Qobustan bu günə çoxdan hazırlaşırdı

I Avropa Oyunlarının məşəli Ağsu rayonundan sonra Qobustana gətirildi. Məşəlin gəlişinə böyük bayram ovqatı ilə hazırlaşan Qobustan şəhərində 8,3 mindən çox əhali var. Şəhər 310 hektar ərazini əhatə edir. 1738 ailə təsərrüfatının mövcud olduğu bu şəhərdə azərbaycanlılarla yanaşı, ruslar və Məhsəti türkləri də yaşayırlar. Onlar da rayonun inkişafı naminə üzərlərinə düşən vəzifələrin öhdəsindən layiqincə gəlməyə çalışırlar. Ermənistanın işğal etdiyi ərazilərdən didərgin düşmüş 160 məcburi köçkün yerli sakinlərlə qaynayıb-qarışsa da, doğma ocaqlarına dönəcəkləri günü səbirsizliklə gözləyirlər.

Məşəlin keçəcəyi Heydər Əliyev prospektində 2300 metr uzunluğunda səki inşa olunub. Prospekt boyunca yaşıllıq zolağı salınıb, qızılgül kolları, bəzək ağacları əkilib.

I Avropa Oyunlarının məşəlini qarşılamağa çıxanlar arasında məktəblilər də az deyildi. Amma daha çox diqqətimizi çəkən yaşlı nəslin nümayəndələrinin çoxluğu oldu. Onlar gənclərdən heç də az sevinmirdilər. Bu dünya görmüş, həyatın hər üzünə bələd olan insanlarla söhbət etmək həmişə maraqlıdır.

Məşəl yürüşü başlayana qədərki müsahibimiz də onların nümayəndəsidir. Qobustan Rayon Ağsaqqallar Şurasının sədri Şıxbala Bayramov böyük məmnuniyyətlə bayram ovqatını bizimlə bölüşdü:

- Keçmişdə gələn qonağa göstərməyə nə tapılardı ki?.. İndi hara baxırsan abadlıq, firavanlıqdır. Bu işlər elə-belə başa gəlməyib. Vaxtilə ulu öndər Heydər Əliyevin, indi də Prezident İlham Əliyevin qayğısı sayəsində Qobustan abadlaşıb. Digər bölgələrimiz də inkişaf edir. Onları televiziya vasitəsilə Prezidentin səfərləri zamanı görürəm. Gözümlə gördüyüm, şahidlik etdiyimsə Qobustanda görülən işlərdir.

Həyata keçirilən tədbirləri rayon əhalisinin böyük razılıqla qarşıladığını bildirən Ş.Bayramov yolların abadlaşmasından, içməli su çəkilişindən, tikinti işlərindən, fermerlər üçün yaradılan şəraitdən də həvəslə danışdı. Yaxınlıqdakı dövlət idarələrinin yeni inzibati binalarını göstərərək qeyd etdi ki, bu yaraşıqlı binalar, abadlıq, yenidənqurma işləri Prezident İlham Əliyevin bölgələrə, o cümlədən Qobustana göstərdiyi qayğının, diqqətin nəticəsidir: “Ölkəmizdə belə əmin-amanlıq, gücümüz, qüdrətimiz, imkanımız olmasaydı, bu bayramı nə Bakıda, nə də rayonlarda yüksək səviyyədə keçirə bilərdik. Məşəl gəlir, alqışlarla qarşılayırıq, alovlandırırıq, alqışlarla da yola salırıq. Əsl bayram, əsl növraq budur, buna görə dövlət başçısına qobustanlılar adından dərin minnətdarlığımı bildirirəm”.

Bu vaxt məşəli gətirən karvan alqış sədaları altında Oyunların mədəniyyət evinin qarşısında qurulmuş rəmzi qapısından keçdi. Onu məşqçi-müəllim Fərid Əzizov qəbul etdi. Sonra Heydər Əliyev prospekti boyunca yürüş başlandı. Şəhər 2 nömrəli tam orta məktəbin şagirdi Eldəniz Mirzəli, uşaq-gənclər idman məktəbinin məşqçi-müəllimi Müslüm Xanəliyev, şəhər 2 nömrəli tam orta məktəbin müəllimi Ruslan Şahbazov, FHN-nin Qobustan Rayon Yanğından Mühafizə Xidmətinin əməkdaşı Rauf Əhmədov və digərləri 2,54 kilometr məsafə qət edərək məşəli Bayraq meydanına gətirdilər. Burada qurulmuş səhnədə kasa formalı məşəli karate üzrə üçqat Azərbaycan çempionu İbad Rzazadə alovlandırdı. Beləliklə, ölkəmizin daha bir bölgəsində I Avropa Oyunlarının məşəli şölələnməyə başladı. Rəmzi çırağı isə fəal məktəbli Gülər Cavadova qəbul etdi. Sonra çıraq Oyunlar başa çatanadək saxlanılmaq üçün məşqçi Şəmsi Səfərliyə təhvil verildi.

Bayram iştirakçılarının təəssüratı ilə maraqlandıq. Şəhər sakini Solmaz Mehralıyeva dedi: “ Çox sevinirəm ki, belə bir tarixi hadisənin mən də iştirakçısı oldum. I Avropa Oyunlarının məşəlinin rayonumuzda alovlandırılması hər bir qobustanlı üçün çox qürurvericidir. Unudulmaz tarixi anlar yaşadıq. Bu sevinci, bu bayramı bizə bəxş etdiyinə görə möhtərəm Prezident İlham Əliyevə dərin minnətdarlığımızı bildiririk”.

Abdulhəsən Ağayevin də ürəyi dolu idi: “Bayram bayrama qarışıb, 28 May Respublika Günü və I Avropa Oyunlarına ölkəmizin ev sahibliyi etməsi, məşəlin rayonumuzda alovlandırılması münasibətilə bütün qobustanlıları təbrik edirəm. İnanırıq ki, tezliklə bayramlarımızı işğaldan azad edilən torpaqlarımızda da qeyd edəcəyik. Bizim rayonumuzda da tanınmış idmançılar yetişir. Cəmi 19 yaşı olmasına baxmayaraq Dadaş Dadaşbəyli 2014-cü ildə ağır atletika üzrə Avropa ikincisi və yığmanın tərkibində Türkiyədə dünya çempionu olub. Bütün qobustanlılar onunla fəxr edir. I Avropa Oyunlarında iştirak edən idmançılarımıza da uğurlar arzu edirik. Bayrağımızı ucaldıb, himnimizi tez-tez səsləndirsinlər”.

Qobustandan sonra I Avropa Oyunlarının məşəli Şamaxı rayonuna yola salındı.

Azərbaycan. - 2015.- 31 may.- S.4.