Beynəlxalq festivallar şəhərinə çevrilən Şəki inkişaf dövrünü yaşayır

Füsunkar təbiəti, nadir tarix-memarlıq abidələri, inkişaf etmiş sənətkarlığı, zəngin mədəni irsə malik olması və yüksək xidmət mədəniyyəti Şəkini turistlərə daha da doğmalaşdırır.

Şəkinin ərazisində 84 arxeoloji və memarlıq abidəsi var. Onlardan I-IV əsrlərə aid Kiş alban məbədi, XVIII əsrə aid Şəki Xan Sarayı dünya əhəmiyyətli abidələrdir. Hazırda şəhərin bir hissəsini əhatə edən “Yuxarı Baş” Tarix-Memarlıq Qoruğunun UNESCO-nun Ümumdünya Mədəni İrs Siyahısına daxil edilməsi istiqamətində iş aparılır.

Son illər Şəkidə turizm infrastrukturunun yaxşılaşdırılması sahəsində mühüm işlər görülür, müasir tipli istirahət mərkəzləri, yeni hotellər istifadəyə verilir. Şəki şəhərinə gələn turistlərin sayı ilbəil artır. Şəhər öz tarixi simasını qorumaqla müasir dövrün tələblərinə uyğun yeniləşir, abadlaşır.

Dövlət başçısı İlham Əliyevin 2011-2013-cü illərdə Şəkiyə 4 səfəri olmuş, 13 obyektin açılışında və təməlqoyma mərasimlərində iştirak etmişdir. Qısa müddətdə Şəkinin sosial-iqtisadi inkişafı ilə bağlı 6 sərəncam imzalanmışdır.

Son dörd il ərzində şəhərin prospekt və küçələrində, eləcə də yeni istifadəyə verilmiş xəstəxana kompleksinin qarşısında yollar genişləndirilmiş, asfalt-beton örtük salınmaqla yenidən qurulmuşdur. Yol kənarlarında on yeddi min metr uzunluğunda yeni arx və kanallar tikilmişdir. Şəhərdaxili yollarda 22 kilometr uzunluğunda asfaltlaşdırılma işləri aparılmışdır.

Azərbaycan Prezidentinin “Mirzə Fətəli Axundzadənin 200 illik yubileyinin keçirilməsi haqqında” sərəncamına uyğun olaraq böyük ədibin adını daşıyan mədəniyyət və istirahət parkında əsaslı təmir işləri aparılmışdır. Burada şəhər sakinlərinin istirahəti üçün hər cür şərait vardır. Ümumi sahəsi 7 hektar olan parkın 35 min kvadratmetr ərazisində yaşıllıq işləri görülmüş, müxtəlif dekorativ ağaclar və gül kolları əkilmişdir. Parkda uşaqların istirahəti üçün lazımi şərait yaradılmışdır. Sərəncama uyğun olaraq ədibin ev - muzeyinə gedən yolda, qala divarları qarşısındakı meydanda və onun ətrafında müasir işıqlandırma sistemi qurulmış, yeni yaşıllıq zolağı salınmışdır. M.F.Axundzadənin 200 illik yubileyinə həsr olunmuş tədbirlər çərçivəsində Prezident İlham Əliyevin tapşırığı əsasında inşa edilmiş “Yay teatrı”nın açılışı olmuşdur.

Ötən müddət ərzində “Aşağı Karvansaray” kompleksində təmir-bərpa, XVIII əsrə aid tarixi abidə olan “Şəki Xanlarının evi”ndə, Sabit Rəhman adına Şəki Dövlət Dram Teatrında əsaslı təmir və yenidənqurma işləri aparılmış, Qarabağ müharibəsi əlilləri və şəhid ailələri üçün 36 mənzilli, Dövlət Arxivinin Şəki filialı, şəhərdə qəza vəziyyətində olan yaşayış evlərindən köçürülən sakinlər üçün yeni 24 mənzilli yaşayış evi, əhalinin ən sıx yerləşdiyi yaşayış sahələrindən birində - “Əşirlər” məhəlləsində sakinlərin asudə vaxtlarının təşkili üçün tikilmiş yeni bina istifadəyə verilmişdir. Görkəmli gülüş ustası Lütfəli Abdullayevin büstü qoyulmuşdur.

