadionu gələr. Bu dairəvi, ağ rəngli stadion şəhərimizin yeni simvoluna çevrilib. Prezident və xanımı onun açılışında iştirak edəndə qonaqlar gördüklərinə heyran qaldılar. 2011-ci ildə başlanan işlər sayəsində Bakının qədim duz gölünün ərazisində möcüzə yaradıblar. Altmış iki metr hündürlüyü olan stadionun dairəvi binası gecələr şəhərin bütün nöqtələrindən görünür, həm də əbədi məşəl kimi görünür.

Olimpiya stadionu faktiki olaraq Bakıda həm də yeni bir nəqliyyat qovşağı kimi yarandı. Prezidentin qeyd etdiyi kimi, “nəqliyyat infrastrukturumuz yeniləşib, müasirləşib və bu gün bizim tələblərimizə tam cavab verir. Xidmət infrastrukturu yaradılır. Bakıda bütün aparıcı brend hotellər fəaliyyət göstərir, öz fəaliyyətini genişləndirir”.

Burada avtomobil yollarının yaradılması yeni bir yeraltı avtokeçid, Dərnəgüldən Bilgəh istiqamətinə yeni bir yol infrastrukturunu formalaşdırdı. Mövcud yollardakı sıxlığı azaltmaq şəhərimizin bundan belə daha rahat nəfəs alması üçün imkanlar açdı.

Olimpiya stadionu özü isə ən yeni dünya standartları səviyyəsində tikilib. Altı mərtəbəlik stadionun kiçik ehtiyat meydançası, rahat giriş və çıxış üçün iyirmi altı qapı düzəldilib. Bu obyekt qədim duz gölündən 50 hektar ərazi alıb. Tikinti baxımından da unikal bir layihədir, çünki qədimdən bəri Abşeronda duz göllərinin ərazisində və yaxınında mülklər tikilməzdi. Lakin müasir tikinti texnologiyaları bununla bağlı bütün riskləri nəzərə alıb. Stadionun ərazisi və ətrafı gözəl bir gölqırağı parka çevrilib: səksən iki min kvadratmetrlik sahədə yaşıllaşdırma işləri aparılıb. Əslində bu stadionun ətrafında Bakının yeni bir mərkəzi yaradılıb. Bu ərazilər elə XIX əsrə qədər də Bakının yaranıb böyüdüyü özəyin tərkib hissəsi, Balaxanı-Keşlə-Qaraşəhər sənaye ərazisi olub.

Olimpiya stadionu 68000 tamaşaçı tutumunda qurulub. Lakin bu yarışlar üçün digər bir neçə yarış meydançaları da tikilib. Milli Gimnastika Arenası 6900 tamaşaçı tutacaq və burada bütün gimnastika yarışları keçiriləcək. Bakı Su İdmanı Mərkəzi 6000 yerlikdir, burada üzgüçülük, suya tullanma, sinxron üzgüçülük yarışları olacaq. Bakı Atıcılıq Mərkəzi 500 tamaşaçı tutumundadır, burada idmanın ən gözəl növlərindən olan atıcılıq yarışları keçiriləcək. Nəhayət, BMX Veloparkı yeni tikilib istifadəyə verilib ki, burada velosiped yarışlarına 1600 tamaşaçı baxa biləcək. Beləliklə, Avropa Oyunları üçün beş yeni idman meydançası tikilib və bunların ümumi tamaşaçı tutumu 83 min nəfər təşkil edir. Demək artıqdır ki, bu obyektlər Oyunlardan sonra xalqımızın istifadəsində qalacaq, respublikada idmanın daha da inkişafına, gənclərimizin sağlamlığına xidmət edəcək. Bunlar hamısı tikilməli idi və yəqin ki, tikiləcəkdi. Amma “Bakı-2015” Oyunları bu işləri sürətləndirdi, cəmi iki il yarıma həyata keçirməyə imkan yaratdı, başqa sözlə, ölkəmizdə idmanın daha sürətli inkişafına səbəb oldu.

