Bu tədbirlər ölkəmizin nadirliyini əks etdirən gözəl göstəricidir

Ötən ayın axırlarında Azərbaycanın və dünyanın idman tarixində çox əlamətdar bir hadisə baş verdi. Azərbaycan Respublikasının Prezidenti İlham Əliyev, I Avropa Oyunları Təşkilat Komitəsinin sədri Mehriban xanım Əliyeva, ailə üzvləri və Avropa Olimpiya Komitələrinin prezidenti Patrik Hikkinin iştirakı ilə iyunun 12-dən 28-dək keçiriləcək möhtəşəm Oyunların məşəli Bakıda “Atəşgah” məbədində alovlandırıldı. Biz - Belarusda yaşayan azərbaycanlılar da, bütün soydaşlarımız kimi, bu hadisədən qürur və fərəh hissi duyuruq.

Hər birimiz üçün əlamətdar olan tarixi tədbirin Azərbaycanda keçirilməsi haqqında 2012-ci ilin dekabrında qərar qəbul ediləndə Avropanın Olimpiya Assambleyasının üzvü olan 41 ölkə bu işə razılıq verdi. Təbii ki, bu, böyük hadisə idi. Prezident İlham Əliyevin Azərbaycanın Milli Olimpiya Komitəsinin sədri seçildiyi gündən idmana, insanların fiziki sağlamlığına göstərdiyi böyük diqqət və qayğısının, bu sahəyə ayrılan investisiyaların uğurlu nəticəsi idi. Digər tərəfdən, beynəlxalq nüfuz, iqtisadi inkişaf, enerji təhlükəsizliyi, infrastruktur layihələrinin yüksək səviyyədə icrası - bütün bunlar hazırda Azərbaycanın reallıqlarıdır. Aydın görünür ki, indi ölkə başçısının hər bir məsələ ilə bağlı təsdiqlədiyi çox dəqiq, düşünülmüş proqramı və inkişaf strategiyası var. Qazanılan uğurların təməlində isə bu amil mühüm rol oynayır. Əldə olunan nailiyyətlərə hamımız sevinir, qürur hissi keçiririk.

Belarusda on minlərlə azərbaycanlı yaşayır. Bəziləri İkinci Dünya müharibəsindən sonra, digərləri müxtəlif illərdə buradakı ali məktəblərdə təhsil almaq, yaxud müəyyən sferalarda çalışmaq üçün Belarusa gəlmiş və burada qalıb məskunlaşlmışlar. Onların hər biri ilə millətimiz fəxr edə bilər.

Biz boya-başa çatdığımız, ilk uğurlarımızı qazandığımız vətənimizi heç vaxt unutmuruq. Ulu öndər Heydər Əliyev Azərbaycanda fundamental bir ideologiyanın əsasını qoymuş və azərbaycanlıların vahid bir etnik-siyasi toplum kimi tanınmasını təmin etmişdir. Çox çətin və ağrılı mərhələlərdən keçsə də, ümummilli liderin yaratdığı milli dövlətçilik ideologiyası tarixin sınaqlarından uğurla çıxmışdır. Bu ideologiya ilk növbədə azərbaycançılığı elə bir səviyyədə özündə birləşdirdi ki, onun söykəndiyi dəyərlər sistemi bütövlükdə xalqımızın ümumi xarakterini müəyyənləşdirdi.

Milli mənafe və maraqların beynəlxalq aləmdə yüksək səviyyədə qorunması, ölkə həqiqətlərinin dünya ictimaiyyətinə dolğun, obyektiv şəkildə çatdırılması baxımından üzərimizə mühüm vəzifələr düşür. Biz buna hazırıq. Bu sahədə gördüyümüz müəyyən işlərə isə Prezident İlham Əliyev qiymət vermişdir: “Dünya azərbaycanlılarının həmrəyliyi hazırda özünü təkcə emosional hiss və duyğularda deyil, həm də daha çox real məzmuna malik milli siyasi birlikdə, əməli addımlarda və konkret nəticələrdə göstərir. Azərbaycanlılar arasında həmrəyliyin daha da möhkəmlənməsi və diaspor qurumlarının təsirli qüvvəyə çevrilməsi prosesi uğurla davam edir”.