Kiş kəndi ərazisində “Marxal” istirahət kompleksinin, Gənclər evinin, Şəki şəhərində şəhid ailələri və Qarabağ müharibəsi əlilləri üçün yeni 5 fərdi yaşayış evinin, Şəki şəhər Psixiatriya xəstəxanasının tikintisi davam etdirilir. Məhkəmə kompleksinin inşası isə başa çatmaq üzrədir.

Ötən dövrdə yol infrastrukturunun yaxşılaşdırılması istiqamətində önəmli işlər görülmüşdür. Şəki-Qax avtomobil yolunda tikinti işləri aparılmış, Aşağı Küngüt-Aydınbulaq avtomobil yolu yenidən tikilərək istifadəyə verilmişdir. Hazırda on səkkiz min nəfər əhalinin yaşadığı 3 yaşayış məntəqəsini birləşdirən, uzunluğu 17,1 kilometr olan Aşağı Göynük-Baş Göynük-Baş Şabalıd avtomobil yolu yenidən inşa edilir.

Dövlət başçısının kənd təsərrüfatının inkişaf etdirilməsi istiqamətində qarşıya qoyduğu əsas vəzifələrdən biri iri fermer təsərrüfatlarının yaradılması və ixrac məsələsidir. Rayonun Orta Zəyzid bələdiyyəsinə məxsus ərazidə sahibkarlar tərəfindən icarəyə götürülmüş 78 hektar ərazidə müasir texnologiyalar əsasında yeni Aqropark yaradılmışdır. Burada yüksək keyfiyyətli meyvə bağı salınmış, eyni zamanda məhsulun saxlanması, qablaşdırılması və emal olunması üçün işlər görülür. Əldə olunan məhsulun daxili bazarda satışı ilə yanaşı, həm də xaricə ixrac olunması nəzərdə tutulur. Ən müasir tələblərə cavab verən və meyvə məhsulları istehsalı, emalı üzrə ixtisaslaşacaq Aqroparkda 100-dən çox iş yerinin açılması nəzərdə tutulur.

Hazırda Şəkidə 18 sənaye müəssisəsi fəaliyyət göstərir. Burada regionun ən böyük sənaye müəssisələrindən olan - “Şəki-İpək” ASC də mövcuddur.

2014-cü ildə Şəkidə ən müasir texnologiyalar əsasında yeni yaradılan “Sünbül” çörək zavodunda ilkin məhsul istehsalına başlanmışdır. Tikintisinə 2013-cü ilin martında başlanan bu müəssisədə Çex Respublikası, Almaniya və İtaliyadan gətirilmiş ən müasir çörəkbişirmə avadanlıqları quraşdırılmışdır.

Şəki şəhərində təhsil müəssisələrinin tikintisi və təmiri, onların maddi-texniki bazasının gücləndirilməsi istiqamətində əsaslı işlər görülmüşdür. Belə ki, son beş ilə yaxın bir müddətdə Şəki Şəhər Təhsil Şöbəsinin yeni inzibati binası tikilərək istifadəyə verilmiş, 25-dən artıq məktəbin yeni binasının inşası və əsaslı təmiri aparılmışdır.

Hazırda Şəkinin Qoxmuq kəndində 840 şagird yerlik məktəb binasının tikintisi başa çatmaq üzrədir. 180 şagird yerlik Qaratorpaq kənd tam orta məktəbinin inşası isə davam edir. Şəki şəhər qarışıq tipli uşaq internat məktəbində əsaslı təmir işləri aparılır.

