Maqsud İsfəndiyar oğlu Əliyev

Azərbaycan elmi ictimaiyyətinə ağır itki üz vermişdir. Respublikanın tanınmış alimi, əməkdar elm xadimi, Azərbaycan Milli Elmlər Akademiyasının həqiqi üzvü, fizika-riyaziyyat elmləri doktoru, professor, Azərbaycan Milli Elmlər Akademiyasının fizika-riyaziyyat və texnika elmləri bölməsi akademik-katibinin müavini Maqsud İsfəndiyar oğlu Əliyev 2016-cı il dekabrın 23-də ömrünün 93-cü ilində vəfat etmişdir.

Maqsud Əliyev 1924-cü il avqust ayının 27-də Tbilisi şəhərində anadan olmuşdur. Orta məktəbi bitirdikdən sonra o, 1941-ci ildə Tbilisi Dövlət Universitetinin fizika-riyaziyyat fakültəsinə daxil olmuş, 1943–1945-ci illərdə İkinci Dünya müharibəsində iştirakı ilə əlaqədar ali təhsilini yarımçıq qoymuş və cəbhədən qayıtdıqdan sonra təhsilinə davam etmiş, 1947–1950-ci illərdə isə Azərbaycan Dövlət Universitetinin fizika-riyaziyyat fakültəsində oxumuşdur.

Əmək fəaliyyətinə 1950-ci ildən etibarən Azərbaycan Politexnik İnstitutunda assistent kimi başlayan Maqsud Əliyev 1954–1957-ci illərdə Azərbaycan Neft və Kimya İnstitutunda baş müəllim, 1957–1961-ci illərdə isə Azərbaycan Dövlət Universitetində baş müəllim, dosent vəzifələrində çalışmışdır. O, 1961-ci ildən taleyini Azərbaycan Elmlər Akademiyası ilə bağlayaraq Fizika İnstitutunda 1966-cı ilədək baş elmi işçi, 1966–2013-cü illərdə laboratoriya müdiri işləmiş, 1971-ci ildən ömrünün sonunadək Azərbaycan Elmlər Akademiyasının fizika-riyaziyyat və texnika elmləri bölməsi akademik-katibinin müavini vəzifəsini icra etmişdir.

Maqsud Əliyev 1957-ci ildə fizika-riyaziyyat elmləri üzrə namizədlik, 1966-cı ildə doktorluq dissertasiyalarını müdafiə etmiş və 1967-ci ildə professor elmi adını almışdır. O, fizika ixtisası üzrə 1969-cu ildə Azərbaycan Elmlər Akademiyasının müxbir üzvü, 1980-ci ildə isə həqiqi üzvü seçilmişdir.

Akademik Maqsud Əliyev Azərbaycanda fizika elminin inkişafında mühüm xidmətlər göstərmişdir. Onun uzun bir dövrü əhatə edən səmərəli elmi fəaliyyətinin başlıca istiqamətini yarımkeçiricilərin fiziki xassələrinin öyrənilməsi təşkil etmişdir. Yarımkeçiricilərin istilik keçirməsi probleminin həllinə yönəlmiş həmin araşdırmalar aktuallığı ilə səciyyələnərək bu sahədə bir sıra əsaslı məsələlərin aydınlaşdırılmasına zəmin yaratmışdır. Maqsud Əliyev selenin kristallaşmasına, elektrik, optik və istilik xassələrinə az miqdarda aşqarların təsirinin ilk tədqiqatçılarından idi. Alimin apardığı fundamental tədqiqatlardan əldə olunan mühüm nəticələr mütəxəssislər tərəfindən yüksək dəyərləndirilmişdir.

Maqsud Əliyev elmi yaradıcılığını pedaqoji fəaliyyəti ilə daim ahəngdar şəkildə əlaqələndirmiş və Azərbaycanın bir sıra ali təhsil ocaqlarında yüksəkixtisaslı kadrların yetişdirilməsində fəal iştirak etmişdir. O, nüfuzlu beynəlxalq elmi simpozium, forum və konfranslardakı çıxışları ilə Azərbaycan elmini ölkənin hüdudlarından kənarda da layiqincə təmsil etmişdir.

Maqsud Əliyev respublikamızda və xaricdə nəşr edilmiş 350-dən artıq elmi əsərin və 30 patentin müəllifidir. Alimin rəhbərliyi ilə yarımkeçiricilər fizikası və onun tədris metodikası üzrə 40-dan çox fəlsəfə və elmlər doktoru hazırlanmışdır.

Akademik Maqsud Əliyevin elmi fəaliyyəti lazımınca qiymətləndirilmişdir. Azərbaycan elminin inkişafındakı xidmətlərinə görə o, müxtəlif orden və medallara layiq görülmüş, o cümlədən, müstəqil Azərbaycan Respublikasının ali mükafatlarından olan “Şöhrət” ordeni ilə təltif edilmişdir.

Qocaman alim, gözəl pedaqoq və səmimi insan Maqsud İsfəndiyar oğlu Əliyevin xatirəsi onu tanıyanların qəlbində həmişə yaşayacaqdır.

Allah rəhmət eləsin!

İlham Əliyev

Artur Rasizadə

Oqtay Əsədov

Ramiz Mehdiyev

Elçin Əfəndiyev

Hacıbala Abutalıbov

Fatma Abdullazadə

Akif Əlizadə

Mikayıl Cabbarov

Arif Paşayev

Tofiq Nağıyev

İbrahim Quliyev

İsa Həbibbəyli

Rasim Əliquliyev

Telman Əliyev

Çingiz Qacar

Cavad Abdinov

Bahadur Tağıyev

Firudin Haşımzadə

X X X

Mərhumun cənazəsi vidalaşmaq üçün 2016-cı il dekabrın 26-da saat 12.00-dan 15.00-dək Azərbaycan Milli Elmlər Akademiyasının dairəvi zalında (Hüseyn Cavid prospekti, 31) qoyulacaqdır.

Azərbaycan.- 2016.- 25 dekabr.- S. 11.