Prezidentin qayğısı uğurların zəminidir

“AAAF Park” müasir şəhərsalma prosesində milli brendə çevrilib

Azərbaycanın geridə qoyduğumuz 25 illik müstəqillik tarixi möhtəşəm uğurlarla əlamətdardır. Ümummilli lider Heydər Əliyevin başlatdığı və Prezident İlham Əliyevin davam etdirdiyi uğurlu siyasi kurs nəticəsində bu dövrdə Azərbaycanda yeni dövrün tələblərinə uyğun iqtisadiyyat formalaşıb. Ölkəmizin inkişafı və təhlükəsizliyi təmin olunmaqla yanaşı, dünya birliyindəki mövqeləri də davamlı şəkildə möhkəmlənib.

Təsisçisi olduğum “AAAF-Holdinq”in yaradılması da ölkədə həyata keçirilən uğurlu siyasətin, sahibkarlıq fəaliyyəti üçün əlverişli mühitin nəticəsidir. Prezident İlham Əliyevin ölkəyə rəhbərliyinin ilk günlərindən başlayaraq özəl sektorun, xüsusən qeyri-neft sahəsinin inkişafı istiqamətində başladığı islahatlar, regionların, qeyri-neft sektorunun davamlı və tarazlı inkişafında sahibkarların rolunu xüsusi önə çəkməsi məni də bu sahədə fəaliyyətə ruhlandırdı.

Həyata keçirdiyimiz ən mühüm və uğurlu layihələrdən biri Xırdalan şəhərindəki “AAAF Park Yaşayış Kompleksi”dir. Bu layihə 36 hektar ərazidə yaşayış kompleksindən - 12 min mənzildən ibarətdir. Kompleksin ərazisinin 12 hektarında park, digər hissəsində isə yaşayış binaları yerləşir. Artıq burada bir neçə ildir ki, müxtəlif idman zalları, lisey, əyləncə yerləri, mağazalar fəaliyyət göstərir. Həmçinin 3,5,7,9,12 və 17 mərtəbəli yaşayış binaları, villalar inşa olunub. Layihənin artıq 90-95 faizi yekunlaşıb.

Göründüyü kimi, qısaca olaraq

“AAAF Park” adlandırdığımız bu layihə çoxfunksiyalıdır. Çünki layihə müasir yaşayış binalarının, ailəvi istirahət və uşaq əyləncə mərkəzlərinin, idman komplekslərinin birgə harmoniyasından ibarətdir. Ərazidə uşaq bağçasının, liseyin, tibb mərkəzinin və digər sosial infrastruktur obyektlərinin fəaliyyət göstərməsi “AAAF Park”ı ən modern bir yaşayış kompleksi kimi təqdim etməyə imkan verir. Bu mənada “AAAF Park” müasir standartlara cavab verən, modern, təkrarolunmaz layihədir. Sağlam həyat tərzi ilə adi həyatın ideal sintezinin yaradıldığı bu məkan kiçik bir şəhərdə olan bütün yaşayış imkanlarını özündə ehtiva edir.

Burada salınmış parkda sakinlərin rahat istirahəti üçün hər cür şərait yaradılıb. Kompleksin əsas devizi “Sağlamlığa xidmət” olduğundan istirahət parkında siqaret çəkmək yasaqdır. Kafe və restoranlarda isə müştərilərə alkoqollu içkilər satılmır. Parkda uşaqların əylənmək imkanları da kifayət qədər genişdir. “Limuland” Uşaq-Əyləncə Mərkəzində, çoxsaylı attraksionlarda, buz meydançasında, kinozalında uşaqlar əsl əyləncənin dadını çıxara bilərlər. “Günəş çarxı” Xırdalan şəhərini yüksəklikdən izləmək, xoş anlar yaşamaq imkanı verir. Park ərazisində dünyanın tanınmış geyim firmalarının məhsullarının satıldığı mağazalar insanlara uzağa getmədən alış-veriş etməyə imkan verir. “Sağlam ailə” tibb mərkəzi, qadın gözəllik salonu, bərbərxana, aptek, Bakıda fəaliyyət göstərən marketlər şəbəkəsinin bir mağazası, 24 saat fəaliyyət göstərən avtopark qonaqların və sakinlərin xidmətindədir.

