Hamı fərəhlənir, hamı sevinirdi

Məşəl Qazax və Ağstafada alovlandı

Ağstafanın ayrıca rayon kimi yaşı çox deyil. Ötən əsrin 90-cı illərinin əvvəllərində Qazaxdan ayrılıb. Ərazisi geniş, əhalisi işgüzardır. Qısa müddət ərzində hər sahədə sürətlə inkişaf edərək qabaqcıl rayonlar sırasına çıxıb.

18 may, bazar ertəsi, Ağstafa torpağında əsl bayramdır. Hamı elliklə I Avropa Oyunlarının məşəlini qarşılamağa hazırlaşır. Əslində, məşəlin sevinci neçə vaxtdir ki, ürəkləri riqqətə gətirir.

Budur, gözlənilən an gəlib çatdı. Müqəddəs “Atəşgah”dan alovlanan məşəl təntənə ilə ağstafalılara təqdim olunur. Məşəli karate üzrə beynəlxalq yarışın mükafatçısı Namiq Həsənov qəbul edir. Bayraqdarlar alqış sədaları altında məşəli bir-birinə ötürərək mərkəzi meydana doğru irəliləyirlər. Məşəlin yaratdığı sevinc, fərəh ürəkləri coşdurur.

Son bir neçə il ərzində Ağstafa da əksər sahədə böyük uğurlara imza atıb. Rayonda ümumi məhsul istehsalı 2,4, sənaye məhsulunun həcmi 2,6 dəfə artıb. Sahibkarlıq subyektlərinin sayı çoxalıb. 6 mindən artıq iş yeri açılıb. Orta aylıq əməkhaqqı, pensiyaların məbləği yüksəlib.

Yunan-yapon güləşi üzrə idman ustası Rafiq Qasımov deyir ki, bütün bunlar Prezident İlham Əliyevin regionların yüksəlişinə göstərdiyi qayğı və diqqətin bəhrəsidir. Axırıncı 10 ildə dövlət başçısı Ağstafa rayonuna 6 dəfə səfər edib, bu müddət ərzində rayonun sosial-iqtisadi inkişafının sürətləndirilməsinə dair əlavə tədbirlər haqqında 4 sərəncam imzalayıb. Rayon sakinləri ilə görüş zamanı dövlət başçısı görülən işlərə yüksək qiymət verib: “Mən çox şadam ki, doğrudan da, Ağstafada gözəl, sürətli inkişaf vardır. Əlbəttə, çox istəyirəm ki, bu rayon daha sürətlə inkişaf etsin”.

I Avropa Oyunlarının Azərbaycanda keçirilməsi ölkəmizin tarixində yeni bir səhifədir. Təcrübəli təhsil işçisi Fərhad Vəliyev deyir ki, Prezident İlham Əliyevin, ölkənin birinci xanımı, I Avropa Oyunları Təşkilat Komitəsinin sədri Mehriban Əliyevanın, Avropa Olimpiya Komitəsinin prezidenti Patrik Hikkinin və eləcə də çoxlu sayda qonağın iştirakı ilə “Atəşgah” məbədində I Avropa Oyunları məşəlinin alovlandırılması mərasimini əks etdirən video çarxına baxandan bəri hamının diqqəti bu möhtəşəm idman bayramındadır: “İndi bütün dünyanın gözü Azərbaycana dikilib. Müstəqil ölkəmizdə bu genişmiqyaslı tədbirə hazırlığın vəziyyəti ilə hamı maraqlanır. Bütün ölkəyə səs salan, ürəklərə sevinc bəxş eləyən məşəlin bölgələrə səyahətini hamı fərəhlə, iftixarla izləyir. Bu, ölkəmizin tarixində qeyri-adi hadisədir. Hamı yaxşı bilir ki, belə nəhəng bir tədbirin Azərbaycana etibar edilməsi heç də təsadüfi deyil. Bu etimad, bu etibar ulu öndər Heydər Əliyevin yolunu uğurla davam etdirən Prezident İlham Əliyevin dünya miqyasında qazandığı geniş hörmət və nüfuzun nəticəsidir. Belə bir tədbirin Odlar diyarında keçirilməsinə nail olduğu üçün cənab İlham Əliyevə Ağstafa ziyalıları adından dərin minnətdarlığımızı bildiririk.

Belə bir fakt da səsləndi ki, qədirbilən insanların arzusu və istəyi ilə Ağstafa rayonundakı “Keşikçidağ” dövlət tarix mədəniyyət qoruğunda ən hündür yüksəkliklərdən birinə Prezidentin şərəfinə “İlham Əliyev adına zirvə” adı verilmişdir. Rayonun idmançıları ilk Avropa Oyunları ərəfəsində həmin zirvəni ziyarət etmək niyyətindədirlər.

