Bu qan yerdə qalmayacaq

Şulan Bayram oğlu Bayramov “N” saylı hərbi hissənin əsgəri idi. Bir neçə gündən sonra tərxis olunacaqdı. Lakin erməni təxribatına qarşı gedən döyüşlərdə düşmən gülləsinə tuş gəldi.

Dünən Sumqayıtda onun vida mərasimi keçirildi. 13-cü mikrorayonda yaşadığı evin hər tərəfi insan axını ilə dolu idi. “Yaşasın Azərbaycan!”, “Şəhidlər ölməz, Vətən bölünməz!”, “Keç səngəri, Azərbaycan əsgəri!”, “Vətən sənlə qürrələnir, şəhid övlad!” şüarları dalğa-dalğa ətrafa yayılırdı.

Əvvəlcə şəhidin əmisi Akif Bayramova yaxınlaşdıq. Göz yaşlarını silib dedi:

- Şulan 1996-cı ildə anadan olub. Özümüz əslən Qərbi Azərbaycandanıq. Bəlkə də Şulan buna görə yaşlı insanlardan eşitdiyi sözləri tez-tez işlədib deyərdi ki, ermənilər həmişə bizdən qorxublar. Vaxt gələr, onların bizim torpaqlarımızda izi-tozu qalmaz. Mən də bu fikirdəyəm. İndi buna daha çox əminəm. Bu qan yerdə qalmayacaq.

SOCAR “Azərkimya” İstehsalat Birliyinin mühəndisi Həmid Quliyev söhbətə qoşuldu:

- Mən keçmiş hərbçiyəm. Lazım gələrsə, mən və mənim kimi minlərlə gənc cəbhəyə getməyə hazırıq. Müharibəyə gəldikdə, hamı bilir ki, o, qurbansız olmur. Təsəllimiz ondadır ki, apardığımız mübarizə ərazilərimizin azad olması ilə bitəcək. Çünki bizim işimiz haqq işidir. Biz bu borcu yerinə yetirməliyik. Şulan öz borcunu şərəflə yerinə yetirdi.

Bir qədər sonra şəhidin cənazəsi alqış sədaları altında Şəhidlər xiyabanına dəfn olunmaq üçün yola salındı. Şəhidlər xiyabanında din xadimlərinin duaları altında torpağa tapşırıldı. Yaylım atəşi açıldı. Məzar başına toplaşanlar Dövlət himnimizi oxudular.

Akif ƏLİYEV

Azərbaycan.- 2016.- 8 aprel.- S.5.