Arzular şəhərində idman növrağı

Məşəl Ağdaşda alovlandı

Ağdaşda bayram tədbirləri həmişə yüksək səviyyədə keçirilir. Dünən də belə idi. Onsuz da səliqə-sahmanı, sakinlərinin ölçülü-biçili davranışları, küçələr boyu uca çinarlarının yaraşığı ilə həmişə diqqəti çəkən Ağdaş şəhəri indi başdan-başa bayram libasındadır. Şəhər sakinləri küçələrə, parklara çıxıblar. Məşəlin keçəcəyi yerlər daha qələbəlikdir. I Avropa Oyunlarının “Atəşgah”dan od alan məşəli bu gün Ağdaşa gəlir. Ağdaşlılar da I Avropa Oyunlarının ölkəmizdə keçirilməsindən qürur duyur, idmançılarımızdan fəxri yerlər, yüksək nəticələr gözləyirlər.

Rayonun idman həyatı da son illər çox zənginləşib. Ancaq keçmişdə əksər rayonlarda olduğu kimi, Ağdaşda da idman tədbirləri, müəyyən zona yarışları məktəblərdə və digər müəssisələrdə keçirilib. Hətta 2007-ci ildə 12 rayonun təmsilçiləri arasında Ağdaşda yüngül atletika və güləş yarışları məktəblərdə keçirildiyinə görə böyük çətinliklər yaranıb. Sözsüz ki, hovuz olmadığına görə üzgüçülükdən, yeniyetmə və gənclərin bu idman növü ilə məşğul olmasından söhbət gedə bilməzdi.

Ancaq bütün çətinliklərə baxmayaraq, elə o dövrlərdə ağdaşlı gənclərdən Pərviz Xəlilov respublika üçüncüsü olub və yığma komandaya cəlb edilib. Xəyyam Mustafayev də boks üzrə ölkəmizdə üçüncü yeri tutub. Ağdaş voleybolçuları isə respublika birinciliyində ikinci yeri qazanıblar. Əlbəttə, bütün gənclərin arzusu idi ki, Ağdaşda da müasir idman kompleksi tikilsin. Ölkə idmanına dünya çempionu Xəzər İsayev kimi pəhləvan bəxş edən Ağdaşın arzuları gerçəkləşməyə başladı. Regionların sosial-iqtisadi inkişafına dair birinci Dövlət Proqramı (2004-2008-ci illər) çərçivəsində Olimpiya idman kompleksinin tikintisinə 2006-cı ilin payızından başlanılsa da, qeyri-müəyyən səbəblərdən işlərin gedişində fasilə yarandı və yenidən 2008-ci ilin yayından inşaat işləri intensiv xarakter aldı. Nəhayət, 2010-cu il fevralın 12-də ölkə Prezidenti İlham Əliyev Ağdaş rayonuna səfəri zamanı bir çox obyektlərin açılış və təməlqoyma mərasimlərində, o cümlədən Ağdaş Olimpiya İdman Kompleksinin açılışında iştirak etdi. Kompleksin tikilib istifadəyə verilməsinin əhəmiyyətini xüsusi vurğulayan dövlət başçısı ictimaiyyət nümayəndələri ilə görüşündə demişdir: “Mən sizin hamınızı təbrik edirəm. Arzu edirəm ki, cavanlar, gənclər, idmançılar bu gözəl şəraitdən səmərəli istifadə etsinlər və Azərbaycanın idman şöhrətini yüksəklərə qaldırsınlar”.

Bəli, bu gün ağdaşlı gənclərin, eləcə də rayon sakinlərinin bir vaxtlar arzuladıqları möhtəşəm idman kompleksinin qapıları onların üzünə açıqdır. Azərbaycan idmanının şöhrətinin yüksəklərə qaldırılmasında ağdaşlı idmançıların da öz yeri var. Bu gün uğurların daha da artırılması, gənc nəslin idmanla məşğul olması, daha güclü, daha fədakar yetişməsi üçün hər cür şərait yaradılıb. Bu böyük qayğıya görə ağdaşlılar dövlət başçısı İlham Əliyevə minnətdarlıq edirlər.

