İdmançılarımızdan da parlaq qələbələr gözləyirik

Ziyalı sözü - vətəndaş mövqeyi

Vaqif ŞADLİNSKİ,

ATU-nun İnsan anatomiyası kafedrasının müdiri, professor:

- Birinci Avropa Oyunlarının məşəli ölkəmizi bölgə-bölgə dolaşmaqla bu möhtəşəm tədbirə yeni-yeni rənglər qatır. Hər yerdə insanlar bu odu çal-çağırla qarşılayırlar. I Avropa Oyunlarının Bakıda keçirilməsi ilk növbədə müstəqil Azərbaycanın tarixinin, mədəniyyətinin, incəsənətinin, sülhpərvərliyinin, qonaqpərvərliyinin, mətbəxinin, coğrafiyasının, flora və faunasının dünya dövlətlərinə, xalqlarına bir daha yaxından tanıdılması deməkdir. Bu oyunlar təkcə Avropada deyil, digər qitələrdə də yayımlanacaq. Albaniya, Avstriya, Belarus, Belçika, Fransa, Macarıstan, Almaniya, Moldova, Lüksemburq, Rumıniya, Slovakiya, İsveçrə, Türkiyə, ərəb ölkələri, hətta Yaponiyada Oyunlara birbaşa tamaşa edəcəklər. Bu tədbir həm də Azərbaycanda turizmin inkişafında mühüm rol oynayacaq. Çünki oyunlara baxmaq üçün respublikamıza, paytaxt Bakıya xeyli sayda turist gələcək. Hamıya məlumdur ki, Azərbaycanda turizmin inkişafı ümummilli lider Heydər Əliyevin adı ilə bağlıdır. Ulu öndər ölkəmizə rəhbərlik etdiyi bütün dövrlərdə bu sahəyə xüsusi önəm vermiş, Azərbaycanın turizm potensialından səmərəli istifadə edilməsi işinə qayğı və diqqət göstərmişdir. Ulu öndərin siyasi kursunun layiqli davamçısı Prezident İlham Əliyevin Azərbaycana rəhbərlik etdiyi illər ərzində ölkəmizdə turizm sahəsinin dinamik inkişafı ilə bağlı misilsiz işlər görülüb.

Birinci Avropa Oyunlarının oba-oba dolaşan məşəlinin işığında biz paytaxt Bakıda və regionlarda zövq oxşayan abadlıq və yenidənqurma işlərinin şahidi oluruq. Bu da onu göstərir ki, Azərbaycan idman yarışları keçirmək üçün təcrübəli ölkədir. Danılmaz faktdır ki, Prezident İlham Əliyev və ölkənin birinci xanımı Mehriban Əliyevanın idman sahəsində gördüyü böyük işlər nəticəsində uğurlarımızın səsi-sorağı respublikadan çox-çox uzaqlardan gəlir. Avropa Oyunlarında da qazanacağımız nəticə bizə 2017-ci ildə İslam Oyunlarında daha çox lazım olacaq. Hamı əmindir ki, ölkəmiz bu mötəbər idman tədbirini yüksək səviyyədə keçirəcək. Çünki Azərbaycanda mütəmadi qaydada müxtəlif idman sahələri üzrə dünya və Avropa çempionatları təşkil edilib. Ölkəmiz 3 il əvvəl “Eurovision” mahnı müsabiqəsinə layiqincə ev sahibliyi edib. Başqa sözlə, istənilən beynəlxalq əhəmiyyətli tədbirin keçirilməsi üçün Azərbaycanın yaxşı təcrübəsi var.

Çalışdığım Azərbaycan Tibb Universitetinin çoxsaylı professor və müəllim heyəti günlərinin çoxunu həkim peşəsinə yiyələnən gənclərlə keçirirlər. Bu zümrəyə yaxından bələd olduğumuzdan bilirik ki, Azərbaycanda istər tələbə gənclərə, istərsə də idmançı gənclərə dövlət qayğısı yüksək səviyyədədir. Gənclərə ölkə rəhbəri İlham Əliyevin şəxsi təşəbbüsü ilə göstərilən dəstək olduqca qürurvericidir. Dövlət başçısı tərəfindən imzalanmış “Azərbaycan gəncliyi 2011-2015-ci illərdə” Dövlət Proqramının icrası ölkədə gənclər siyasətinin inkişaf etdirilməsinə daha böyük təkan verib. 2013-cü ildə ayrı-ayrı nazirliklərin, xüsusən də Gənclər və İdman Nazirliyi tərəfindən gənclər mükafatının təsis edilməsi fəal tələbələrin ölkənin ictimai-siyasi həyatında daha da aktiv fəaliyyət göstərməsinə marağı artırmışdır.

Dediyim odur ki, dövlətin göstərdiyi qayğı istər təhsildə, istərsə də idmanda gənclərdə xoş ovqat yaradır, onlarda vətənə və xalqa bağlılığı, vətənpərvərlk ruhunu daha da gücləndirir.

Azərbaycan Avropa Oyunları haqqında dünyaya nümunə göstərdi. İndi arzumuz budur ki, idmançılarımız da yarışlar zamanı öz uğurlu çıxışları ilə parlaq qələbələr qazanıb sevincimizə sevinc qatsınlar.

Azərbaycan.-2015.- 22 may.- S.6.