Azərbaycan multikulturalizmi dünya modelləri arasında xüsusi yer tutur

Dekabrın 14-də Azərbaycan Turizm və Menecment Universitetində (ATMU) “Multikultural dəyərlər və dadlar” mövzusunda tədbir keçirilib.

AZƏRTAC xəbər verir ki, Bakı Turizm Peşə Məktəbinin direktoru Neylüfər Kərimova məktəbin fəaliyyəti və gələcək planları barədə məlumat verib. Peşə məktəbinin yaradılmasının məqsədinin peşəkar kadrların yetişdirilməsi və turizm sektorunun inkişafı olduğu, bu il peşə məktəbinə 500 şagirdin qəbul edildiyi bildirilib.

Tədbiri multikulturalizm dəyərlərimizin təbliği istiqamətində atılan addım kimi dəyərləndirən mədəniyyət və turizm naziri Əbülfəs Qarayev multikulturalizmin dinindən, irqindən asılı olmayaraq fərqli düşüncələrə, inanclara sahib müxtəlif mədəniyyətlərin bir yerdə, eyni dövlətdə sülh şəraitində yaşaması demək olduğunu vurğulayıb. Azərbaycan multikulturalizminin dünya modelləri arasında xüsusi yer tutduğunu söyləyən nazir ölkəmizdə multikulturalizmin siyasi, mədəni, ədəbi qaynaqlarının çox zəngin olduğunu bildirib.

ATMU-nun rektoru səlahiyyətlərini icra edən Eldar Aslanov Prezident İlham Əliyevin 2016-cı ili Azərbaycanda “Multikulturalizm ili” elan etməsinin səbəbsiz olmadığını qeyd edib. Bildirilib ki, qədim və zəngin tarixə malik ölkəmiz mədəniyyətlərin, dinlərin qovuşduğu məkan olmaqla yanaşı, dinlərarası və sivilizasiyalararası münasibətlərin formalaşması istiqamətində özünün nümunəvi modeli ilə tanınır.

Azərbaycan.- 2016.- 15 dekabr.- S.7.