İlham ƏLİYEV: “Sizin kimi övladlar vətənin şöhrətini ucaldırlar”

Ali Baş Komandan daim əsgərinin yanındadır

İşğal etdikləri torpaqlarımızı nəzarətdə saxlamaq iddialarından əl çəkmək istəməyən ermənilər bir neçə gün əvvəl növbəti silahlı təxribat törətdilər. Hərbi mövqelərimizə hücum etdilər, kəndləri, bu kəndlərin dinc sakinlərini atəşə tutdular. Bundan bir az əvvəl Azərbaycan-Ermənistan sərhədində - Qazax rayonu istiqamətində təxribat törətmişdilər. Orada da hərbçilərimiz şəhid olmuşdu. Bu ayın ilk günlərindən isə təmas xəttində vəhşiliklərini davam etdirdilər. Bütün beynəlxalq hüquq normalarını və insanlıq qanunlarını pozaraq mülki əhaliyə top və qumbaraatanlardan atəş açdılar.

İstər-istəməz bir atalar sözü yada düşür: “İlanın başı ağrıyanda yol üstünə çıxar”. Yerində dinc yatmayanda, sürünə-sürünə gəlib kiminsə yolunu kəsəndə isə onun müqəddəratının necə olması məlumdur. Təbii ki, vurub başını əzirlər. İşğalçı ermənilərin başı kimi...

“Azərbaycan Ordusu bu dəfə də düşmənə yerini göstərdi, onu yerinə oturtdu. Bu gün də biz tam üstünlüyü əldə etmişik.” Azərbaycan Prezidentinin, Ali Baş Komandan İlham Əliyevin bu sözlərinin arxasında necə böyük şücaətin, mərdliyin, vətənpərvərlik nümunəsinin, torpaq sevgisinin dayandığını bütün dünya gördü. Azərbaycan oğlunun, Azərbaycan əsgərinin öz sərkərdəsinin əmri, dəstəyi və rəhbərliyi ilə nəyə qadir olduğu çox qısa bir zaman kəsiyində meydanda bir daha tam dolğunluğu ilə təsdiqləndi.

Oğul Vətən üçün, torpağını qorumaq üçün doğulur. Bu məslək uğrunda ölümü hər igid özünə şərəf və səadət sayır. Yeni qəhrəmanlıq dastanı yazan Azərbaycan oğlu son günlərdə ata-babalarının bu müqəddəs ənənəsinə sadiq olduğunu sübut etdi.

Amma son günlərdə bir daha təsdiqlənən, dönə-dönə sübuta yetirilən yalnız bu deyildi. Azərbaycan xalqının öz Prezidentinə sədaqəti, Azərbaycan əsgərinin Ali Baş Komandanına ehtiramı idi. Prezident İlham Əliyevin insanlara qayğısı, döyüşçülərə inamı idi.

Bu günlərdə xalqla Prezidentin birliyi, bir-birinə sədaqəti, sevgisi, bir-birini qarşılıqlı surətdə başa düşməsi, dəyərləndirməsi, qiymətləndirməsi hamıya bir daha bəlli oldu. Son hadisələr onların bir istiqamətdə getməsi, eyni arzu və məqsədlə yaşamasının əsl nümayişinə çevrildi.

Bu dar macalda dövlət başçısı, Ali Baş Komandan dərhal vaxt tapıb hospitala gəldi. Torpaq uğrunda qan axıtmış yaralı döyüşçülərin ayrı-ayrılıqda hər birinin vəziyyətini soruşdu. Hər birinin şücaətini ayrıca dəyərləndirdi. Hamısına şəfa dilədi, tezliklə sağalmalarını arzuladı. Hamısına minnətdarlığını, təşəkkürünü bildirdi.

Dövlət başçısının bu xeyirxahlığı həm də milli-mənəvi dəyərlərimizin bir təntənəsi idi. Xəstəyə baş çəkmək, onun halını xəbər almaq, həkimləri ilə söhbət edib vəziyyətinin necə olduğunu öyrənmək əsl azərbaycanlıya məxsus xüsusiyyətdir, ən yaxşı adət-ənənələrimizdən biridir.

