Qərb bölgəsinin məktəbliləri Lənkəranda

“Ölkəmizi tanıyaq” layihəsi çərçivəsində təşkil edilmiş tur-aksiyanın iştirakçıları - Gəncə şəhərinin, Şəmkir, Göygöl, Samux, Gədəbəy, Qazax, Ağstafa və Tovuz rayonlarının IX-XI sinif şagirdləri və onların müəllimləri Lənkərana gəliblər.

AZƏRTAC xəbər verir ki, onları Lənkəran Şəhər İcra Hakimiyyətinin məsul işçiləri, müəllimlər və ictimaiyyətin nümayəndələri qarşılayıblar.

Məktəblilər əvvəlcə Heydər Əliyev Xatirə Parkında Azərbaycan xalqının ümummilli lideri Heydər Əliyevin abidəsini ziyarət ediblər. Sonra şəhərdəki Heydər Əliyev Mərkəzində böyük rəhbərin zəngin və mənalı ömür yolunu əks etdirən eksponatlar və fotoşəkillərlə tanış olublar.

Tur-aksiyanın iştirakçıları Lənkərandakı “Qafqaz Sahil”, “AB Qala”, “Palmalife” hotellərində yerləşiblər. Şam yeməyindən sonra onlar müxtəlif əyləncəli oyunlarda iştirak ediblər.

Noyabrın 17-də Gəncə şəhərindən, Göygöl, Şəmkir, Samux və Gədəbəy rayonlarından olan məktəblilər Lənkəranın, Qazax, Ağstafa və Tovuz rayonlarının şagirdləri isə Lerik və Astara rayonlarının tarix və mədəniyyət abidələri, muzeyləri, turizm infrastrukturu və sosial-iqtisadi inkişafı ilə yaxından tanış olacaqlar.

Azərbaycan.- 2015.- 18 noyabr.- S. 6.