Azərbaycan-Yaponiya əlaqələri sürətlə inkişaf edir

Yanvarın 19-da Milli Məclisin Sədri Oqtay Əsədov Azərbaycanda səfərdə olan Yaponiya xarici işlər nazirinin müavini Minoru Kiuçinin başçılıq etdiyi nümayəndə heyəti ilə görüşüb. Görüşdə Azərbaycan-Yaponiya əlaqələri və inkişaf perspektivləri müzakirə olunub.

Milli Məclisin Sədri Oqtay Əsədov Yaponiya nümayəndə heyətinin Azərbaycana səfərini yüksək qiymətləndirib və qeyd edib ki, qarşılıqlı səfərlər ölkələrarası əlaqələrin inkişafına geniş töhfə verir. Xüsusən dövlət başçılarının müxtəlif vaxtlarda qarşılıqlı səfərləri iki ölkə arasındakı münasibətlərdə çox mühüm rol oynayır. Bundan başqa, iki ölkə parlamentində dostluq qrupları fəaliyyət göstərir. Bu qrupların da qarşılıqlı səfərləri ölkələrarası və parlamentlərarası əməkdaşlığın inkişafına təkan verir. Sədr Azərbaycan-Yaponiya əlaqələrinin hazırda çox sürətlə inkişaf etdiyini deyib. Bildirib ki, Azərbaycan Yaponiya ilə əlaqələrin gücləndirilməsinə böyük önəm verir. İqtisadi əlaqələrin dinamikası yüksələn xətlə davam edir və getdikcə ölkələr arasındakı hüquqi baza da gücləndirilir. Belə ki, iki ölkə arasında 17 sənəd imzalanıb, 22 sənəd isə baxılmaq ərəfəsindədir.

Sədr vurğulayıb ki, 1993-cü ildən bəri Yaponiya Yardım Fondundan Azərbaycana 1 milyarddan çox yardım ayrılıb. Sədr Azərbaycanın yerləşdiyi coğrafi məkan, ölkədə həyata keçirilən irimiqyaslı layihələr və s. barədə də qonaqları məlumatlandırıb. Bildirib ki, yaxın vaxtlarda istifadəyə veriləcək Bakı-Tbilisi-Qars yeni dəmir yolu xətti ildə 300 milyon ton yük daşıma qabiliyyətinə malik olacaq.

Azərbaycanın BMT Təhlükəsizlik Şurasına üzv seçilərkən Yaponiyanın ölkəmizi dəstəklədiyini xatırladan O.Əsədov Azərbaycanın da beynəlxalq təşkilatlar qarşısında Yaponiyanı dəstəkləməyə hazır olduğunu qeyd edib.

Görüşdə Ermənistan-Azərbaycan, Dağlıq Qarabağ münaqişəsi barədə qonaqlara məlumat verilib. Bildirilib ki, problemin həlli istiqamətlində Azərbaycan sülhün tərəfdarıdır və beynəlxalq təşkilatları bu məsələdə ədalətli olmağa səsləyir.

Yaponiya xarici işlər nazirinin müavini Minoru Kiuçi Azərbaycana səfərlərindən məmnun qaldıqlarını bildirib. O, Azərbaycanın Cənubi Qavqazdakı lider mövqeyini, Avropada və beynəlxalq təşkilatlardakı rolunu yüksək qiymətləndirib. Qeyd edib ki, Yaponiya Azərbaycanla təkcə iqtisadi yox, təhsil, səhiyyə, mədəniyyət və s. sahələrdə də əlaqələrin inkişafına xüsusi önəm verir. Azərbaycana gəlişlərinin əsas səbəbi də qarşılıqlı əlaqələri daha da möhkəmləndirməkdir.

Görüşdə qonaqları maraqlandıran bir sıra məsələlər barədə də fikir mübadiləsi aparılıb.

Elgün MƏNSİMOV,

Azərbaycan.-2015.- 20 yanvar.- S.1.