Daha bir tarix yazıldı

Məşəl Göygöl və Gəncədə alovlandı

Göygöllülərin də maraqla, səbirsizliklə gözlənilən gün gəlib çatdı. I Avropa Oyunlarının məşəli mayın 15-də gözəlliklər məskəni Göygölə qədəm qoydu. Bu münasibətlə Bayraq meydanında keçirilən təntənəli mərasimə minlərlə adam yığışmışdı.

Məşhur Hacıkənd-Göygöl qoruğu yolunun üstündə, səfalı bir guşədə 50 metr yüksəkliyə qaldırılmış dövlət bayrağı rayonun hər yerindən görünür. Bayraq kompleksində geniş əraziyə malik gəzinti zolaqları yaradılıb. “Azərbaycan dövlətinin rəmzləri muzeyi” təşkil olunub. İşıqlı, yaraşıqlı zallarında ölkəmizin müxtəlif dövrlərindəki gerbləri, o cümlədən Nuxa, Yelizavetpol (Gəncə), Naxçıvan, Quba, Şuşa, Şamaxı, Lənkəran, Zaqatala qəzaları və Bakı quberniyasının bayraqları nümayiş etdirilir.

Rayonun fəal gənclərindən biri olan idman müəllimi Təhminə Əliyeva alqış sədaları altında alov məşəlini qəbul edir. Məşəlçilər sıraya düzülüblər. Namiq Məmmədov, Vüqar İbrahimov, Zamir Hüseynov, Günay Şırxanova,Vüqar Rzayev, Rail Abbaszadə, Rauf Rəhimov, Zərnirə Orucova, Ruslan Məhərrəmov və Təhminə Əliyeva müəyyən məsafədən bayrağı bir-birinə ötürə-ötürə mərkəzi meydana doğru gedirlər.

Yürüş karvanı alman kilsəsinin qabağında ayaq saxlayır. Yaşı 160-dan çox olan bir məbəddir. Xalqımızın tolerantlığından xəbər verir. Qırx ildən çox rayonun baş memarı işləmiş Fikrət İsmayılovla da söhbətimiz bu barədə oldu. O dedi ki, 1819-cu ildə alman koloniyaları bu yerlərə pənah gətirib. O zaman bu yerlər xırda kəndlərdən, obalardan ibarət idi. Uzaq elli qonaqlar həmin vaxtlarda yığcam bir şəhərin, indiki Göygölün təməlini qoydular. 1854-cü ildə isə gördüyünüz bu məbədin - Lüteran kilsəsinin inşasına başlayıblar. Almanlar illər boyu burada yaşayıblar. Bir sıra məhsulların istehsalı ilə, xüsusən üzümçülük və şərabçılıqla məşğul olublar. Onlar bizim adət-ənənələrə də hörmətlə, ehtiramla yanaşıblar.

Meliorator İlqar Məhərrəmov isə başqa bir faktı yada salıb dedi ki, 1928-ci ildə dağların qoynunda “Zurges” elektrik stansiyası tikilmişdi. O vaxtı adı dillərdə gəzən “Zurges” ətraf kəndləri işıqla, elektrik enerjisi ilə təmin edirdi. Göygöl həmişə bu cür yeniliklərə, uğurlu işlərə can atıb. Tarixən belə olub, indi də belədir. Prezident İlham Əliyevin tapşırığı ilə Murovdağdan rayona içməli su xətti çəkilib. İctimaiyyətin nümayəndələri ilə görüşdəki çıxışı da mənim yaxşı yadımdadır. Dövlət başçısı demişdi ki, Göygöl rayonunda su təchizatı həmişə böyük problem olub. Bu problem artıq aradan qaldırılıb. İndi ölkəmizdə ən təmiz və keyfiyyətli sulardan biri Göygölə verilir. Şəhər içməli su ilə təmin edilib. Bu su kəmər boyu yerləşən yeddi kəndə verilir. Gələcəkdə başqa kəndlərin su problemi də həll ediləcək. Bu, tarixi layihədir, tarixi nailiyyətdir.

