İƏT Pİ-də Müsəlman Qadın Parlamentarilərinin IV Forumu keçirilib

Bu günlərdə İstanbulda İslam Əməkdaşlıq Təşkilatının Parlament İttifaqı çərçivəsində Müsəlman Qadın Parlamentarilərinin IV Forumu keçirilib. Forumda İƏT Pİ-də təmsil olunan 57 ölkənin əksəriyyətindən qadın parlamentarilər iştirak edib. Tədbirdə ölkəmizi Milli Məclisin deputatı, İƏT Pİ-də parlament nümayəndə heyətinin rəhbəri, AMEA-nın müxbir üzvü Gövhər Baxşəliyeva təmsil edib.

Forumda ilk çıxış edən İƏT Pİ baş katibi Mahmud Erol Kılıc müsəlman aləmində baş verən proseslər və bu proseslərdə qadınların rolu, qadınların hüquqlarının qorunması, ailə və uşaq, qadına qarşı zorakılıqla mübarizə və sair müasir dünya üçün böyük aktuallıq kəsb edən məsələlərdən danışıb. Azərbaycan nümayəndə heyətinin rəhbəri Gövhər Baxşəliyeva ölkəmizdə dövlət səviyyəsində ailə, qadın və uşaq siyasətindən, qadın hüquqlarından, ölkəmizdə qadınların inkişafı üçün yaradılmış hərtərəfli şəraitdən bəhs edib. Bununla belə, G.Baxşəliyeva Azərbaycan qadınlarının böyük bir qisminin iyirmi ildən artıqdır ki, erməni işğalından əziyyət çəkdiyini, ata-baba torpaqlarını tərk etdiyini, qaçqın-köçkün vəziyyətində yaşadığını, müharibənin gətirdiyi bütün fəlakətləri üzərində yaşadığını forum iştirakçılarının nəzərinə çatdırıb və Ermənistan-Azərbaycan, Dağlıq Qarabağ münaqişəsinin bütövlükdə xalqımıza gətirdiyi bəlalardan danışıb. O, bügünəcən BMT-nin məlum 4 qətnaməsinin və digər beynəlxalq təşkilatların Azərbaycan torpaqlarının işğalı ilə bağlı qərarların icra olunmadığını qeyd edib. “Ermənistan sadəcə olaraq danışıqlar prosesində imitasiya taktikasını seçmişdir. O sülh istəmir. İşğal edilmiş torpaqlardan çıxmaq istəmir. İşğalçı dövlətə təzyiq göstərilməlidir. O məcbur edilməlidir ki, işğala məruz qoyduğu torpaqlardan çıxsın. Nə üçün başqa yerlərdə qəbul edilmiş qətnamələr dərhal icra edilir, bizə gəldikdə icra edilmir?! Bu, ədalətsizlikdir, ikili standartlardır. Artıq Azərbaycan xalqı bunu yaxşı bilir, dərk edir ki, bu problemin həll olunmaması təkcə Ermənistanın qeyri-konstruktiv mövqeyi ilə izah edilə bilməz. Görünür, dünyada elə qüvvələr var ki, bu münaqişənin həll olunmasında maraqlı deyillər” - deyən G.Baxşəliyeva vurğulayıb ki, Azərbaycan torpaqlarının işğal altında qalması sadəcə olaraq Ermənistanın işi deyil. Ermənistan aciz durumda olan bir ölkədir. Əlbəttə, əgər onun böyük havadarları olmasaydı, Dağlıq Qarabağ münaqişəsi çoxdan ədalətli şəkildə öz həllini tapardı. Xarici dəstək olmadan Ermənistan işğal etdiyi əraziləri bir gün də işğal altında saxlaya bilməzdi.

Azərbaycanın demokratiyanın inkişafına, insan haqlarının qorunmasına, ədalətin bərqərar olmasına çox böyük və dəyərli töhfələr verməsini diqqətə çatdıran G.Baxşəliyeva ölkəmizin multikulturalizmlə bağlı təcrübəsindən danışıb. Beynəlxalq münasibətlərdə ikili standartların mövcudluğunu qeyd edən nümayəndə heyətinin rəhbəri bunun heç kimə xeyir gətirmədiyini deyib: “Ölkələrin daxili işlərinə qarışmaq onlarda sabitliyi pozur, qanlı toqquşmalara gətirib çıxarır və bu qanlı toqquşmaların arxasında dayanan qüvvələrə də nəticə etibarilə mənfi təsir göstərir. Çünki bu gün dünyada bütün ölkələr, demək olar ki, bir-birinə bağlıdır və istənilən yerdə baş verən hadisə nə vaxtsa başqa yerdə də öz əks-sədasını verir.”

Forumun yekunu olaraq 8 bənddən ibarət qətnamə qəbul edilib. Qətnamədə qadınların müharibə və qarşıdurmaların faciəvi nəticələrindən ən çox zərər çəkənlər olmasını nəzərə alaraq, lokal və regional xarakterli münaqişə və qarşıdurmaların həllində qadınların iştirakına və bacarıqlarından istifadəyə çağırış və İslam dünyasının münaqişə bölgələrində müsəlman qadınların və uşaqların himayəsi, yaşadıqları cəmiyyətlərdə çəkdikləri əzab-əziyyətləri yüngülləşdirmək üçün onlara maddi, mənəvi kömək göstərilməsi, onları qaçqın düşərgələrində ziyarət etmək barədə məsələlər maddələrdə yer alıb.

R.BAXŞƏLİYEV,

Azərbaycan.-2015.- 28 yanvar.- S.7.