İtaliyalı heykəltəraş-rəssam müəllifi olduğu kompleksi Bakıda reallaşdırmaq istəyir

Üçüncü Ümumdünya Mədəniyyətlərarası Dialoq Forumunda iştirak edən italiyalı heykəltəraş-rəssam Poli Albano mayın 18-də Azərbaycanın mədəniyyət və turizm naziri Əbülfəs Qarayevlə görüşüb.

AZƏRTAC xəbər verir ki, görüşdə mədəni sahədə əməkdaşlıq əlaqələrindən söz açılıb.

Poli Albano Verona şəhərində müəllifi olduğu kompleks barədə məlumat verib. O, kompleksin maketini nazirə göstərərək bildirib ki, burada iki ölkənin mədəni yaxınlığı, böyük söz dühaları - Nizami və Şekspir sənətinin əlçatmazlığı öz əksini tapıb.

Qonaq vurğulayıb ki, hər il bu kompleksi 25 milyon turist ziyarət edir və onun Bakıda da reallaşdırılması Azərbaycana turist axınını artıra bilər.

Nazir öz növbəsində Bakıda aparılan restavrasiya işlərində İtalyan sənətkarlarının yaxından iştirak etdiyini vurğulayıb. Bildirib ki, paytaxtdakı bir sıra mədəniyyət ocaqlarının əsaslı təmirində italyan sənətkarlarının da əməyi var.

Ə.Qarayev deyib ki, bu kompleksin Azərbaycan paytaxtında yaradılması böyük rezonansa səbəb ola bilər.

Görüş əsnasında qonağa Bakıda keçiriləcək birinci Avropa Oyunları barədə geniş məlumat verilib.

Azərbaycan.-2015.- 19 may.- S. 12.