Qubada Heydər Əliyev irsi öyrənilir

Qubada böyük maraq doğuran yer şəhərin girəcəyindəki Heydər Əliyev seyrəngahıdır. Müasir və milli ənənələrimizə uyğun inşa edilən park buraya gələnlərin ovqatına xüsusi rəng qatır. Rayonda aparılan tikinti-abadlıq işləri nəticəsində park tamamilə yenidən qurulub, yaraşıqlı istirahət və mədəniyyət mərkəzi yaradılıb.

Ümummilli liderin adını daşıyan parkda ümumi sahəsi 6500 kvadratmetr olan 4 mərtəbəli, yaraşıqlı Heydər Əliyev Mərkəzi Azərbaycan Prezidenti İlham Əliyevin xeyir-duası ilə fəaliyyətə başlayıb.

Mərkəz rayon əhalisinin və qonaqların ziyarət məkanına çevrilib. Burada Heydər Əliyevin həyat və fəaliyyətini, Azərbaycana rəhbərlik etdiyi illəri, ölkəmizin müxtəlif bölgələrinə səfərləri, o cümlədən Quba rayon ictimaiyyəti ilə görüşlərini əks etdirən fotoguşələr yer alıb. Ulu öndərin həyat və fəaliyyətinə həsr olunmuş filmlər nümayiş olunur. Foyedə iki virtual sinif otağı fəaliyyət göstərir. Ümummili liderin irsinin gənc nəsillərə çatdırılması və tədbirlərin keçirilməsi üçün mərkəzdə tədris sinifləri, 200 nəfərlik konfrans zalı, 2 dəyirmi masa zalı, sinxron tərcümə otağı, kitabxana fəaliyyət göstərir. Bundan əlavə, mərkəzdə 3 D kinozalı, kafe, xalça və rəsm studiyaları vardır.

Mərkəzdə iş iki istiqamətdə aparılır: birinci ekspozisiya vasitəsilə ulu öndərin həyat və fəaliyyətini əks etdirən eksponatlar, kino-video və fotosənədlər sərgilənir. Bu məqsədlə hazırda 7 bölmədən ibarət ekspozisiya nümayiş etdirilir. İkinci fəaliyyət istiqaməti isə ulu öndərin zəngin siyasi irsinin təbliği məqsədilə keçirilən elmi praktik konfranslar, dəyirmi masalar, viktorinalar, inşa yazı müsabiqələri, intellektual oyunlardır.

Azərbaycan Respublikasına işgüzar səfərə gələn xarici qonaqlar mərkəzdə olur, buradan xoş təəssüratla ayrılırlar. Rusiya, Belarus, Türkiyə, Uruqvay, Hindistan, Ukrayna, Almaniya, Bolqarıstan, Koreya və s. ölkələrdən gəlmiş nümayəndə heyətləri mərkəzi ziyarət etmişlər.

Qubalı gənclər arasında bir ənənə də yaşamaqdadır. Gənclər ailə həyatının başlanğıcı olan nikah mərasimlərini mərkəz fəaliyyətə başlayandan burada keçirilməsinə qərar vermişlər. Bu nikah mərasimləri də yaddaqalan olur.

Mərkəzin nəzdində ulu öndərin rayonda şəxsən görüşdüyü insanlardan, yerli ziyalılardan, müəllimlərdən və gənclərdən ibarət xüsusi tədqiqat qrupu da fəaliyyət göstərir.

I Avropa Oyunları ərəfəsində olan ölkəmizə artıq turist axını başlayıb. Əsrarəngiz təbiəti, flora və faunası ilə seçilən Quba həmişə turistlərin çox önəm verdikləri məkanlardandır. İdman arenalarından ayrılan qonaqlar səfalı Qubaya da təşrif buyuracaqlar. Buna qabaqcadan hazırlıq görülüb. Heydər Əliyev Mərkəzi bu möhtəşəm tədbirə artıq tam hazırdır. Yəni mərkəzdə müxtəlif dillərdə yayımlanacaq filmlərin kataloqu hazırlanıb. Ulu öndərin həyat və fəaliyyətini özündə əks etdirən kitablar sərgilənmək üçün xüsusi lövhələrdə yerləşdirilib. Heydər Əliyevin ömrünün müxtəlif anlarını canlandıracaq filmlərin xarici dillərə tərcümə edilən variantları gələn qonaqlara nümayiş etdiriləcəkdir.

Akif ƏLİYEV,

Azərbaycan. - 2015.- 31 may.- S.7.