Xırdalandakı digər layihəmiz isə şəhərin ərazisində yerləşən “Gənclər şəhərciyi”dir. 12 hektar ərazidə salınan şəhərcik 33 binadan ibarət olacaq. Ərazidə bütün ictimai-iaşə obyektləri olan park salınacaq. Bu bizim Abşeronda həyata keçirəcəyimiz ikinci layihədir. Layihənin əsas hədəfi isə gənclərin mənzil təminatı, həmçinin onların məşğulluğu olacaq. Yaxın vaxtlarda binaların tikintisi yekunlaşacaq, mənzillərin satışına başlanılacaq.

“AAAF Park Yaşayış Kompleksi” Astarada da salınır. Burada inşa olunan dəniz kənarı bulvara bitişik olan bu kompleksdə bütün növ xidmətlər mövcud olacaq. 20 hektar ərazidə inşa olunan “AAAF Park Astara”da süni şəlalələr, “Limuland” açıq və qapalı uşaq əyləncə mərkəzi, açıq fitnes meydançası, kafe-çay evi, “Zirvə” Uşaq İdman Akademiyası, uşaq əyləncə attraksionları, “Astara Towers”, 5 ulduzlu “Tuado” HOTELI, hovuz və SPA mərkəzi, çimərlik kompleksi, ağır atletika, boks və taekvondo mərkəzləri, villalar, 4 və 5 mərtəbəli binalar nəzərdə tutulur.

Azərbaycan Prezidenti İlham Əliyev ötən ilin aprelində Astaraya səfəri zamanı “AAAF Park Astara” layihəsi ilə də tanış oldu. Dövlət başçısına kompleksdə bütün növ xidmətlərin olması barədə məlumat verildi. Bildirildi ki, bu layihə bölgələrin daha da gözəlləşməsinə, regionların simasına yeni elementlərin əlavə edilməsinə dəstək məqsədi güdür. Ölkə başçısı layihədən razılığını qeyd edərək, görülən və görüləcək işlərdən məmnunluğunu bildirdi və tövsiyələrini verdi.

Onu da xatırladım ki, “AAAF-Holdinq” noyabr ayında Bakı Ekspo Mərkəzində Azərbaycan Beynəlxalq Daşınmaz Əmlak və İnvestisiya sərgisində təmsil olunmuşdu. Biz sərgidə bütün layihələrimizi təqdim etdik. Sərgi iştirakçıları “AAAF Park” Xırdalan və Astara, həmçinin “Gənclər şəhərciyi” layihələrimizlə yaxından tanış olmaq imkanı qazandılar. Bütün layihələrimiz xüsusi maraqla qarşılandı. Noyabrın 23-də Prezident İlham Əliyev və Mehriban xanım Əliyeva da sərgiyə gəlmişdilər. Bizim üçün olduqca xoş oldu ki, dövlət başçısı və xanımı “AAAF-Holdinq”in stendi ilə də maraqlandılar. Cənab Prezident layihələrimizi bəyəndi, xeyir-dualarını və gələcəkdə tikinti işlərimizi daha da genişləndirməklə bağlı tövsiyələrini verdi. Prezident İlham Əliyevin fəaliyyətimizə verdiyi yüksək qiymət təbii ki, bizi yeni tikinti layihələrinə sövq edir. Ona görə çalışacağıq ki, hər il yeni tikinti layihəsinə başlayaq.

