Azərbaycan alimləri Ufada keçirilən fəlsəfə konqresində iştirak ediblər

Oktyabrın 6-dan 10-dək Ufada “Fəlsəfə. Tolerantlıq. Qloballaşma. Şərq və Qərb - dünya baxışları dialoqu” mövzusunda növbəti, VII Rusiya fəlsəfə konqresi keçirilib. Bu tədbir üç ildə bir dəfə Rusiya regionlarının birində keçirilir.

Heydər Əliyev Fondunun RF-dəki nümayəndəliyinin dəstəyi ilə konqresin işində Azərbaycan alimləri - fəlsəfə elmləri doktoru, Rusiya Dövlət Sosial Universitetinin professoru İbrahim Məlikov və fəlsəfə doktoru, Rusiya Elmlər Akademiyası Rusiya Fəlsəfə Cəmiyyətinin beynəlxalq məsələlər üzrə vitse-prezidentinin müavini Ariz Gözəlov da iştirak edib.

Konqres çərçivəsində Azərbaycan alimləri konqresin açılışında iştirak edən Başkortostan Respublikasının Prezidenti Rüstəm Xamitova və Başkortostan Dövlət Universitetinin rektoru, professor Nikolay Morozkinə Heydər Əliyev Fondunun RF-dəki nümayəndəliyi adından xatirə hədiyyələri və “Əliyev qiraətləri”nin materiallarından ibarət kitablar təqdim ediblər.

Konqresdə Azərbaycan alimləri “Etnos fəlsəfəsi və millətlərarası münasibətlər mədəniyyəti” mövzusunda “dəyirmi masa”nın moderatorları qismində çıxış ediblər. Bu “dəyirmi masa” Heydər Əliyev Fondunun RF-dəki nümayəndəliyinin dəstəyi ilə vaxtaşırı keçirilən mədəniyyətlərin dialoquna dair konfransların bir növ məntiqi davamı olub.

A.Gözəlov “dəyirmi masa”da çıxış edərək mədəniyyətlərarası dialoq probleminin beynəlxalq münasibətlər üçün əhəmiyyətini vurğulayıb və konfrans iştirakçılarına “Əliyev qiraətləri” barədə məlumat verib. İ.Məlikov bu məqama diqqəti cəlb edib ki, millətlərarası münasibətlərdə tolerantlıqdan dialoq mədəniyyətinə keçmək lazımdır. “Dəyirmi masa”da Azərbaycan Milli Elmlər Akademiyasının Fəlsəfə və Hüquq İnstitutunun böyük elmi işçisi, fəlsəfə doktoru Rövşən Hacıyev çıxış edərək etnosa mədəni fenomen kimi baxmağın vacibliyini vurğulayıb.

Bundan əlavə, Azərbaycan alimləri Ümumrusiya Azərbaycanlılar Konqresinin Başkortostan regional bölməsi ilə birlikdə və şəxsən həmin bölmənin rəhbəri Mirzə Dadaşovun dəstəyi ilə “Mədəniyyətlərin dialoqu: sosial, siyasi və dəyər aspektləri” kitabının təqdimatını keçiriblər. Kitabda 2014-cü ilin dekabr ayında Heydər Əliyevin xatirəsinə həsr edilmiş Moskva forumunun materialları toplanıb. Təqdimatda Rusiya Fəlsəfə Cəmiyyətinin prezidenti, Rusiya EA akademiki Vyaçeslav Stepin, Rusiya EA Fəlsəfə İnstitutunun direktoru, Rusiya EA akademiki Abdusalam Hüseynov, Rusiya Fəlsəfə Cəmiyyətinin vitse-prezidenti, fəlsəfə elmləri doktoru, professor Aleksandr Çumakov və MDB ölkələrini təmsil edən digər görkəmli alimlər iştirak ediblər.

Fəridə ABDULLAYEVA,

AZƏRTAC-ın xüsusi müxbiri

Moskva

Azərbaycan.- 2015.- 13 oktyabr.- S. 11.