Ağstafa torpağı qədim və qiymətli abidələrlə zəngindir. Rayon Mədəniyyət və Turizm İdarəsinin rəisi Gülgün Kərimov deyir ki, burada 51 tarix və mədəniyyət abidəsi qeydə alınıb. Onlardan ikisi - Aşağı Göyçəli kəndindəki “Töyrə-təpə yaşayış yeri” və Dağkəsəmən kəndinin dağlıq hissəsindəki “Çobandaşlı yaşayış yeri” dünya əhəmiyyətli abidələr sırasına aid edilmişdir. Qeydə alınmış abidələrin 35-i ölkə, 14-ü yerli əhəmiyyətlidir. Bakı- Tbilisi-Ceyhan neft kəmərinin çəkilişi zamanı daha 9 qədim yaşayış məskəni aşkar edilmişdir. Xüsusən eramızdan əvvəl dördüncü əsrin yadigarı sayılan Soyuqbulaq kurqanları və Böyük Kəsik yaşayış yeri, Həsənli nekropolu , Poylu türbələr kompleksi və başqa yerlər daha çox tarixi əhəmiyyətə malikdir. Müşahidələr göstərir ki, Qazax-Ağstafa bölgəsində Neolit və Tunc dövrünün abidələrinə çox təsadüf olunur. Xüsusən Qazax rayonunun Çaylı kəndində “Sarvantəpə”, Ağstafa rayonunda isə “Yastıtəpə” yaşayış yerinin son illərdə üzə çıxarılan nadir izləri ulu tariximizdən xəbər verir. “Yastıtəpə” yaşayış sahəsində aparılan arxeoloji qazıntılar zamanı yaşayış evinin bünövrə hissəsinin qalıqları, təsərrüfat quyuları, ocaq kompleksi, təndir qalığı, xeyli sayda daş alətlər və gil qabların müxtəlif fraqmentləri aşkar edilmişdir.

Ölkəmizin ulu keçmişinə, tarixi abidələrinə getdikcə artan maraq nəzərə alınaraq Azərbaycanda ilk dəfə olaraq Ağstafa rayonunda açıq səma altında “Tarixi və müasir abidələr parkı” yaradılıb. Bu nadir parkın açılışında Prezident İlham Əliyev də iştirak etmişdir. Parkın səmadan görünüşü Azərbaycanın xəritəsini xatırladır. Parkda ölkəmizin ən müxtəlif guşələrini əhatə edən 67 adda tarixi və memarlıq abidələri, Qafqaz dağ silsilələri, Kür və Araz kimi böyük çayların və göllərin görüntüləri əks olunmuşdur. Azərbaycanın ayrı-ayrı bölgələrində olan və xalqımızın tarixi keçmişini yaşadan tikililər, abidələr, saray və qala divarları, müqəddəs ziyarətgahlara aid türbə və məscidlər, müasir dövrə aid arxitektura nümunələri, miniatür heykəllər yüksək peşəkarlıqla yaradılmışdır. Parkın ərazisində Azərbaycanın məşhur tarixi şəxsiyyətlərinin xatirəsini əbədiləşdirən məqbərə və türbələr, dini-tarixi memarlıq abidələri, məscid və sarayların maketləri quraşdırılmışdır. Burada aparılan tikinti-quruculuq işləri, müasir abidə və infrastruktur obyektləri peşəkarlıqla işlənilmişdir. Ölkənin əsas avtomobil və dəmir yolları, yol qovşağı və körpüləri də unudulmamışdır. Parkın ətrafında uzunluğu 160, eni 10 metr olmaqla Xəzər dənizinin təsviri yaradılmışdır. Ərazidə piyada keçidlərinə qranit döşənmiş, 5 min kvadratmetr yaşıllıq sahəsi salınmış, müasir işıqlandırma və suvarma sistemləri quraşdırılmış, gecələr hər bir eksponatın ayrıca işıqlandırılması təmin edilmişdir. Məlumat lövhəsində hər bir eksponat haqqında Azərbaycan və ingilis dillərində informasiyalar yazılmışdır.

Rayonun səfalı guşələrindən birində salınmış Səməd Vurğun adına parkda “Saz” və “Kitab” abidələri ucaldılmış, Hüseyn Arif muzeyi yeni eksponatlarla zənginləşmişdir.

Mərkəzi meydanda alqışlar gurlayır. “Atəşgah”dan gələn alov məşəlindən yandırılan çıraq Avropa Oyunları başa çatanadək saxlamaq üçün Ağstafa rayonunun nümayəndəsi, güləş üzrə respublika çempionu Nemət İbrahimliyə təqdim olunur.

Rəsmi tədbir başa çatır. Geniş meydan şeir, sənət ifaçılarının ixtiyarına verilir. Vətən, torpaq, sədaqət, hünər və rəşadət barədə şeirlər, mahnılar səslənir. I Avropa Oyunlarına uğurlar diləyən rayon sakinləri üzlərdə sevinc, ürəklərdə fərəh hissi ilə bir-birlərini təbrik edirlər.

Əhməd İSAYEV,

Azərbaycan.-2015.- 19 may.- S. 9.