Böyük coşqu ilə I Avropa Oyunlarının məşəlini qarşılamağa hazırlaşan Ağdaşda tikinti-quruculuq işləri də geniş vüsət alıb. Həyata keçirilən tədbirlər nəticəsində rayonun sənaye potensialı artırılır, əhəmiyyətli layihələr gerçəkləşdirilir, yeni iş yerləri yaradılır.

Heydər parkında yenidənqurma işləri görülüb. Ağdaş şəhəri ərazisində və magistral yolların kənarlarında 55 min müxtəlif ağac əkilib. Aralbir kəndində yeni məktəb binası istifadəyə verilib. Tofiqi kəndində 220, Qarağan-Şıxlar və Qülbəndə kəndlərinin hər birində 180 və Ərəbşəki kəndində 80 yerlik məktəb binalarının tikintisi, Ağdaş şəhərinin su təchizatı və kanalizasiya sisteminin yenidən qurulması davam edir.

Rayonun “Dağdibi” adlanan ərazisində yerləşən Türyançay qəsəbəsinin, Yuxarı və Aşağı Ağcayazı, Şəkili, Qoşaqovaq, Cüvə, Korarx, Pirkəkə və Ərəbocağı kəndlərinin mavi yanacaqla təmin olunması üçün yenidənqurma işlərinə başlanılıb. Ağdaş şəhərinin, Ləki qəsəbəsinin küçələrində qaz xətləri yenisi ilə əvəz olunub. Hazırda sahibkarlar tərəfindən 10-dan çox sahibkarlıq obyektinin tikintisi davam edir.

Ağdaş şəhərinin yeni inzibati ərazisində tikilmiş Heydər Əliyev Mərkəzi və Olimpiya idman kompleksi gənclərin asudə vaxtlarının səmərəli keçirilməsində, onların peşə, təhsil və digər bacarıqlarının artırılmasında mühüm rol oynayır.

Rayonda sənaye sahələrinin inkişaf etdirilməsinə də diqqət yetirilir. Yerli xammaldan istifadə edən 3 qum-çınqıl karxanası, Kükəl kərpic istehsalı müəssisəsi fəaliyyətdədir. Ərəbocaq kəndində 1200 başlıq müasir tipli heyvandarlıq kompleksinin və 80 başlıq atyetişdirmə məntəqəsinin tikintisi davam edir.

Bir sözlə, rayonda işgüzarlıq yüksək səviyyədədir. Ağdaşlıların arzusu, qurub-yaratmaq əzmi bitib-tükənmir.

Məşəl karvanının gəlmə vaxtı yaxınlaşdıqca onu qarşılamağa çıxanların sayı daha da artır. Axı, bu tarixi hadisənin iştirakçısı olmaq hər kəsin arzusudur. Maqsud Şeyxzadə adına Texniki, Təbiət və Humanitar Təmayüllü Liseyin direktoru, “Tərəqqi” medallı Şəhla Hacıbalayevanın fikirlərini soruşduq. Dedi ki, bu gün bizim qarşımızda duran əsas məsələ gənclərdə vətən sevgisinin, vətənpərvərlik ruhunun daha da yüksəlməsinə nail olmaqdır. Bu baxımdan bu möhtəşəm məşəl bayramının əhəmiyyəti də böyükdür. Gənclərimiz görürlər ki, onlar bütün Avropanın, bütün dünyanın diqqətinin yönəldiyi I Avropa Oyunları kimi çox mötəbər idman tədbirinin keçirilməsinin yüksək səs çoxluğu ilə etimad göstərildiyi qüdrətli bir ölkənin vətəndaşlarıdır. Bu, hamımızda qürur duyğuları oyadır. Aprelin 26-nı - I Avropa Oyunlarının başlanğıcı kimi tarixə düşən günü indi də həyəcan və fərəhlə xatırlayırıq. Bu duyğuları bizə bəxş etdiyinə görə möhtərəm Prezident İlham Əliyevə, eləcə də ilk Avropa Oyunları Təşkilat Komitəsinin sədri Mehriban xanım Əliyevaya bütün ağdaşlılar adından dərin minnətdarlığımızı bildirirəm.

