Olimpiya çempionu Namiq ABDULLAYEV: "Güləşçilərimiz Avropa Oyunlarında

da Azərbaycan himnini qalib kimi dəfələrlə səsləndirəcəklər"

Avropanın tarixində bir ilki gerçəkləşdirməyə hazırlaşan Azərbaycan növbəti idman bayramının astanasındadır. Aprelin 26-da “Atəşgah”da alovlanan I Avropa Oyunlarının məşəli respublikamızın hər bir güşəsinə səyahət edərək bu bayram əhval-ruhiyyəsinə əlavə çalar qatır. Görülən bütün hazırlıq işləri isə onu deməyə əsas verir ki, Azərbaycan bu beynəlxalq idman yarışına da ən yüksək formada ev sahibliyi edəcək və Avropa idmanı tarixində yeni səhifə açacaq.

I Avropa Oyunlarına hazırlaşan məşqçilər və idman mütəxəssisləri inanırlar ki, hər zaman beynəlxalq yarışlarda ölkəmizi layiqincə təmsil edən idmançılarımız bu yarışda da inamlı çıxış edərək Azərbaycan bayrağını yüksəklərə qaldıracaqlar. Bu fikirdə olanlardan biri də Olimpiya çempionu, Azərbaycan Respublikası Milli Olimpiya Komitəsi İcraiyyə Komitəsinin və Avropa Oyunları Təşkilat Komitəsinin üzvü, Azərbaycan Güləş Federasiyasının vitse-prezidenti Namiq Abdullayevdir. Bu səbəbdən də Namiq ABDULLAYEVLƏ görüşüb idman bayramı ilə bağlı fikirlərini öyrəndik.

Əməkdar idman ustası dedi:

- Vaxtı ilə gənclərin öz sağlamlıqlarının qeydinə qalması, istedadlarını nümayiş etdirməsi üçün lazımi şəraitin olmadığı Azərbaycanın indi dünyanın idman mərkəzinə çevrilməsi hər bir ölkə vətəndaşında qürur hissi yaradıb. Bu gün Azərbaycan dünyada ən sürətli templərlə inkişaf edir, nümunəvi ölkə kimi daim hörmət və ehtirama layiq görülür. Azərbaycanın uğurlu inkişafı, beynəlxalq nüfuzu və müsbət imicə malik olması ölkə Prezidenti cənab İlham Əliyevin davamlı və məqsədyönlü fəaliyyətinin nəticəsidir. Çünki bu siyasət xalqımızın hərtərəfli inkişafına, ölkəmizin iqtisadi qüdrətinin yüksəlməsinə, vətəndaşlarımızın və gənclərimizin sağlam gələcəyinə xidmət edir. Ona görə də bu siyasət hər zaman xalqın dəstəyini qazanır.

Keçmiş SSRİ dönəmində Azərbaycan idmançılarına qarşı yaradılan problemlərə və çətinliklərə baxmayaraq idmanın inkişafı naminə gənclərin qazandıqları nailiyyətlərdən danışan üçqat Avropa çempionu həmin illəri belə xatırlayır:

- Artıq neçə illərdir ki, idmançılarımız beynəlxalq yarışlarda medallarımızın sayını artırırlar. Olimpiya Oyunlarında qazanılan medallar da bunu deməyə tam əsas verir. Qeyd edim ki, keçmiş sovetlər dönəmində də idmançılarımız medallar qazanırdılar. Ancaq həmin vaxt çox çətinliklərlə üzləşirdik, Azərbaycan idmançılarını hər tərəfdən sıxışdırırdılar. Ancaq biz çalışırdıq ki, qələbələr qazanıb finala yüksələk. Yoxsa, hansısa beynəlxalq yarışlara, dünya, Avropa çempionatlarına aparmırdılar. Bu çətinliklərə baxmayaraq yenə həvəsdən düşmürdük. 1993-cü ildə isə vəziyyət dəyişdi. İdmançılarımız ard-arda Avropa çempionatlarında medallar qazanmağa başladılar. Təbii ki, bu uğurların memarı dahi şəxsiyyət Heydər Əliyev oldu. Ölkə idmanının inkişafı üçün ümummilli lider bütün lazımi tədbirləri gördü. Mən 1994-cü ildə müstəqil Azərbaycanın idmançısı kimi İtaliyanın Roma şəhərində keçirilən Avropa çempionatına yollandım və Vətənə qızıl medalla qayıtdım. Həmin vaxt xoş bir ənənə yaranmışdı. Ulu öndər ilin sonunda idmançılarla görüşüb onlara öz töhfələrini və xeyir-duasını verirdi. Ötən əsrin 90-cı illərini böyük qürurla xatırlayıram. Sanki bütün idmançılarımız ilin sonunu gözləyirdilər ki, öz medallarını dahi şəxsiyyətə təqdim edib, onun xoş sözlərini, insana ruh verən məsləhətlərini eşitsinlər.

