Son vaxtlar ABŞ-ın Azərbaycana qərəzli münasibəti

ölkələrimizin strateji tərəfdaşlığının ruhuna uyğun deyil

Yanvarın 15-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası “ABŞ-da insan hüquqlarının vəziyyəti. Ölkənin xarici siyasətinin paradoksları” mövzusunda dinləmələr keçirib.

AzərTAc xəbər verir ki, dinləmələrdə Milli Məclisin deputatları, QHT-lərin, analitik mərkəzlərin, siyasi partiyaların rəhbərləri, ekspertlər iştirak ediblər.

Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev tədbirdə çıxış edərək dedi ki, son vaxtlar ABŞ-da bir sıra qurumlar tərəfindən Azərbaycanla bağlı qərəzli, heç bir əsasa söykənməyən bəyanatlar yayılır. Bu da ölkələrimiz arasında strateji tərəfdaşlıq əlaqələrinin ruhuna uyğun deyil. Azərbaycan yürütdüyü müstəqil daxili və xarici siyasətlə öz milli maraqlarını qorumaqda davam edir və edəcək. Bu cür əsassız təzyiqlər, ikili standartlar yolverilməzdir və ölkəmizin milli maraqlara söykənən müstəqil siyasətinə təsir göstərə bilməz. Bütün bu ədalətsizliklər Azərbaycan ictimaiyyətinin də haqlı narazılığına səbəb olur.

Sonra “ABŞ-da etnik, irqi və dini zəmində ayrı-seçkilik: ksenofobiya və islamafobiya təzahürlərinin güclənməsi”, “Cəmiyyət üzərində total nəzarət sistemi: şəxsi həyata müdaxilə, ifadə və mətbuat azadlığının məhdudlaşdırılması”, “Leqal korrupsiya və lobbiçilik ABŞ siyasi sisteminin əsas elementlərindən biri kimi”, “ABŞ-ın müstəqil siyasət yürüdən ölkələrə təzyiq vasitələri: insan hüquqları ilə manipulyasiya, rəngli inqilablar, hərbi müdaxilə və onların fəsadları”, “Ermənistan-Azərbaycan, Dağlıq Qarabağ münaqişəsi ilə bağlı ABŞ-ın mövqeyi: ikili standartlar siyasəti” mövzularında məruzələr dinlənildi.

Çıxış edənlər ABŞ-da etnik, dini, irqi zəmində insanların üzləşdikləri problemlərin artdığını, polisin dinc vətəndaşlara qarşı qeyri-adekvat güc tətbiq etdiyini bildirdilər. ABŞ-da ifadə, fikir, mətbuat azadlığının məhdudlaşdırılması, insanların şəxsi həyatına əsassız müdaxilə hallarının tarixən mövcud olduğu vurğulandı, bununla bağlı faktlar diqqətə çatdırıldı. Bildirildi ki, bu yaxınlarda ABŞ-da Jurnalistləri Müdafiə Komitəsi ölkədə jurnalistlərin normal fəaliyyəti üçün şərait yaradılması, onlara qarşı təcavüz hallarının qarşısının alınması ilə bağlı Prezident Barak Obamaya müraciət edib. ABŞ siyasətini tənqid edən xarici jurnalistlər təzyiqlərə məruz qalırlar.

Qeyd edildi ki, son vaxtlar Birləşmiş Ştatlar tərəfindən beynəlxalq hüquq normalarının pozulması artıq adi hala çevrilib. ABŞ bir çox ölkələrin müstəqil xarici siyasətinə müdaxilə etmək istəyir ki, bu da haqlı olaraq narazılıqla qarşılanır. Bir sıra ölkələrdə rəngli inqilabların həyata keçirilməsi, hakimiyyət çevrilişləri həmin ölkələrdə acınacaqlı vəziyyətin yaranmasına səbəb olub.

Diqqətə çatdırıldı ki, ATƏT-in Minsk qrupunun həmsədri olmasına baxmayaraq, rəsmi Vaşinqton Dağlıq Qarabağ münaqişəsinin həllində də ikili standartlar nümayiş etdirir, ədalətsiz 907-ci düzəliş hələ də ləğv edilməyib. İkili standartlar, əsassız təzyiqlər artıq beynəlxalq aləmdə Birləşmiş Ştatlara inamın azalmasına səbəb olub.

Qeyd edildi ki, Ermənistan tərəfindən Azərbaycana qarşı 30-dan artıq terror aktı törədilib, bir milyondan çox azərbaycanlı qaçqın və məcburi köçkünə çevrilib. ABŞ isə terroru dövlət siyasətinə çevirən Ermənistana qarşı heç bir təzyiq göstərmir. Birləşmiş Ştatların vətənə xəyanətdə təqsirləndirilən şəxslərlə bağlı bəyanat yayması, lakin Ermənistan tərəfindən hüquqları kobud şəkildə pozulan azərbaycanlılarla bağlı heç bir münasibət bildirməməsi ədalətsizlikdir.

Tədbir müzakirələrlə davam etdi.

Azərbaycan.-2015.- 16 yanvar.- S.4.