Çexiya Prezidentinin xanımı “Kiçik Venesiya şəhərciyi”ndə olub

Çex Respublikası Prezidentinin xanımı İvana Zemanova sentyabrın 16-da Dənizkənarı Milli Parkda yerləşən “Kiçik Venesiya şəhərciyi”ndə olub.

AZƏRTAC xəbər verir ki, qonağa Dənizkənarı Milli Parkda aparılan abadlıq-quruculuq işləri nəticəsində əsaslı şəkildə yenidən qurulan “Kiçik Venesiya şəhərciyi” haqqında məlumat verilib. Bildirilib ki, 1960-cı illərdə salınan şəhərcik Dənizkənarı Milli Parka gələnlər üçün sevimli istirahət yeridir. Azərbaycan Prezidentinin tapşırıqlarına əsasən, şəhərcik ən müasir tələblər səviyyəsində yenidən qurulub. “Kiçik Venesiya şəhərciyi” əvvəlki görkəmi saxlanılmaqla yeni elementlərlə zənginləşdirilib, kanallar genişləndirilib, dərinləşdirilib və su keçidləri ilə birləşdirilib, buraya müasir qayıqlar gətirilib.

Xanım İvana Zemanova “Kiçik Venesiya şəhərciyi”nin ərazisi ilə yaxından tanış olub.

Diqqətə çatdırılıb ki, şəhərcikdə mənalı istirahət üçün hər cür şərait yaradılıb. Milli ornamentlərlə bəzədilmiş şəhərcikdə kanalların üzərində yeni körpülər inşa olunub. Burada su anbarı və sutəmizləyici sahə yaradılıb. Sutəmizləyici qurğuların köməyi ilə kanalların suyunun daim təmizlənməsi və həmişə şəffaf qalması təmin edilir. Şəhərcikdə yaradılmış müasir iaşə obyektlərində həm Qərb, həm də Şərq mətbəxinin ləziz nümunələri müştərilərə təqdim olunur. Kanallarda, körpülərdə və tuneldə quraşdırılan işıqlandırma sistemi axşam saatlarında şəhərciyin gözəlliyini daha da artırır.

Çex Respublikası Prezidentinin xanımı İvana Zemanova əsl Venesiyanı xatırladan, öz gözəlliyi ilə paytaxta xüsusi yaraşıq verən “Kiçik Venesiya şəhərciyi”dən xoş təəssüratlarla ayrılıb.

Azərbaycan.- 2015.- 17 sentyabr.- S. 2.