1997-ci ildə Belarusun paytaxtı Minskdə Azərbaycan diasporunun rəhbəri seçilmişəm. 2002-ci ildən Belarus Respublikasında Azərbaycan İcmaları Konqresinin sədriyəm. 2004-cü ildə isə Avropa Azərbaycanlıları Konqresinin vitse-prezidenti seçilmişəm.

Belarusda Azərbaycan icmasının kitabxanası və filmotekası var. Minsk şəhərindəki ümumtəhsil məktəblərinin birində Azərbaycan dili, tarixi, coğrafiyası və Azərbaycan xalqının adət-ənənələrinin öyrənilməsi üzrə “Bazar günü” məktəbi fəaliyyət göstərir.

1995-ci ildə əməkdar idman ustası adına layiq görülmüşəm. 2002-ci ildən Belarus Respublikasının Cüdo üzrə Milli Komandasının baş məşqçisi vəzifəsində çalışıram.

Əməyim doğma vətənimdə də yüksək qiymətləndirilmişdir. Azərbaycan Prezidentinin sərəncamı ilə “Şöhrət” ordeninə layiq görülmüşəm.

Ölkəmizdən uzaqda yaşasaq da, vətənimizdə baş verən bütün hadisələrlə yaxından tanışıq. Son dövrlərdə idmana necə böyük qayğı və dəstək göstərildiyi dünyanın gözü qarşısında baş verir. Bütün bunlar məhz cənab İlham Əliyevin dövlət başçısı kimi idmana verdiyi önəm nəticəsində olmuşdur.

Onu da vurğulamaq istərdim ki, I Avropa Oyunlarının Azərbaycanda keçirilməsi bir neçə amillə bağlıdır. İlk növbədə bunu Azərbaycan idmançılarının beynəlxalq arenadakı uğurlu çıxışları mümkün etmişdir. Xatırlayıram ki, son yay olimpiya oyunlarında Azərbaycan komandası 30-cu yerə layiq görülmüş, Avropa ölkələri arasında isə 15-ci yeri tutmuşdur. Eyni zamanda, gənc idmançıların da böyük uğurları var. Ötən il yeniyetmələrin olimpiya oyunlarında Azərbaycan komandası tarixi hadisəyə imza ataraq 10-cu yerə yüksəlmişdi.

Son illər ərzində Azərbaycanda müasir idman infrastrukturu yaradılmışdır. Bizə məlumdur ki, respublikanın 40-dan çox şəhər və rayonunda yüksək standartlara uyğun olimpiya idman mərkəzləri inşa edilmişdir. Bakı nəqliyyat infrastrukturu yeniləşdirilmiş, müasirləşdirilmişdir. İndi bu sahə bütün tələblərə cavab verir. Şəhərdə hərtərəfli xidmət infrastrukturunun yaradıldığından da xəbərdarıq.

Azərbaycan artıq möhtəşəm yarışların keçirildiyi məkana çevrilməkdədir. Bakıda və regionlarda çoxsaylı dünya və Avropa çempionatları, müxtəlif beynəlxalq yarışlar baş tutmuşdur.

Təbii ki, doğma yurdumuzun sürətli iqtisadi inkişafı da bu qərarın qəbulunda öz rolunu oynamışdır. Önəmli məsələ ondan ibarətdir ki, Azərbaycan əhalisi və dünyadakı diasporlarımız bu qərarı böyük sevinclə və qürur hissi ilə qarşılamışdır.

Düzdür, xırda istisnalar da olur. Nankorlar və xalqımızı istəməyən bəzi qüvvələr ölkəmizdə görülən böyük işlərə qara yaxmaqdan, hətta ermənipərəst mövqe tutmaqdan belə çəkinmirlər. Lakin belə ünsürlər heç vaxt vətənimizin inkişafına, qüdrətlənməsinə və çiçəklənməsinə maneçilik törədə bilməz.

