Azərbaycan naminə

YAP gəncləri “Bakı-2015”in ən fəal könüllüləri olacaqlar

İntibah dövrünü yaşayan Azərbaycan hər il mühüm nailiyyətlərə imza atır, beynəlxalq miqyasda imicini durmadan artırır. Bir vaxtlar çoxuna xəyal kimi görünən arzular reallığa çevrilir. 25 il öncə sovet imperiyasının tərkibindən xilas olmağa çalışan Azərbaycan artıq BMT Təhlükəsizlik Şurasına rəhbərlik edən müstəqil dövlət kimi adını tarixə yazıb. İndi Azərbaycan həm də dünyanın enerji xəritəsinə öz korrektələrini edən dövlətdir.

Gələcəyə istiqamətlənmiş, elm və texnologiyaların inkişafını şərtləndirən, iqtisadiyyatın müxtəlif sahələrinin davamlı tərəqqisinə yönəlmiş və cəmiyyətin hər bir üzvünün rifahına xidmət edən mühüm əhəmiyyətli tədbirlərin həyata keçirilməsi ölkəmizin yüksək inkişafını təmin etmişdir. Son illər Azərbaycanın beynəlxalq aləmdə iqtisadi və siyasi mövqeyini daha da möhkəmləndirməsi, beynəlxalq qurumların hesabatlarında islahatçı ölkə kimi yer tutması, dünyanın nüfuzlu təşkilatlarının Azərbaycanın mövqeyini dəstəkləyən qərar və qətnamələr qəbul etməsi də sübut edir ki, ölkəmizin seçdiyi yol düzgündür. Prezident İlham Əliyevin rəhbərliyi ilə Azərbaycanda əldə edilən bütün bu uğurların təməlində isə ulu öndər Heydər Əliyev tərəfindən qoyulan inkişaf strategiyası dayanır.

İndi isə xalqımız tariximizə qızıl hərflərlə yazılacaq daha bir möhtəşəm tədbirə hazırlaşır. Azərbaycan I Avropa Oyunlarına ev sahibliyi edəcək. Məlum olduğu kimi, Avropa Oyunları indiyədək təsis edilən sonuncu qitə yarışıdır. Digər qitələrdə bu tip idman yarışları mövcuddur, Avropada isə ilk dəfə 2012-ci ilin dekabrında Avropa Oyunları təsis edilib. O zaman ilk Avropa Oyunlarının Azərbaycanda keçirilməsi barədə qərar ölkəmizin müstəqillik dövründə nail olduğu ən böyük uğurlardan biridir. Çünki hər bir beynəlxalq idman təşkilatı yarışa ev sahibliyi edəcək dövləti müəyyən edərkən onun imkanlarını, infrastrukturunu, siyasi-ictimai vəziyyətini nəzərə alır. Avropa Oyunları miqyasına görə Olimpiya Oyunlarından heç də geri qalmır. Bu cür yarışa ev sahibliyi etmək istəyən ölkənin hər bir idman növü üçün infrastrukturu olmalıdır. Azərbaycanın da belə imkan və şəraiti var, özü də yüksək səviyyədə. Son 15 ildə Azərbaycanda 40-dan artıq Olimpiya İdman Kompleksi inşa olunub. Əvvəllər mövcud olmuş bütün idman qurğuları yenidən qurulub. Onlarca dünya və Avropa miqyaslı idman yarışlarına ev sahibliyi edib. Elə Avropa Olimpiya Komitəsi də I Avropa Oyunlarının Azərbaycanda keçirilməsi barədə qərarını qəbul edərkən ölkəmizin real imkanlarını, son illər çoxsaylı idman yarışlarına ev sahibliyi etməsini, Olimpiya hərəkatının burada geniş vüsət alması və digər amilləri nəzərə alıb. I Avropa Oyunlarının keçirilməsi bütün Avropa Olimpiya hərəkatı üçün də tarixi hadisədir.