...Alqış sədalarının artmasından bilinir ki, I Avropa Oyunlarının məşəli Ağdaşa daxil olur. Rayon Mədəniyyət evinin qarşısında məşəli bədən tərbiyəsi və idman müəllimi Rüstəm Şamilov təhvil alır. Sonra Ağdaş Olimpiya İdman Kompleksində taekvando üzrə məşqçi Eşqin İsmayılov, Ağdaş Dövlət Humanitar Kollecinin tələbələri, rayonun fəal gənclərindən olan Rəsul Bulqeysi, Səbinə Əlipaşayeva, Korarx kənd tam orta məktəbinin bədən tərbiyəsi və idman müəllimi Elvin Məmmədov və digər məşəlçilər estafetə uyğun olaraq Oyunların məşəlini 2,9 km məsafə boyunca Heydər Əliyev prospekti, Heydər Əliyev Xiyabanı, Avtovağzal dairəsindən keçərək Heydər Əliyev meydanına gətirirlər. Burada qurulmuş səhnədə kasa formalı məşəl alqış sədaları altında alovlandırılır və rəmzi çırağı yeniyetmələr arasında boks üzrə ikiqat Azərbaycan çempionu, on beş yaşlı Rüfət Nəbiyev təhvil alır. Sonra çıraq Oyunlar başa çatanadək saxlanılmaq üçün Heydər Əliyev Mərkəzinə təhvil verilir. Beləliklə, I Avropa Oyunlarının məşəli Ağdaş rayonunda da alovlanır.

Biz isə fürsətdən istifadə edib mərasim iştirakçılarının təəssüratını öyrənirik. Rayon gənclər və idman idarəsinin rəisi Azad Gözəlov: - Hər bir ağdaşlı kimi, mən də çox sevinirəm ki, belə bir mötəbər tədbirin iştirakçısı oldum. Uzun illər yaddaşımızdan silinməyəcək bir hadisədir. İstər I Avropa Oyunlarının ölkəmizdə keçirilməsi, istərsə də Oyunların məşəlinin rayonlarımızı ziyarət etməsi gənclərin vətənpərvərlik ruhunun artmasında, idmana bağlılığında, vətən, torpaq təəssübkeşliyinin yüksəlməsində mühüm rol oynayacaq. İlk oyunlarda iştirak edən idmançılarımıza uğurlar arzulayırıq. İnanırıq ki, qələbələri ilə bütün ölkəmizi sevindirəcəklər.

Rayon ağsaqqalı, “Tərəqqi” medallı Vaqif Hacıyev: - Belə günləri görmək ömrü uzadır. Bu çal-çağıra, bayram ovqatına, övladlarımızın sevincdən parlayan gözlərinə baxanda ürəyimiz dağa dönür. Əhsən bu növrağı, bu büsatı yaradanlara.

Əməkdar müəllim Hicran Nəbiyevanın da ürəyi doludur: - Həmişə şagirdlərə böyük vətəndən, vətən sevgisindən, böyük amallardan danışırıq. İndi onlar özləri də görürlər ki, həqiqətən qüdrətli bir vətənin övladlarıdır. Belə olmasaydı bu cür möhtəşəm tədbir bizə etibar edilərdimi?!

Təntənəli mərasim başa çatandan sonra I Avropa Oyunlarının məşəli Mingəçevir şəhərinə yola salındı.

Telman NƏZƏRLİ,

Azərbaycan.-2015.- 23 may.- S. 8.