Yunusbek Yevkurov: İnquşetiya ilə Azərbaycan energetika sahəsində, aqrar-sənaye kompleksində yaxşı əməkdaşlıq edirlər

İnquşetiya ilə Azərbaycan energetika sahəsində, aqrar-sənaye kompleksində yaxşı əməkdaşlıq edirlər, maraqlarımızın üst-üstə düşən nöqtələri var.

Bu fikri Yekaterinburqda VI Rusiya-Azərbaycan Regionlararası Forumunda iştirak edən İnquşetiya Respublikasının başçısı Yunusbek Yevkurov azərbaycanlı jurnalistlərə müsahibəsində səsləndirib.

İnquşetiyanın başçısı hesab edir ki, Azərbaycan ilə İnquşetiyanın əməkdaşlığı üçün yaxşı perspektivlər var. O deyib: “Mən nümayəndə heyətlərinin qarşılıqlı səfərlərinin tez-tez təşkil olunmasını təklif edirəm. Biz əməkdaşlıq şəraitində işləməliyik. İnquşetiyada beş mindən çox azərbaycanlı yaşayır. Azərbaycanın bir sıra iri sahibkarları İnquşetiyada biznesə sərmayə yatırmalıdırlar ki, həm özləri qazansınlar, həm də İnquşetiya Respublikasında yaşayan azərbaycanlıları iş yerləri ilə təmin edə bilsinlər. Biz gələcəkdə müxtəlif fəaliyyət sahələrini birgə inkişaf etdirə bilərik”.

AZƏRTAC

Azərbaycan.- 2015.- 2 oktyabr.- S. 6.