İmamzadə ziyarətgahı simasını dəyişir

Ölkəmizin dövlət müstəqilliyini yenidən bərpa etməsi bir sıra taleyüklü problemlərin həlli ilə yanaşı, milli-mənəvi dəyərlərimizə, o cümlədən müqəddəs dinimizə münasibətin istiləşməsinə də müsbət təsirini göstərib. Ölkə rəhbərliyi tərəfindən bu məsələlər daim diqqətdə saxlanılıb.

Ümumilikdə isə ölkəmizin müxtəlif bölgələrində olan qədim məscidlərin, tarixi-memarlıq abidələrinin bərpası və yenidən qurulması ilə bağlı imzalanan çoxsaylı fərman və sərəncamlar milli-mədəni irsimizə qayğının bariz nümunəsinə çevrilib.

Dövlətin dəstəyi və hərtərəfli qayğısı ilə əhatə olunan belə məkanlardan biri də Gəncə şəhəri ərazisində yerləşən, xalqın inanc yerlərindən olan İmamzadə abidə-ziyarətgahıdır. Qədim şəhərin ən dəyərli maddi mədəniyyət nümunələrindən olan və mühüm dini əhəmiyyət kəsb edən “İmamzadə” türbəsinin Gəncə memarlıq üslubunda yenidən tikilməsi, bərpası və abadlaşdırılması məqsədilə Prezident İlham Əliyev sərəncamlar imzalayıb. Eyni zamanda, dövlət başçısı burada görülən işlərlə dəfələrlə tanış olub, müvafiq tapşırıq və tövsiyələrini verib. Ölkə Prezidentinin ayrı-ayrı tarixlərdə imzaladağı 6 sərəncam əsasında aparılan işlər davam edir.

Ziyarətgahda olduq. Öyrəndik ki, hazırda kompleksdə tamamlanma işləri aparılır. Artıq tikililərin üzlənməsi və daxili interyerdə bəzək-naxışlanma sona çatdırılıb. 2010-cu ildən əsaslı təmirinə başlanılan kompleksin yerləşdiyi 2,5 hektar ərazidə 36 kiçik və 5 böyük günbəzdən ibarət məscid, 200 kvadratmetr ərazisi olan qurbangah, 1000 nəfərlik ehsangah, mehmanxana və 500 avtomobillik 2 dayanacaq inşa edilib. İki salondan ibarət namazgahda nəfis xəttatlıq işləri görülüb və kaşı materialla örtülüb. Ərazidə müasir işıqlandırma sistemi qurulub. 10 min kvadratmetrdən çox asfalt örtüyü salınıb.Tikilinin həyəti kərpiclə hasara alınıb. 600 kvadratmetrlik ərazidə əsas giriş xüsusi layihə ilə hazırlanıb. Piyadaların rahat hərəkəti üçün 500 min paqonmetrdən çox səki daşları düzülüb. Digər işlər isə davam etdirilir.

İmamzadə kompleksi Gəncə şəhərinin və bütövlükdə ölkənin ən maraqlı dini-tarixi ziyarətgahıdır. Türbə isə kompleksin ən qiymətli abidəsidir. Burada beşinci İmam Məhəmməd Baqirin oğlu İbrahim dəfn olunub. Orta əsr Azərbaycan memarlığının dəyərli nümunələrindən olan İmamzadə piri Şərqin qədim karvan-ticarət yolunun üzərində yerləşib. İmamzadə əsrlərdən bəri Azərbaycanın müxtəlif bölgələrindən, eləcə də başqa ölkələrdən gələn müsəlmanların ziyarətgahına çevrilib. Bu dini abidə Gəncənin qədimliyini sübut etməklə yanaşı, şəhərin islam aləmindəki yerini və nüfuzunu da göstərir.

Hazırda şəhərdən İmamzadə ziyarətgahına gedən istiqamətdə yaşıllaşdırma işləri aparılır. Milli elementləri özündə birləşdirən qırmızı kərpiclə üzlənmiş divarların fonunda şam ağacları xoş bir mənzərə yaradır.

Gəncəçayın bu ərazidən keçən hissəsində çayın yatağı təmizlənərək qaydaya salınır. Məişət tullantılarından təmizlənmiş həmin ərazidə 5 mindən artıq şam ağacı əkilib. 27 metrə qədər genişləndirilmiş yol ən müasir işıqlandırma dirəklərinin qurulması ilə gecə vaxtlarında da ərazini çıraqban edəcəkdir.

Kompleksin təmiri ilə bağlı dövlət başçısının imzaladığı əlavə tədbirlər haqqında sərəncama uyğun olaraq “Zazalı-İmamzadə” kompleksi-Gəncə avtomobil yolunun inşasına da başlanılıb. Mövcud yolun asfalt örtüyü xüsusi texnikalar vasitəsilə 90 santimetr qalınlığında sıyrılaraq yenidən işlənir. Yol 7 metrdən 15 metrədək genişləndirilir. Bardür və işıq dirəkləri ilə ikiyə ayrılacaq yolun hərəkət hissəsi avtomobillərin sağ və sol istiqamətə getməsini asanlaşdıracaq.

Bundan əlavə, mövcud yaşayış massivlərində insanların təhlükəsizliyini təmin etmək üçün yolun sağ və sol hissəsinə səki daşları düzülür. Gəncə çayı üzərindəki körpünün təmirinə, eləcə də hərəkətin ikitərəfli təminatı üçün eni 7 metr olacaq yeni körpünün inşasına da başlanılıb. Hazırda yolun inşasına 40 texnika və 100 nəfərdən artıq canlı qüvvə cəlb edilib. Dekabrın sonuna kimi yolun 3,5 kilometrinin istifadəyə verilməsi nəzərdə tutulub.

Azərbaycan xalqının əsrlər boyu qoruyub saxladığı zəngin mədəni dəyərlərin müasir dövrdə təbliğinin böyük əhəmiyyətini nəzərə alaraq Gəncə Dövlət Tarix Mədəniyyət Qoruğunun ərazisindəki İmamzadə dini kompleksindən bəhs edən yeni bir kitab da çapa hazırlanır.

Bu dəyərli tarixi-memarlıq nümunəsi ölkəmizin qərb bölgəsində dini turizmin inkişaf etdirilməsi baxımından xüsusi əhəmiyyəti ilə seçilən abidələrdəndir.

Əli SƏLİMOV,

Azərbaycan.- 2015.- 22 noyabr.- S. 7.