Qubanın istirahət mərkəzləri mövsümə hazırdır

Azərbaycan lap qədimdən coğrafi mövqeyi, füsunkar təbiəti və insanlarının qonaqpərvərliyi ilə çoxlarının diqqətini özünə cəlb edib. Bunun nəticəsidir ki, dünyanın ən məşhur səyyahlarının gündəliklərində Azərbaycandan, onun təbiət gözəlliklərindən, maddi mədəniyyət abidələrindən, təbii sərvətlərindən geniş söz açılır. Böyük İpək yolunun keçdiyi əsas ərazilərdən olduğu üçün də Azərbaycana tarixən diqqət kifayət qədər yüksək olub.

Son illər qeyri-neft sektoru, o cümlədən turizm inkişaf edib. Turizm sahəsində infrastruktur layihələrin gerçəkləşdirilməsi əcnəbilərin Azərbaycana olan marağını daha da yüksəldib. Artıq sürətlə inkişaf etdiyi üçün Azərbaycanda turizm brendi formalaşır.

Azərbaycanın şimal rayonları arasında zəngin flora və faunaya, əsrarəngiz təbiətə malik olan Quba isə turistlərin ən çox maraq göstərdiyi rayonlardan biridir. Bu yerlər təkcə təbii gözəllikləri ilə yox, həm də qədim tarix-mədəniyyət abidələri, sənətkarlıq nümunələri ilə məşhurdur. İnsanı valeh edən meşələrlə örtülü dağların qoynunda yerləşən istirahət mərkəzləri, şəlaləli çaylar, soyuq bulaqlar təbiət vurğunlarının, turistlərin ən çox xoşladıqları məkanlardandır. İstər isti yay günlərində, istərsə də şaxtalı, qarlı qışda Qubanın qonağı əksilməz. İsti aylarda gün düşməyən meşələri, qışda qara bürünmüş dağ və dərələri bura yolu düşənləri ovsunlayır, onları təkrar-təkrar bu füsunkar diyara gəlməyə səsləyir.

Dövlət tərəfindən də rayonda turizmin inkişafına böyük diqqət göstərilir. Quba Olimpiya İdman Kompleksi, digər əyləncə mərkəzləri, Xınalıq kəndinə çəkilən yol məhz bu diqqətin təzahürləridir.

Bu gün Qubanın istirahət mərkəzlərində onlarla turizm mütəxəssisi çalışır. Quba Rayon Mədəniyyət və Turizm İdarəsində ixtisaslı gənclərin işlə təmin olunmasına xüsusi diqqət var. İşlə təmin olunan gənclər arasında xarici dilləri bilənlər çoxdur. Gənclər rus dili ilə yanaşı, ingilis dilinə də maraq göstərirlər. Bilirlər ki, işə götürüləndə bu, onlara əlavə üstünlük verir.

Məlumdur ki, turist həm də informasiya daşıyıcısıdır. O, səfər etdiyi ərazilərin təbiəti, tarixi abidələri barədə ölkəsinə informasiya aparır. İstirahət zamanı qarşılaşdığı, yaxud heç vaxt rast gəlmədiyi qeyri-adi nə varsa yaddaşında saxlayan turist özündən sonra həmin yerlərə yeni səfərin səbəbkarına çevrilir. Bu mənada qonaqların, xüsusən əcnəbi turistlərin Qubadan apardıqları təəssüratlar çoxdur.

Onu da qeyd edək ki, hər il turizm mövsümünün başlanması ərəfəsində rayon mədəniyyət və turizm idarəsinin əməkdaşları istirahət mərkəzlərində olur, onların mövsümə hazırlıqlarını yoxlayırlar. İdarənin əməkdaşları deyirlər ki, ötən il yaradılan kurslarda təcrübə toplayan gənclərin bir qismi artıq müasir xidmət qaydalarını mənimsəmişlər.

Qubanın girəcəyində inşa edilən möhtəşəm Heydər Əliyev seyrəngahında hər gün xarici turistlərlə rastlaşmaq mümkündür. Buradakı Heydər Əliyev və Gənclər mərkəzləri, Yaşıl teatr, əzəmətli musiqili fontan qonaqların yaddaşında dərin izlər buraxır. Seyrəngahda müxtəlif ədəbi-bədii tədbirlər də keçirilir. Həmin tədbirlərdə Azərbaycanın tanınmış şairlərinin şeirlərindən parçalar oxunur, yazıçıların əsərlərindən səhnələr göstərilir, konsert proqramları təşkil edilir. Bu proqramlarda dünyanın musiqi korifeylərinin - Şopenin, Dvorjakın, Baxın, Üzeyir Hacıbəylinin, Tofiq Quliyevin əsərləri də səsləndirilir. Axşamlar isə xüsusi viktorinalar olur.

I Avropa Oyunlarının keçirilməsi ilə bağlı Azərbaycana turist axını gözlənilir. Qubanın əlaqədar təşkilatları bu möhtəşəm tədbirə xüsusi hazırlaşıblar. Bütün istirahət mərkəzlərinin avadanlıqları dəyişdirilib, müasir standartlara uyğun xidmət qaydaları müəyyənləşdirilib. Bir sözlə, turizm obyektləri yollarını Qubaya salacaq qonaqlar üçün tam hazırdır.

Akif ƏLİYEV

Azərbaycan. - 2015.- 30 may.- S. 10.