1996-cı ildə müstəqil dövlət kimi Azərbaycan idmançıları Atlantada keçirilən Olimpiya Oyunlarına 23 vəsiqə qazanmışdı. Bu, gənc müstəqil ölkə üçün böyük uğur sayılırdı. Yolasalma mərasimində ulu öndər Heydər Əliyev bir daha bizi qəbul etdi və həmin görüşdə elə bir söz dedi ki, heç zaman yaddaşımızdan silinməyəcəkdi. Dahi şəxsiyyət dedi: “Artıq siz qələbə qazanmısınız. Əlinizdəki lisenziyalar bunu sübut edir. Olimpiadada qazanacağınız medal isə ikinci qəhrəmanlıq sayılacaq”.

Biz onda söz verdik ki, Vətənə medallarla qayıdacağıq. Elə də oldu. Ancaq mən hakimlərin qeyri-obyektivliyi ucbatından gümüş medal qazandım. Həmin zaman məyus idim. Çünki qızıl medal haqqında düşündüyüm halda, gümüş medal almışdım. Ümummilli lider isə bizi qəbul edərkən dedi ki, həmin görüşü hamı seyr edib və hakimin səhvini dünya görüb. Ona görə də Heydər Əliyev mənim gümüş medalımı qızıl medal kimi dəyərləndirdi. Yenə söz verdim ki, bu gümüş medalı qızıl medala çevirəcəm. 1997-ci ildə idmanımızın inkişafı istiqamətində daha bir mühüm addım atıldı. 1997-ci ildə cənab İlham Əliyev Milli Olimpiya Komitəsinin prezidenti seçildi və idmanımızda əsaslı dönüş yarandı. 2000-ci ildə Sidneydə keçiriləcək Yay Olimpiya Oyunlarına hazırlıq başlandı. İdmançılarımız üçün istənilən şərait yaradıldı və 3 ildən sonra real nəticə özünü göstərdi - 2 qızıl və 1 bürünc medal. 199 iştirakçı dövlət sırasında 34-cü yeri tutmaq Azərbaycan üçün böyük nailiyyət idi. 2012-ci il London Olimpiadasında isə 10 medalla Azərbaycan Olimpiya dünyasında yeni tarix yazdı. 204 ölkə arasında 30-cu yerə sahib çıxdıq. Bu qızıl medalların 2-si güləşçilərimiz tərəfindən qazanıldı, özü də bir gündə 2 qızıl medal əldə etdik. Ümumiyyətlə, 10 medalın 7-si güləşin payına düşdü. Bu da ölkəmizdə güləşə olan marağın, bu idman növünün inkişafının göstəricisidir.

Namiq Abdullayev deyir ki, bu gün Azərbaycan idmanı özünün intibah dövrünü yaşayır. Ölkəmizdə inşa olunan idman infrastrukturları və idmançılarımızın beynəlxalq arenalarda qazandıqları medallar Prezident İlham Əliyevin idmana göstərdiyi qiqqət və qayğının hansı formada olduğunu əks etdirir. Son on il ərzində Azərbaycanda 300-ə yaxın beynəlxalq səviyyəli idman tədbiri keçirilib. İdmançılarımız 2013-cü ildə 148 beynəlxalq yarışda iştirak edərək 248 medal, 2014-cü ildə isə 165 beynəlxalq yarışda 250 medal qazanıblar. Bütün bunlar onu deməyə əsas verir ki, Azərbaycan sosial-iqtisadi inkişafı ilə yanaşı, idman sahəsində qazandığı uğurlarla da fəxr edə bilər. Eyni zamanda, bu uğurlar Prezident İlham Əliyevin yeniyetmə və gənclərimizin sağlam böyüməsinə, vətənpərvər gəncliyin formalaşmasına xüsusi diqqətlə yanaşdığını sübut edir.