Azərbaycanda I Avropa Oyunlarına hazırlıq işləri 2013-cü ilin əvvəllərində start götürdü. Həmin ilin yanvarında Prezident İlham Əliyevin sərəncamına əsasən ölkəmizin birinci xanımı, YAP sədrinin müavini, Heydər Əliyev Fondunun prezidenti Mehriban Əliyevanın rəhbərliyi ilə yaradılan Təşkilat Komitəsinin cəmi 2 il yarım vaxtı vardı. Olimpiya Oyunlarında və ona bənzər yarışlarda isə ev sahibi olan ölkənin hazırlıq işlərinə ən azı 7-8 il vaxtı olur. Müddətin az olmasına baxmayaraq, Təşkilat Komitəsi öz işini sürətlə və keyfiyyətlə apardı. Bu müddətdə Bakı Olimpiya Stadionu, Milli Gimnastika Arenası, Bakı Su İdmanı Sarayı, Bakı Atıcılıq Mərkəzi və Velopark inşa olundu, Atletlər kəndi yaradıldı, neçə-neçə idman qurğusu beynəlxalq standartlara uyğun yenidən quruldu.

Artıq hazırlıq və təşkilati işlər başa çatıb və indi ölkə ictimaiyyəti I Avropa Oyunları məşəlinin “Atəşgah”dan başlayan səyahətini izləyir. Məşəlin səyahətində Yeni Azərbaycan Partiyasının üzvləri, o cümlədən YAP Gənclər Birliyinin təmsilçiləri fəal iştirak edirlər. Ümumiyyətlə, YAP üzvləri hər ölkə miqyaslı tədbirlərdə yaxından iştirak etməklə töhfələrini verirlər. I Avropa Oyunlarında da belədir. Məlum olduğu kimi, bu mötəbər idman tədbirində müxtəlif vəzifələri icra etmək üçün 12 mindən artıq könüllü cəlb edilib. Onların arasında YAP üzvü olan gənclərimiz də kifayət qədərdir. Odur ki, I Avropa Oyunlarının alovunun rayonlar üzrə səyahətini izləyəndə məşəlçilər arasında YAP üzvlərini də görmək olar.

YAP üzvləri olan gənclərimizin I Avropa Oyunlarında iştirakı yalnız bununla bitmir. Məlum olduğu kimi, antiazərbaycançı şəbəkə, o cümlədən ermənilər hazırda Azərbaycana qarşı qarayaxma kampaniyasına start veriblər. Bununla əlaqədar gənclərimiz sosial şəbəkələrdə antiazərbaycançı dairələrin yalanlarının ifşa olunması, I Avropa Oyunlarının təbliği istiqamətində geniş iş aparırlar.

YAP üzvü olan gənclərin I Avropa Oyunlarına hazırlıq proseslərində iştirakı və ümumiyyətlə, gənclərimizin ölkə həyatındakı rolu YAP Gənclər Birliyinin mayın 16-da keçirilən IV hesabat-seçki konfransında geniş müzakirə olunub. Ulu öndər Heydər Əliyevin ideyalarına sadiq qalan YAP hər zaman fəaliyyətində gənclərə geniş imkanların yaradılmasına, onlarda milli təfəkkürün, vətənpərvərlik ruhunun formalaşdırılmasına xüsusi diqqət yetirir. Beləliklə, partiyamız gənclərin inkişafı üçün bütün imkanları yaradır və gənclərlə sıx işləməyi başlıca hədəflərindən biri hesab edir. Məhz bu səbəbdəndir ki, ölkəmizin intellektual gəncliyi öz siyasi taleyini YAP ilə bağlayır.

Hesabat dövründə Yeni Azərbaycan Partiyası Gənclər Birliyinin sıraları həm kəmiyyət, həm də keyfiyyət baxımından daha da genişlənmişdir. 1 yanvar 2015-ci ilə tərtib olunmuş statistik məlumatlara əsasən, partiya sıralarında təmsil olunan gənclərimizin sayı 250 mindən çoxdur. Bu isə ümumilikdə Yeni Azərbaycan Partiyası üzvlərinin 40 faizi deməkdir.