Bakıda keçirilən hər bir tədbir, hər bir idman yarışı elə yüksək səviyyədə təşkil olunur ki, qonaqlar dönə-dönə Azərbaycana gəlmək istəyirlər. İnanıram ki, ilk Avropa Oyunlarının iştirakçıları və qonaqları bu dəfə də Bakıdan öz vətənlərinə ən xoş təəssüratlarla qayıdacaqlar. Bu sahədə əldə edilən dəyərli təcrübəni yüksək qiymətləndirən Prezident İlham Əliyev deyir: “Beynəlxalq yarışların keçirilməsi üçün bizim kifayət qədər təcrübəmiz var. Son illər ərzində Azərbaycanda çoxsaylı dünya və Avropa çempionatları keçirilmişdir. Azərbaycanın sürətli iqtisadi inkişafı, əlbəttə ki, bu qərarın qəbulunda öz rolunu oynamışdır. Sevindirici cəhət odur ki, Azərbaycan əhalisi bu qərarı böyük sevinclə qarşılamışdır”. Azərbaycanın dövlət başçısı çıxışında onu da vurğulamışdır ki, “Azərbaycan bir neçə gündən sonra tarixdə ilk dəfə keçiriləcək Avropa Oyunlarını qəbul edəcək. 2017-ci ildə isə İslam Həmrəylik Oyunlarını qəbul edəcək. Bu da ölkəmizin nadirliyini əks etdirən ən gözəl göstəricidir”.

O da məlumdur ki, Azərbaycan Prezidenti İlham Əliyev və “Bakı-2015” ilk Avropa Oyunları Təşkilat Komitəsinin sədri, birinci xanım Mehriban Əliyevanın dəyərli göstərişləri və tövsiyələri, böyük peşəkarlığı sayəsində ölkə qısa bir müddətdə belə möhtəşəm Oyunların keçirilməsinə hazır olmuşdur. Bu arada Avropa Olimpiya Komitələrinin prezidenti Patrik Hikkinin çıxışını xatırlatmaq istərdim: “Mən Avropa Olimpiya Komitələrinin səmimi minnətdarlığını Prezident İlham Əliyevə və birinci xanım Mehriban Əliyevaya çatdırmaq istərdim. Təşkilat Komitəsi və “Bakı-2015” ilk Avropa Oyunları Əməliyyat Komitəsinin peşəkar heyəti planlarımızı reallığa çevirmək üçün 27 ay ərzində yorulmadan çalışır. Belə qısa müddət ərzində görülmüş bu qədər işləri hətta ən çılğın arzularımızda təsəvvür edə bilməzdik. Əslində bütün Bakı heyəti hətta Oyunlar başlamazdan öncə dünya rekorduna imza atmışdır.

“Bakı-2015” ölkənizin əməyi və səyi sayəsində baş tutacaq. Azərbaycan rəhbərliyi ilə işləmək olduqca məmnunluq doğurdu. Sizin peşəkarlığınız və diqqətiniz bizi hər zaman təsirləndirdi. “Bakı-2015” ilk Avropa Oyunları Təşkilat Komitəsinin sədri, birinci xanım Mehriban Əliyeva Oyunlara hazırlıq işlərində şəxsən iştirak edərək dəyərli göstəriş və tövsiyələrini vermiş, işə tam sadiqliyini nümayiş etdirmişdir”.

Yaxın vaxtlarda Azərbaycan xalqı bu gözəl idman və dostluq bayramını izləyəcək. Mən isə Belarusda yaşayan bütün soydaşlarımızın adından I Avropa Oyunlarında iştirak edəcək idmançılara uğurlar arzulayıram! Qoy vətənimiz daim bu cür nəhəng layihələrlə, iqtisadiyyatda, idmanda və digər sahələrdə qazandığı nailiyyətlərlə dünyada tanınsın!

Natiq BAĞIROV,

Belarus Respublikasında Azərbaycan İcmaları Konqresinin sədri,

Belarusun əməkdar idman ustası, sambo və cüdo üzrə dördqat dünya və beşqat Avropa çempionu

Azərbaycan.-2015.- 24 may.- S. 2.