Məhz Azərbaycanda keçirilmiş dünya və Avropa çempionatlarının yüksək səviyyədə təşkili Avropa Olimpiya Komitəsinin I Avropa Oyunlarının ölkəmizdə keçirilməsi ilə bağlı müsbət rəy verməsinə səbəb olub. Avropa Oyunlarının Azərbaycanda keçirilməsi olduqca böyük tarixi hadisədir. Bu, Azərbaycana dünyada bizə göstərilən böyük hörmət və etimaddır.

Olimpiya çempionu hesab edir ki, Azərbaycan öz yüksək təcrübəsi ilə “Bakı-2015”lə yeni tarix yazacaq və bu, gələcəkdə ölkəmizdə daha da böyük yarışların keçirilməsi üçün zəmin yaratmış olacaq. Avropa Oyunları ilə Azərbaycan istənilən idman tədbirinə yüksək səviyyədə ev sahibliyi edə biləcəyini də sübut edəcək və Avropa, Beynəlxalq Olimpiya komitələrinin ölkəmizə olan inamı daha da artacaq.

Təşkilat Komitəsinin üzvü onu da bildirdi ki, Oyunlar zamanı ölkəmiz növbəti dəfə dünya idmanının mərkəzinə çevriləcək. Azərbaycana gələn idmançılar təkcə yarışlarda iştirak etməyəcəklər. Onlar həm də turistlərlə bərabər ölkəmizi səyahətə çıxacaqlar. Bu zaman Azərbaycanın tarixi abidələri, mədəniyyət ocaqları, mətbəxti ilə tanış olub ölkəmiz haqqındakı biliklərini daha da artıracaqlar. Bu isə Azərbaycanın dünyada tanıdılması istiqamətindəki təbliğata öz töhfəsini vermiş olacaq. Bundan başqa, Oyunlar Azərbaycanda turizmin, nəqliyyat infrastrukturunun və digər sahələrin inkişafına da böyük təkan verəcək. Avropa Oyunlarının keçirilməsində əldə ediləcək təcrübə gələcəkdə digər mühüm yarışlara da ev sahibliyi etməyimizə şərait yaradacaq və mövcud təcrübəmizi daha da artıracaq.

Bir idmançı kimi isə Namiq Abdullayev inanır ki, Avropa Oyunlarından sonra Azərbaycanın dünyada artan nüfuzu daha da yüksələcək və növbəti Yay Olimpiya Oyunlarının ölkəmizdə keçirilməsi üçün gözəl zəmin yaratmış olacaq:

- Öncə onu deyim ki, güləşçilərimiz bu yarışa ciddi hazırlaşırlar. Təlim-məşq toplanışları davam edir. Bütün turnirlərdə xalqımız güləşçilərimizdən uğurlu nəticələr gözləyirlər. Çünki idmanın bu növünün ölkəmizdə tarixi kökləri vardır.

İdman infrastrukturları və digər obyektlərə gəlincə isə deyə bilərəm ki, bütün hazırlıq işləri görülüb. Ölkəmiz idman bayramına hazır vəziyyətdədir. Bütün görülən işlərlə Prezident İlham Əliyev şəxsən maraqlanıb, öz tapşırıqlarını verir. Az bir zamanda bu qədər böyük işlərin görülməsi hər kəsi heyran edib. Avropa Olimpiya Komitəsi bunu rekord göstərici kimi qiymətləndirib. Ona görə də bütün idmançılar adından Prezident İlham Əliyevə, ölkəmizin birinci xanımı, UNESCO və İSESCO-nun xoşməramlı səfiri, “Bakı-2015” Təşkilat Komitəsinin sədri Mehriban Əliyevaya təşəkkürümü bildirirəm və bir idmançı kimi söz verirəm ki, Avropa Oyunlarının ən yüksək səviyyədə keçirilməsi üçün əlimdən gələni əsirgəməyəcəm. İnanıram ki, güləşçilərimiz dünya və Avropa çempionatlarında olduğu kimi, doğma diyarımızda da bütün potensiallarını ortaya qoyub Azərbaycan bayrağını dəfələrlə yüksəklərə qaldıracaq, himnimizi qalib kimi dəfələrlə səsləndirəcəklər və Avropa Oyunlarında Azərbaycan öz növbəti uğuru ilə dünyaya səs salacaqdır.

Rəşad BAXŞƏLİYEV,

Azərbaycan.-2015.- 21 may.- S. 4.