Konfransda çıxış edən Azərbaycan Respublikası Prezidentinin İctimai-siyasi məsələlər üzrə köməkçisi, YAP İdarə Heyətinin üzvü Əli Həsənov bildirib ki, bu gün dövlət başçısı İlham Əliyevin də gənclərlə bağlı siyasətinin mərkəzində dayanan əsas ideya onları layiqli vətəndaş, vətənpərvər insanlar kimi yetişdirməkdir. “Prezidentin fikrincə, vətənpərvər insan sadəcə olaraq sözdə Azərbaycanı sevən gənclər olmamalı, eyni zamanda, Azərbaycanın inkişafı üçün özünün potensialını ortaya qoymağı bacaran insan olmalıdır. Azərbaycan gəncləri bilikli, savadlı, Vətənə bağlı olmalı və ölkəmizin gələcək inkişafına töhfələrini verməlidirlər. Azərbaycan dövlətinin gənclərdən əsas gözləntisi dövlətçilik və vətənpərvərlik hissləridir. Hər bir gəncin borcu daxili, xarici təqiblərdən, təhdidlərdən, bizə qarşı yönələn təzyiqlərdən qorunma işində öz çiyinlərini bu yükün altına vermək və ölkəmizə sahib çıxmaqdır. Hər bir gənc milliyyətindən, dinindən, irqindən asılı olmayaraq, öz üzərində bir azərbaycançılıq ideyası hiss etməlidir” - deyə Əli Həsənov bildirib. YAP Gənclər Birliyinin sıraları durmadan genişlənir və xeyli sayda gəncin öz gələcək taleyini bu partiyanın fəaliyyətinə bağladığını diqqətə çatdıran Əli Həsənov deyib ki, bunun əsas səbəbi partiyanın qurucusunun ulu öndər Heydər Əliyev olması, onun ideyalarına söykənməsi və partiyanın sədri İlham Əliyevin hazırda apardığı məqsədyönlü siyasətdir.

Baş nazirin müavini, Yeni Azərbaycan Partiyası sədrinin müavini-icra katibi Əli Əhmədov konfransda çıxış edərək YAP Gənclər Birliyinin fəaliyyətini yüksək qiymətləndirib. Bildirib ki, YAP-a üzv olan gənclər ölkəmizin ictimai-siyasi həyatında yaxından iştirak edirlər, öz sıralarını daha da genişləndirirlər. Bu gün YAP Gənclər Birliyi böyük bir gücü öz ətrafında birləşdirib. Azərbaycan gəncliyinin ən layiqli nümayəndələri partiyanın sıralarında toplaşıblar. Əli Əhmədov deyib: “Gənclik hər bir cəmiyyətdə, o cümlədən Azərbaycan cəmiyyətində müasirliyin, yeniliyin daşıyıcısıdır. Azərbaycan gəncliyi də Prezident İlham Əliyevin həyata keçirdiyi müasirləşmə siyasətinə ən böyük dəstək verən ictimai qüvvə kimi özünü göstərib. Hesab edirəm ki, məhz bu gənclik Azərbaycanın gələcəkdə daha firavan həyatının təmin olunmasına böyük töhfələr verəcək. Partiyanın sıralarında olmaqla əldə etdikləri biliklər, təcrübələr gənclərə gələcəkdə daha səmərəli fəaliyyət göstərmək üçün əsas verir”.

Əli Əhmədov onu da qeyd edib ki, bu gün YAP-ın sıralarında 650 mindən çox vətəndaş cəmləşib və bu, böyük bir qüvvədir: “Partiyamızın sıralarında olmaq hər bir üzvümüz üçün qürur mənbəyinə çevrilib. Bu, sadəcə bir statistika deyil, bu, 650 mindən çox Azərbaycan vətəndaşının ümummilli liderin ideyalarına dərin məhəbbətinin göstəricisidir, bu ideyaları reallaşdıran Prezident İlham Əliyevin siyasətinə sədaqətin ifadəsidir. Çünki Yeni Azərbaycan Partiyası yarandığı gündən Azərbaycan dövlətinə sədaqətlə xidmət edib”.

Konfransda YAP Gənclər Birliyinin sədri və müavinləri, 63 nəfər şura üzvü, 15 nəfər idarə heyətinin üzvü seçilib. Əminliklə deyə bilərik ki, öz fəaliyyətlərində ulu öndər Heydər Əliyevin ideyalarını və Prezident İlham Əliyevin siyasi kursunu rəhbər tutan YAP-da təmsil olunan gənclər bundan sonra da Azərbaycanın ictimai-siyasi həyatında yüksək fəallıq nümayiş etdirəcək, dövlətçilik maraqları və ölkəmizin inkişafı naminə qarşılarında duran ümdə vəzifələrini layiqincə yerinə yetirəcəklər.

Seymur ORUCOV,

YAP Gənclər Birliyinin sədri

Azərbaycan.-2015.- 26 may.- S.4.