Azərbaycan Milli Elmlər Akademiyası rəyasət heyətinin iclasında bir sıra mühüm məsələlər müzakirə edilib

Sentyabrın 23-də Azərbaycan Milli Elmlər Akademiyası (AMEA) rəyasət heyətinin növbəti iclası keçirilib.

AZƏRTAC xəbər verir ki, iclasda AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.

Sonra AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəylinin “Azərbaycan ədəbiyyatı tarixinin dövrləşdirilməsi konsepsiyası” mövzusunda məruzəsi dinlənilib. Alim bildirib ki, Sovet hakimiyyəti illərində Azərbaycan ədəbiyyatı tarixinin dövrləşdirilməsi zamanı əsasən hakim ideologiyanın insan cəmiyyətinin inkişaf mərhələləri haqqındakı siyasi-tarixi baxışlarına istinad edilib. XX əsr ədəbiyyatşünaslıq elmində Azərbaycan ədəbiyyatının altı mərhələdən ibarət dövrləşdirilməsi müəyyənləşdirilib. Lakin təklif olunan konsepsiyada çoxəsrlik Azərbaycan ədəbiyyatı tarixinin dövrləri yenidən müəyyənləşdirilib. Burada sivilizasiya amili, ədəbi-tarixi proseslərin reallıqları, Azərbaycanda ədəbi cərəyanlar və azərbaycançılıq məfkurəsi kimi prinsiplər nəzərə alınıb.

Məruzədə ədəbiyyat tarixinin dövrləşdirilməsi istiqamətində 10 mərhələ üzrə inkişaf proseslərinin xarakteristikası şərh edilib.

Məruzə ətrafında sonra geniş fikir mübadiləsi aparılıb, suallar cavablandırılıb. Rəyasət heyətinin qərarı ilə məruzə bəyənilib.

İclasda humanitar və ictimai elmlərə dair orta və ali məktəb dərsliklərinin hazırlanmasında akademik İsa Həbibbəylinin təklif etdiyi dövrləşdirilmə konsepsiyasından istifadənin nəzərə alınması barədə qərar təsdiqlənib. Həmçinin Ədəbiyyat İnstitutunda nəşrə hazırlanan “Azərbaycan ədəbiyyatı tarixi” oncildliyinin yazılmasında yeni konsepsiyaya istinad edilməsi, bundan əlavə “Azərbaycan tarixi”, “Azərbaycan incəsənəti tarixi”, “Azərbaycan fəlsəfə tarixi” və bu qəbildən olan başqa çoxcildliklərin hazırlanmasında vahid konsepsiyanın müəyyənləşdirilməsi barədə qərar qəbul olunub.

Tədbirdə AMEA-nın alimlərinin yubileyləri ilə əlaqədar həyata keçiriləcək tədbirlər müzakirə olunub.

Sonra Azərbaycan Respublikası Prezidentinin Sərəncamı ilə təsdiq edilmiş “Akademik Mikayıl Useynovun 110 illik yubileyinin keçirilməsi haqqında” Tədbirlər Planı müzakirədən sonra rəyasət heyətinin qərarı ilə təsdiqlənib. Sənədin icrasından irəli gələn məsələlərin həll edilməsi məqsədilə müvafiq strukturlara tapşırıqlar verilib.

İclasda bir sıra elmi-təşkilati və kadr məsələlərinə də baxılıb.

AZƏRTAC

Azərbaycan.- 2015.- 24 sentyabr.- S. 7.