Rayon ağsaqqallar şurasının sədri Abdulla Qasımovun da ürəyi dolu idi. O da həvəslə söhbətə qoşulur: - Prezident İlham Əliyevin qayğısı və köməyi ilə Göygöl rayonu başdan-başa yenidən qurulub. Küçələr abadlaşıb, səkilər salınıb, işıq sistemi təzələnib. Yeddi yüz binanın dam örtüyü dəyişilib, fasadları müasir üslubda təmir edilib. Aşıq Şəmşir, Hüseyn Cavid, Nəsimi, Məmməd Araz, Hacı Zeynalabdin Tağıyev küçələrinə və başqa yerlərə asfalt döşənib. Bir neçə müəssisə üçün inzibati bina tikilib. Yüzlərlə fərdi ev, məktəb, uşaq bağçası və mədəniyyət evi inşa olunub. Şəhər aybaay, ilbəil böyüyür, gözəlləşir, qol-qanad açır. Təkcə bir neçə ay ərzində dörd mühüm obyekt istifadəyə verilib. Gənclər sarayı, uşaq əyləncə mərkəzi, yay kino teatrı, açıq idman meydançası. Hansı birini deyim. Hamısı bir-birindən gözəl, bir-birindən gərəkli. Bütün bu uğurlar, eləcə də I Avropa Oyunlarının məhz Azərbaycanda keçirilməsinin özü də Prezident İlham Əliyevin müdrik, uzaqgörən siyasətinin bəhrəsidir.

Mərkəzi meydana doğru yürüş başlanır. Yollar boyu rayon mərkəzinin, qəsəbə və kəndlərin sakinləri ilə yanaşı, gənc oğlan və qızlar, idmançılar, ifaçılar düzülüblər. Hamı sanki I Avropa Oyunlarına raport verməyə gəlib. Təcrübəli idmançı Ruslan Məhərrəmovla da söhbətimiz oldu. O, idman sahəsində görülən işlərdən danışdı. Qeyd etdi ki, respublikanın hər yerində olduğu kimi, bu rayonda da dövlətin qayğısı və köməyi ilə idmanın inkişafı üçün hər şərait yaradılıb. Gənclərin həvəsi böyük, bazamız möhkəmdir. Olimpiya idman kompleksi, mərkəzi şəhər stadionu, Gənclər sarayı, uşaq-gənclər idman məktəbi, ayrı-ayrı qəsəbə və kəndlərdə yüzə yaxın sadə idman qurğusu gənclərin ixtiyarındadır.

Rayonda üç min nəfərdən çox oğlan və qız idmanın müxtəlif növləri ilə məşğul olur. Bədən tərbiyəsinin kütləviliyinə, bu işə qadınların-qızların cəlb edilməsinə xüsusi diqqət yetirilir. Qızlardan ibarət basketbol komandası, taekvonda qrupu, atletiklər bölməsi fəaliyyət göstərir. Göygölün basketbolçu qızları bu yaxınlarda Sumqayıtda keçirilən ölkə birinciliyində üçüncü yerə çıxıblar. I Avropa Oyunları ölkənin hər yerində, eləcə də Göygöl rayonunda da idmanın inkişafına güclü təkan verəcəkdir.

Tələbə Bənövşə İbrahimova isə sevincini bizimlə belə bölüşdü: - Çox şadam ki, mən bu möhtəşəm tədbirlərdə iştirak edirəm. Biz hamımız tarixi günlər yaşayırıq. Avropa Oyunlarının rəmzi məşəli hamının qəlbini iftixarla, qürur hissi ilə doldurur. Belə möhtəşəm Avropa Oyunlarının ilk dəfə məhz Azərbaycanda keçirilməsinə yol açan Prezident İlham Əliyevə ürəkdən minnətdarıq. Müstəqil ölkəmiz iqtisadiyyatın, tərəqqinin, təhsilin, musiqinin hər sahəsində dünya miqyasında öz sözünü deyir. Əminik ki, Avropa Oyunları bu yüksəliş, bu tərəqqi yolunda yeni səhifələr açacaq.

Bayraqdarlar mərkəzi meydana daxil oldular. Tədbirə yığılanlar məşəl daşıyanları dönə-dönə alqışladılar, idmançı Novruz Rəhimov müqəddəs alovdan yandırılan çırağı Avropa Oyunları başa çatana kimi saxlanılması üçün Heydər Əliyev Muzeyinə verdi.

Əhməd İSAYEV,

Azərbaycan.-2015.- 16 may.- S.7.