Son beş ildə Şəkidə 10-dan artıq uşaq bağçası əsaslı təmir edilmiş və ya yenidən tikilmişdir. Hazırda əhalinin daha sıx məskunlaşdığı ərazilərdə Heydər Əliyev Fondunun vəsaiti hesabına hər biri 100 yerlik 2 uşaq bağçasının tikintisi başa çatmaq üzrədir. Bunlarla yanaşı, şəhər 19 saylı uşaq bağçası əsaslı təmir edilir, 11 saylı bağçanın təmiri ilə bağlı layihələndirmə işləri yekunlaşmaqdadır.

Şəki şəhərində son illər səhiyyə müəssisələrinin maddi-texniki bazasının yaxşılaşdırılması, əhaliyə göstərilən tibbi xidmətin səviyyəsinin yüksəldilməsi sahəsində bir sıra işlər görülmüşdür. Dünya Bankı ilə Səhiyyə Nazirliyinin birgə həyata keçirdikləri “Səhiyyə sektorunda struktur islahatları” layihəsi çərçivəsində rayonun Aşağı Göynük kəndində sahə xəstəxanası, Baş Göynük kəndində isə həkim məntəqəsi inşa edilmişdir.

Şəki Rayon Mərkəzi Xəstəxanasının nəzdindəki doğum evinin bazasında Regional Perinatal Mərkəz yaradılmışdır. Doğum evi kompleksində əsaslı təmir, rayon mərkəzi xəstəxanasında yenidənqurma işləri aparılmışdır.

Hər il Şəkidə çoxlu sayda mədəni-kütləvi tədbirlər keçirilir, tarixi günlər, bayram tədbirləri yüksək səviyyədə qeyd olunur. Şəki Azərbaycanda Festivallar şəhəri kimi tanınır. 2014-cü ildə Şəkidə 4 beynəlxalq festival keçirilmiş, bu festivallara 20-yə yaxın xarici ölkədən 200 nəfərdən çox iştirakçı qatılmışdır. Bu il də Şəki 4 beynəlxalq festivalın keçirilməsi ilə yadda qaldı. Bu dəfə Azərbaycanda, eləcə də Qafqazda ilk dəfə olaraq Şəkidə “Nağara-2015” Beynəlxalq Zərb Alətləri Festivalı keçirilmişdir. Şəkidə “İpək Yolu” Beynəlxalq Musiqi Festivalının, Şirniyyat festivalının və Qafqaz motofestivalının keçirilməsi, həmçinin Şəhər gününün qeyd olunması ənənə halını almışdır.

Ölkəmizdə mədəni irsin qorunub saxlanmasına, xalqımıza xas olan zəngin mədəniyyətin təbliğ olunmasına daim böyük diqqət göstərilir. Prezident İlham Əliyevin, UNESCO-nun xoşməramlı səfiri Mehriban xanım Əliyevanın bu sahədə gördüyü işlərin əhəmiyyəti böyükdür. 2013-cü il avqust ayının 14-də Şəkiyə səfəri çərçivəsində dövlət başçısı Şəki şəhər ictimaiyyətinin nümayəndələri ilə görüşündə demişdir: “Şəki Azərbaycanda və deyə bilərəm ki, bölgədə və dünyada öz gözəlliyi ilə seçilən bir şəhərdir. Burada, əlbəttə, təbiət və memarlıq, qədim və tarixi binalar, Şəkinin şəhərsalma qaydaları gözəl bir mənzərə, vəhdət yaradır. Təsadüfi deyil ki, Şəkinin mədəniyyəti ilə maraqlananların sayı getdikcə artır. Həm daxili turizm artır, həm də xaricdən gələn qonaqların sayı. Azərbaycanın demək olar ki, bütün yerlərində Şəkiyə çox böyük maraq vardır. İstərdim ki, Azərbaycanın bütün vətəndaşları vaxt tapıb Şəkiyə səfər etsinlər. İndi şərait yaxşılaşır, yollar çəkilir və nəqliyyat vasitələri müasirləşdirilir. Ona görə də gələcəkdə daxili və xarici turizm inkişaf edəcəkdir. Biz gərək Şəkidə gələcəkdə beynəlxalq tədbirlərin sayını da artıraq”.

Əli SƏLİMOV,

Azərbaycan.- 2015.- 24 oktyabr.- S. 6.