Bəli, “AAAF Park” layihələri həm Azərbaycanın tikinti sektorunda, həm də ümumən müasir şəhərsalmada bir brendə çevrilib. Təsadüfi deyil ki, “AAAF Park” “Consulting&Business” jurnalı tərəfindən hər il təqdim olunan “Uğur” milli mükafatına bir neçə dəfə layiq görülüb. Sonuncu dəfə - bu il dekabrın 20-də “AAAF Holdinq” regionların inkişafına verdiyi dəstəyə görə “İlin Holdinqi” nominasiyası üzrə “Uğur” mükafatı ilə təltif edildi.

“AAAF Park”da hər kəs üçün əlçatan ipoteka şərtləri ilə mənzil sahibi olmaq mümkündür. İndiyədək burada təklif olunan satış şərtləri daim sərfəli olması ilə fərqlənib. Çünki şirkət daha çox bankların tətbiq etdiyi və nəticə etibarilə vətəndaşların maliyyə itkisinə səbəb olan müxtəlif vasitələrdən heç vaxt istifadə etməyib. Yeni illə əlaqədar başladığımız növbəti satış kampaniyası da göstərir ki, “AAAF Park Yaşayış Kompleksi” Azərbaycanın tikinti sektorunda ilkləri gerçəkləşdirməkdə davam edir. Müştəriləri üçün daima ən yaxşı və ən sərfəlisini etməyə çalışan şirkət Yeni il bayramı ilə əlaqədar növbəti, möhtəşəm addımını atır. Belə ki, yeni kampaniyamıza əsasən “AAAF Park Yaşayış Kompleksi”ndə iki və ya üçotaqlı hazır mənzili nağd alan müştəriyə tikilməkdə olan binadan birotaqlı mənzil hədiyyə olunur.

Hələ 2006-cı ildə bu layihəyə başlayarkən əsas məqsədlərimizdən biri ölkəmizdə idmanın inkişafına xidmət etmək olub. “AAAF Park” həm də Azərbaycanın ağırlıqqaldırma üzrə yığma komandasını peşəkar idmançılarla təmin edən “Zirvə” İdman Klubunun əsas təlim-məşq bazasıdır. Azərbaycan ağır atletikasının şəksiz lideri olan “Zirvə” İK qısa fəaliyyəti dövründə Avropa və dünya çempionatlarının onlarla gənc və yeniyetmə qalib və mükafatçılarını yetişdirməyə müvəffəq olub. “Zirvə”-nin Azərbaycanın bölgələrində böyük kompleksləri var. Lənkəran, Şamaxı, Neftçala, Samux, Abşeron, Goranboy, Qazax, Astara, Masallı, İsmayıllı və başqa bölgələrdəki zallarımızda idmançılara ən yüksək şərait yaradılıb. Xırdalanda “AAAF Park”dakı “Zirvə” Uşaq İdman Akademiyası”nda isə ağır atletika ilə yanaşı, bədii gimnastika, cüdo, üzgüçülük, şahmat idman növləri inkişaf etdirilir.

“Zirvə” həm də beynəlxalq səviyyəli idman klubudur. Belə ki, klubun planetar layihəsi olan - “Zirve İnternational Sport Clubs”-ın Polşa, Bolqarıstan, Rusiya, İran, ABŞ, İsrail, Belarus, Gürcüstan, Türkiyə, Moldova və Ukraynada filialları yaradılıb. İndiyədək klubun filialları arasında iki dünya kuboku və iki dünya çempionatı keçirilib.

“AAAF-Holdinq”in fəaliyyəti Prezident İlham Əliyevin ölkəmizin inkişafı ilə bağlı elan etdiyi prioritetlərə uyğundur. Belə ki, həyata keçirilən layihələr regional inkişafa, sosial qayğıların yoluna qoyulmasına, idmanın yüksəlişinə, idman infrastrukturunun yenilənməsinə öz töhfəsini verir.

Tofiq HEYDƏROV,

“AAAF Holdinq”in təsisçisi

Azərbaycan.- 2016.- 23 dekabr.- S. 7.