Bu da böyüklüyün, vətənpərvərliyin, insansevərliyin daha bir parlaq nümunəsi! Kim bilir, başqa bir dövlət başçısı bəlkə də fikirləşərdi ki, əsgərdir də, öz borcunu yerinə yetirib... Bizim Prezidentimiz isə torpağını müdafiə edənlərə belə deyir: “Sizə minnətdarlığımı bildirmək istəyirəm. Vətən uğrunda, torpaq uğrunda qəhrəmancasına vuruşmusunuz. Vətəni, ərazi bütövlüyümüzü qorumusunuz. Azərbaycan xalqı sizinlə fəxr edir. Döyüşlərdə yaralanmısınız, ancaq qələbə qazanmısınız... Azərbaycan Ordusu, Azərbaycan əsgəri, zabiti böyük işlərə qadirdir, qəhrəmandır. Ərazi bütövlüyümüzün bərpası hər bir Azərbaycan vətəndaşının müqəddəs borcudur. Sizin kimi övladlar Vətənin şöhrətini ucaldıblar”.

Belə böyük qayğı, isti münasibət, layiqli dəyər əsgərin yarasına ən yaxşı məlhəmdir.

Çarpayıda uzanıb canı ağrıyan əsgərin üzünün gülməsi, eyninin açılması bax, bu nəciblikdən qaynaqlanır. Əməliyyat olunan, müalicəsi hələ davam edən, lakin yenidən Vətənin müdafiəsinə hazırlaşan əsgərin: “Bizim torpaqlarımızın bir qarışı da düşmən tapdağında qalmamalıdır! Öldü var, döndü yoxdur!” qətiyyəti də bir tərəfdən öz vətənpərvərliyindən irəli gəlirsə, digər tərəfdən Prezidentinə, Ali Baş Komandanına arxalanmasından, onun güc və qüdrətinə inamından yaranır.

Və istər-istəməz son günlərdə döyüş meydanında yoldaşları, komandirləri tərəfindən atılıb qalan hörmətsiz-urvatsız erməni yaralıları yada düşür. Çirkin əməllərlə qədəm basdıqları torpaqda ucuz ölümə məhkum olurlar. Bəlkə bu da həyatın bir qanunauyğunluğudur.

Erməni əsgərinin başını aldadıb onu işğalçıya, cinayətkara çevirən Ermənistan rəhbərliyi onun heç meyitinə də yiyə durmur...

Azərbaycan əsgərinin əməli saf, işi haqq olduğu kimi, ölümü də şərəflidir. Bu günlərdə şəhidlik zirvəsinə yüksəlmiş oğullarımızın hər biri son mənzilə göstərdiyi igidliyə layiq - şərəflə, şan-şöhrətlə yola salındı. Müsəlman adət-ənənəsi ilə, hərbi hörmət-ehtiramla, xalqın sevgi-rəğbəti ilə...

Azərbaycan Prezidenti bu ağrılı-qürurlu günlərdə şəhidlərin doğmalarını da unutmadı. Dərhal şəhid ailələrinin üzvləri ilə, yaralıların doğmaları ilə də görüşdü. Əzizini itirənlərə başsağlığı, təsəlli, yaxın adamı yaralananlara ürək-dirək verdi. Bir sözlə, həmişəki kimi yenə də xalqla, insanlarla birlikdə oldu. Hər bir Azərbaycan vətəndaşının Prezidenti olduğunu bir daha təsdiqlədi.

...Bu görüşlərdən çəkilmiş kadrların biri xüsusilə diqqəti cəlb edir: Prezident qucağına bir oğlan uşağı götürüb. İtirdiklərimizin əvəzi böyüyür, deməli. Yəqin ki, bu körpə şəhidlərimizin hansınınsa balası, yaxud doğmasıdır. Onu bağrına basması Prezidentimizin daha bir böyüklüyünü göstərir.

Bu nəcib hərəkət: “Əzizlərini itirənlər tək deyil” - deyir. Göstərir ki, onlar dövlətin, dövlət başçısının köməyinə, qayğısına arxalana bilərlər. Azərbaycan Prezidenti və xalqı həmişəki kimi, yenə də birlikdədirlər. Qələbəmiz də, kədərimiz də, sevincimiz də birdir!

Flora SADIQLI,

Azərbaycan.- 2016.- 8 aprel.- S.1.