Polis Akademiyasında multikulturalizm fənni tədris ediləcək

Fevralın 3-də Daxili İşlər Nazirliyinin Polis Akademiyasında Dini Qurumlarla İş üzrə Dövlət Komitəsinin sədr müavini Səyavuş Heydərovun Akademiyanın zabit heyəti və müdavimlərlə görüşü olub.

Tədbirdə çıxış edən Akademiyanın rəisi, general-mayor Nazim Əliyev görüşün əhəmiyyətini yüksək qiymətləndirib. O deyib ki, ölkəmizdə hər kəsin dini əqidəsini ifadə etmək və yaymaq hüququ, bütövlükdə konstitusion normalarla tənzimlənən vicdan azadlığının tam bərqərar olunması daim diqqət mərkəzindədir və bunlar dövlətimizin vacib saydığı prioritet istiqamətlərdəndir. Mövcud qanunvericilik, milli və ictimai təhlükəsizlik maraqları rəhbər tutulmaqla vicdan azadlığından sui-istifadə cəhdlərinin, dini radikalizmin, fanatizmin, ekstremizmin qarşısının alınması istiqamətində daxili işlər orqanları tərəfindən qətiyyətli tədbirlər həyata keçirilib və hazırda da bu işlər davam etdirilməkdədir.

Dövlət Komitəsinin sədr müavini Səyavuş Heydərov çıxışında görüşün maarifləndirmə, o cümlədən müdavimlərin milli mənəvi dəyərlərimizə bağlılığı, ölkəmizdə mövcud tolerant mühitin bundan sonra da qorunması baxımından böyük əhəmiyyət daşıdığını vurğulayıb. O, Azərbaycandakı mövcud dini durum, dövlətin bu sahəyə qayğısı, ölkəmizdə radikalizm meyillərinin yaranmasının səbəbləri, həmin meyillərin yayılmasında maraqlı olan bəzi daxili və xarici qüvvələr haqqında məlumat verib.

Dövlət Komitəsinin sədr müavini Azərbaycanda tolerantlığın ən nümunəvi formasının mövcudluğunu qeyd edib, “Multikulturalizm ili” çərçivəsində ölkəmizdə keçiriləcək tədbirlər barədə məlumatlar verib. O, müdavimlərə gələcək fəaliyyətlərində istifadə üçün qeyd olunan dəyərlərin dərindən mənimsənilməsini tövsiyə edib.

AZƏRTAC

Azərbaycan. - 2016.- 4 fevral.- S.4.