Bunların müsbət mənasını başa düşməmək mümkün deyildir. Dünyanın qabaqcıl ölkələrində idman ancaq sağlamlıq infrastrukturu kimi başa düşülmür. ABŞ, Fransa, Almaniya, İngiltərə, Kanada, Avstraliya və digər ölkələrdə idman insanların həyat tərzinə, asudə vaxtın əsas istifadəsinə çevrilibdir. Bu sadə bir məsələ deyil, bunun üçün həmin ölkələrdə onillər ərzində müvafiq infrastrukturlar yaradılıb, meydançalar, hovuzlar, zallar tikilib. Və bu infrastruktur bazası bir günə yaranmayıb. Orada yeni tikilən hər binanın, hər məktəb və universitetin layihəsində artıq idman qurğuları üçün yerlər tam halda nəzərdə tutulur. Məsələn, bir universitet binasının idman infrastrukturu universitetin öz sahəsindən 2-3 dəfə artıq yer tutur. Bizdə tikinti layihələri belə standartlarla təsdiqlənmir və bu, təəssüf doğurur. Lakin I Avropa Oyunları ərəfəsində tikilmiş və təmir edilib yenidən qurulmuş idman qurğuları bizim üçün də idmanı həyat tərzinə çevirməyə bir yol açır, gənclərimizi bu dəyərlərə doğru aparır və bu, bəlkə də qiymətləndirməli olduğumuz başlıca cəhətdir.

Yaxın günlərdə Bakıda I Avropa Oyunlarının məşəlinin alovlandırılması mərasimi oldu. Mərasimdə çıxış edən Prezident İlham Əliyev görülən işlərə yekun vuraraq dedi: “Bu, bizim üçün həm böyük şərəf, həm də böyük məsuliyyətdir. Vaxtımız məhdud idi. Ona görə biz dərhal işə başladıq, Təşkilat Komitəsi yaradıldı. Bu müddət ərzində Təşkilat Komitəsi çox fəal və böyük uğurla işlədi. Bu gün artıq Azərbaycan və Bakı şəhəri bu Oyunların keçirilməsi üçün tam hazırdır. Təşkilat Komitəsinə bu yüksək fəaliyyətə görə minnətdarlığımı bildirmək istəyirəm. Eyni zamanda, beynəlxalq və yerli mütəxəssislərdən ibarət Beynəlxalq Əməliyyat Komitəsinə də minnətdarlığımı bildirirəm. Onların da fəaliyyəti təqdirəlayiqdir. Əlbəttə, biz daim Avropa Olimpiya Komitəsinin dəstəyini hiss edirdik, bu gün də bunu hiss edirik. Beləliklə, Oyunların hazırlanması üçün bütün məsələlər öz həllini tapmışdır”.

Bəli, iki il yarım ərzində çox böyük işlər görülmüş və Oyunların keçirilməsi üçün zəruri olan çoxplanlı problemlər həll edilmişdir. Bu, hər şeydən əvvəl, ölkənin birinci xanımı Mehriban Əliyevanın rəhbərlik etdiyi Təşkilat Komitəsinin planlı və gərgin işinin nəticəsidir. Mehriban xanım bütün işlərin görülməsini, qrafikə uyğunluğunu şəxsən özü izləmiş, dəfələrlə obyektlərdə olaraq məsləhətlər vermiş, ortaya çıxan problemlərin sürətlə həll edilməsində yardımçı olmuşdur. Faktiki olaraq idman bayramının yüksək səviyyədə keçirilməsinə hazırlığı başa çatdırmışdır. İdmansevərlər, qədirbilən insanlar, gənclər Mehriban xanım Əliyevaya ürəkdən minnətdardırlar.

Avropa Olimpiya Komitəsinin prezidenti Patrik Hikki də Mehriban xanımın böyük təşkilat işini göstərərək deyib: “Bakı-2015” ilk Avropa Oyunları Təşkilat Komitəsinin sədri, birinci xanım Mehriban Əliyeva Oyunlara hazırlıq işlərində şəxsən iştirak edərək dəyərli göstəriş və tövsiyələrini vermiş, işə tam sadiqliyini nümayiş etdirmişdir”. Belə hesab edirəm ki, bu, tərkibində 50 dövlət olan Avropa Olimpiya Hərəkatının ümumi rəyidir. Həmin rəy də təsdiq edir ki, ilk Avropa Oyunları bu hərəkatın yeni tarixini və ənənələrini yaradacaq, 2019-cu ildə keçiriləcək növbəti Oyunların əsl nümunəsi olacaqdır.

Bu qədər ölkənin nümayəndələrini qarşılamaq şəhərimiz, ölkəmiz, dövlətimiz üçün əsl sınaqdır. Yarışlarda iştirak edəcək təkcə idmançıların sayı altı mindən artıq olacaqdır. Onlar iyirmi idman növü üzrə yarışacaqlar. Bunlara ehtiyat oyunçuları, məşqçiləri, həkimləri, milli federasiyaların nümayəndə heyətlərini, jurnalistləri və nəhayət, oyunlara baxmaq üçün biletlər almış xarici vətəndaşları əlavə etsək, qonaqların sayı yüz min nəfərə yaxın olmalıdır. İyunun 12-28-i arası paytaxtımız və ölkəmiz, bir növ, Avropanın qaynar mərkəzinə çevriləcək. Bu məsuliyyəti hər bir vətəndaşımız hiss etməli, yarışların uğurla keçməsi, qonaqların özünü rahat hiss etməsi və ölkəmizdən xoş təəssüratlarla qayıtması üçün hər birimiz əlimizdən gələni etməli, xeyirxah və diqqətli olmalıyıq.

