İstedad, iradə və zəhmət

Bəzən “jurnalistlik qadın sənəti deyil” deyirlər. Niyə ki? Əksinə, xalqın və cəmiyyətin həyatında qadın yazarların qələminin “boyuna biçilmiş” bir çox mövzular var. Elə söz var ki, həssas qadın qəlbindən keçib gəldiyi üçün daha təsirli olur. Söhbət milli-mənəvi dəyərlərimizdən, balalarımızın tərbiyəsindən, Vətən sevgisindən, torpaq təəssübkeşliyindən gedəndə ana səsi də ucalmalı - qadın-jurnalist də öz sözünü deməlidir. Kişi sözü kəsərlidirsə, qadının, ananın sözü də düşündürən, sirayətedəndir.

Amma nə qədər paradoksal olsa da, bəzən “jurnalistlik qadın sənəti deyil” deyənlərə haqq qazandırmaq istəyirsən. Çünki yaxşı jurnalist olmaq, ümumiyyətlə, çətindir. Üstəgəl, hər bir qadının üzərinə həyatda övlad böyütmək, evin istisini qorumaq kimi (şərəfli və xoş olsa da) ağır vəzifə düşür. Qısası, bir əldə qələm tutmaq, bir əllə isə beşik yırğalamaq heç kəsə asan gəlməsin.

Sözümüzün canı odur ki, bizim İradə xanım bütün bunlardan keçib - üzərinə düşən hər iki mühüm vəzifəni layiqincə yerinə yetirib və həyat, sənət yollarında beləcə də irəliləməkdədir.

Sentyabrın 21-i həmkarımız, “Azərbaycan” qəzetinin Humanitar siyasət şöbəsinin redaktoru, əməkdar jurnalist İradə Əliyevanın doğum günü - yubley tarixidir. Onunla uzun illərin yaxın tanışı, iş yoldaşı, qələm dostuyuq. Əsil-nəcabətli xanımdır. İkinci Dünya müharibəsində biri ön, digəri arxa cəbhədə şücaət göstərmiş iki mətin insanın - Əbdül Zeynalovun və Cəmilə xanımın ailəsində anadan olub. Atası bir sıra məsul vəzifələrdə çalışıb. Açığını deyim ki, sovet dövrünün ölçüləri ilə götürdükdə İradə xanım imkanlı ailədə böyüyüb. Amma buna baxmayaraq, həmişə zəhmətsevər olub. Bizdən iki kurs yuxarı təhsil alsa da, bunu hələ ADU-nun (indi BDU) Jurnalistika fakültəsində oxuduğumuz vaxtdan görmüşəm.

1977-ci ildə universiteti bitirib “Təşviqatçı” jurnalında əmək fəaliyyətinə başladı. Amma tezliklə ürəyinin hökmü ilə jurnalistikanın daha “qaynar” sahəsinə atıldı. Uzun illər “Azərbaycan müəllimi” qəzetində çalışdı. Bu qəzetdə peşəkar jurnalist kimi püxtələşdi, gələcək yaradıcılığının əsas mövzuları müəyyənləşdi. Azərbaycanın görkəmli alimləri, pedaqoqları, ziyalıları ilə həmsöhbət oldu.

O illəri də yaxşı xatırlayıram. Ayrı-ayrı qəzetlərdə çalışsaq da, müxtəlif ictimai, mədəni-kütləvi tədbirlərdə görüşərdik. Bu tədbirləri işıqlandırarkən İradənin ciddiliyini, dəqiqliyini həmkar olaraq yaxından hiss edirdim.

1993-cü ildən İradə Əliyeva jurnalist taleyini “Azərbaycan” qəzeti ilə bağlayıb. 1997-ci ildən şöbə redaktorudur. Elə buradaca demək yerinə düşər ki, İradə xanım ona etibar edilən vəzifəyə həmişə məsuliyyətlə yanaşan, tapşırılan iş üçün cavabdehlik daşıyan insandır.

“Azərbaycan” onun qarşısında daha geniş yaradıcılıq imkanları açıb. İradə xanım bu imkanlardan səmərəli istifadə edərək mövzularını şaxələndirib. Qəzet səhifəsinə maraqlı yazılar gətirdikcə, aktual məsələlərə toxunduqca özünün də peşəkarlığı artıb.

İradə Əliyevanın mövzu dairəsi genişdir. Burada elmin, təhsilin, səhiyyənin, mədəniyyətin uğurları, perspektivləri, həlli vacib məsələləri, görkəmli ziyalıların, alimlərin, ədəbiyyat və incəsənət xadimlərinin həyat yolu öz əksini tapır. Xeyli vaxtdır repressiya qurbanları, deportasiyaya, qaçqın-köçkünlüyə məruz qalmış insanlar haqqında acı tarixi həqiqətləri qələmə alır. Onun eləcə də müxtəlif sahələrdə çalışan, fəal həyat mövqeyi tutan Azərbaycan qadınları haqqında silsilə yazıları var.

Uzun illər ərzində gördükləri və müşahidə etdikləri, oxuyub öyrəndikləri, axtarıb tapdıqları və yazdıqları indi İradə xanımın yaradıcılıq “mətbəx”ində kitablara çevrilməkdədir. Oxucular onun yaxın vaxtlarda işıq üzü görəcək “Qırmızı terror... Repressiya burulğanı”, “Şəxsiyyətlər... Ömür və qələm”, “Qadınlarımız... Bənzərsiz dünyamız” kitabları ilə tanış olacaqlar.

Həftədə altı dəfə çıxan, illik səhifələrinin sayını tən böləndə isə az qala hər günün payına bir nömrəsi düşən rəsmi dövlət qəzetində zəhmət və qayğı dolu jurnalist həyatı yaşaya-yaşaya İradə xanım eyni zamanda bir cüt oğul ömrünün keşiyində dayanıb. Övladlarını layiqli vətəndaş kimi tərbiyə edib, boya-başa çatdırıb, böyük oğlunu evləndirib. İndi daşıdığı vəzifələrin biri də artıb, iki gözəl nəvənin nənəsidir.

İradə xanıma cansağlığı və xoşbəxtlik, yaradıcılıq uğurları arzulayan “Azərbaycan”çılar eləcə də onun ana qəlbinin ikinci oğul toyunun sədaları ilə öz mətləbinə çatmağını diləyirlər.

Flora SADIQLI,

Azərbaycan.- 2015.- 20 sentyabr.- S. 12.