Bu tarixi tədbir Azərbaycanın tanınması, turizm ocağı kimi daha çox sevilməsi üçün bir fürsətdir. Bu fürsətdən necə istifadə olunacağı tədbirin bütün təşkilatçılarından asılıdır. Lakin təkcə onlardan yox. Bölgələrdə keçiriləcək yarış və tədbirlərdən ölkəmizin mənəvi və təbii gözəlliklərini təbliğ etmək üçün bacarıqla istifadə edilməlidir. Düşmənlərimiz ölkəmizi pis qələmə vermək üçün onillərlə fəaliyyət göstəriblər. Bizə indi bu saxta mifləri dağıtmaq, ölkəmizin qədim mədəniyyətini, təmizləyici od və yaşadıcı bərəkət ölkəsi olduğunu əyani göstərmək üçün hər şeyi etməliyik.

Bircə misal kifayətdir: Avropa Oyunlarının məşəli yaşı və tarixi ən qədimlərə gedib çıxan Suraxanı Atəşgahından götürüldü. Bunun nə qədər dərin və simvolik bir mənası var. Məhz bizim ölkəmizdə atəş təmizləyici, saflaşdırıcı, xeyir-bərəkətverici bir başlanğıc sayılır. Dərin tarixi kökləri olan çərşənbə tonqalında təmizlənmə, qırmızı atəş rənginin düşərliyinə inam xalqımızın arasında geniş yayılmışdır. Ən qədimlərdən gəlin köçən qızlarımız da qırmızı geyinərdilər, övladlarımıza bayram hədiyyələri də qırmızı rəngdə, müqəddəs atəş rəngində alınardı. Atəş həm də işıq, nur, aydınlıq, bilik, xoşbəxtlik rəmzidir. Bəlkə elə buna görə bölgələrimizi gəzən Olimpiya məşəli bizim sadə insanlarımıza, gəncliyimizə belə doğma və müqəddəs görünür. İnanıram ki, bu müqəddəs atəş bizim yarışda iştirak edəcək idmançılarımızın da sehrli himayədarı olacaqdır.

Aprelin 26-da alovlandırılan məşəl indi Azərbaycanın bölgələrinə səyahət edir. Milli olimpiya hərəkatımız tarixində bu, yeni bir mərasim, yeni bir mərhələdir. Prezidentimiz tərəfindən alovlandırılan bu məşəl bölgələrdə böyük təntənə ilə qarşılanır: görünür, idman bizim də həyatımızda sağlamlıq mənbəyi olmaqdan başqa yeni keyfiyyətli həyat tərzinə çevrilir. Bu qarşılanma mərasimlərinin görüntüləri ölkəmizdə tərəqqi və firavanlığın əsl nümayişinə çevrilir. Artıq məşəl hərəkatının öz saytı da fəaliyyətə başlayıb. Olimpiya alovu 60 bölgəni səyahət edib bitirəndən sonra Oyunların açılışına qayıdacaq. Açılış və bağlanış mərasimlərinin bədii tərtibinə peşəkar mütəxəssislər cəlb edilib.

Görülən işlər və onların nəticələri mənə vətəndaş kimi daha bir fikir aşılayır: bunların arxasında Azərbaycanın Prezidenti İlham Əliyevin torpağımıza, insanlarımıza, şəhərimizə tükənməz məhəbbəti durur. Mən bütün dəyişikliklərdə bu məhəbbətin miqyasını və səmimiyyətini görürəm, bu məhəbbətin bəhrəli mayasını görürəm. Bu bir möcüzədir, bir məhəbbətin bir ölkəni, onun bugününü və sabahını dəyişməsinin möcüzəsidir. Bu nə tarixdə, nə də hər yerdə baş verir. Bu, Azərbaycan xalqının tale payıdır.

Ulu öndər müasir Azərbaycan dövlətini yaratdı, onun siyasi varisi Azərbaycanın yeni cəmiyyətini və yeni həyatını yaradır. Uğurlar olsun!

Nurlana ƏLİYEVA,

Yeni Azərbaycan Partiyası İdarə Heyətinin üzvü,

YAP Qadınlar Şurasının sədri, professor

Azərbaycan.-2015.- 15 may.- S.8.