İlham Əliyevin “böhran şəraitində inkişaf” modeli

Uğurla icra edilən bu yüksəliş strategiyasının təməlində düşünülmüş siyasət, düzgün aparılan islahatlar və ölkənin gələcəyi ilə bağlı mükəmməl proqramlar dayanır

Prezident İlham Əliyevin sədrliyi ilə keçirilən Nazirlər Kabinetinin iclasları ənənəvi olaraq ölkənin xeyli müddət davam edən əsas gündəm mövzusu, həmçinin beynəlxalq mərkəzlərin və xarici mətbuatın xüsusi diqqət ayırdığı məqam olur. Çünki bu, adi iclas deyil, əslində, dövlət başçısının və onun komandasının fəaliyyət hesabatı, eyni zamanda qarşıdakı dövrlə bağlı perspektiv planların bəyanıdır.

Vətəndaşlarımız məmləkətin sosial-iqtisadi durumunu, sabaha ümidləri daha da artıran uğur nəticələrini öyrənir, iqtidarın fəaliyyətinin bütün aspektlərindən xəbərdar olur. Ölkə xaricindəki böyük maraq da anlaşılandır: bölgənin liderliyindən qlobal iqtisadi-siyasi məkanın nüfuzlu aktoruna çevrilən Azərbaycan liderinin hər bir bəyanatı regionun sərhədlərini aşan böyük bir geosiyasi arealda mühüm mesaj kimi qəbul edilir.

Qlobal böhran - milli inkişaf

2016-cı ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan Nazirlər Kabinetinin iclası da bu kontekstdə mühüm əhəmiyyət kəsb edir. Müşavirədə səslənən fikirlər, faktlar, rəqəmlər hər biri ayrılıqda nailiyyət göstəricisi olmaqla yanaşı, həm də fəaliyyətin düzgün istiqamətdə icra edildiyini və son dövrlərdə geniş miqyas alan islahatların artıq ilkin uğur nəticələrinin əldə olunduğunu təsdiq etdi.

Əgər bütünlüklə ötən ilin, həmçinin cari ilin birinci rübünün sosial-iqtisadi yekunlarında göstəricilərin o qədər də müsbət olmadığını və milli iqtisadiyyatımızda qlobal böhranın mənfi fəsadlarının daha çox müşahidə edildiyini görürdüksə, son altı ayın müvafiq nəticələri daha təqdirəlayiq və nikbindir. Konkret desək, artım dinamikası bütün sahələrdə özünü göstərir. Prezident bu dövrü “ölkə qarşısında duran bütün vəzifələrin uğurla icra olunduğu, Azərbaycanın inamla inkişaf etdiyi” mərhələ kimi səciyyələndirdi.

Bir vacib məqama diqqət yetirək. Əvvəlki illərdə İlham Əliyevin müəllifi olduğu “İnkişafın Azərbaycan modeli” adlı milli strategiya beynəlxalq iqtisadi mərkəzlər tərəfindən birmənalı qəbul olunaraq müsbət rəy alır və nümunə kimi göstərilirdisə, postneft dövrü dediyimiz mövcud durumda ölkəmiz yeni bir inkişaf platforması nümayiş etdirir.

Prezident müəllifi olduğu yeni modelin adını da tam doğru müəyyənləşdirdi: Böhran şəraitində inkişaf!

Qlobal böhranın fəsadlarının milli iqtisadiyyatları get-gedə daha ağır sınaqlar qarşısında qoyduğu, böyük böhranlara rəvac verdiyi bir zamanda Azərbaycan inkişafın yeni mərhələsinə qədəm qoyur. Beynəlxalq miqyasda iqtisadi göstəricilər “enmə”, “azalma”, “mənfi” ifadəlidirsə, Azərbaycanda əksinə - sosial-iqtisadi durumun mahiyyətini artıq “artım”, “yüksəlmə”, “müsbət” terminləri əks etdirir.

Postneft dövrünün kəskin müdaxilələrinə və beynəlxalq maliyyə-iqtisadi böhranın sərt təsirlərinə baxmayaraq, Azərbaycan iqtisadiyyatının artıq çətin dövrdən çıxdığını demək olar. Nəzərə alaq ki, ötən dövrün itkiləri düzgün yürüdülən iqtisadi islahatlar nəticəsində gözlənildiyi kimi böyük olmadı və ən əsası, azalmadan-çoxalmaya, mənfidən-müsbətə keçidi qısa müddətdə təmin etdi. Prezident bu uğurun təməlində dayanan amilləri belə müəyyənləşdirdi: düşünülmüş siyasət; düzgün aparılan islahatlar; ölkənin gələcəyi ilə bağlı mükəmməl proqramlar.

“Böhran şəraitində inkişaf!” modeli Prezident İlham Əliyevin milli yüksəliş kursunun yeni mərhələsinin ümumiləşdirilmiş adıdır və indi onun tədqiqatçılar tərəfindən dərindən araşdırılmasına ciddi ehtiyac var.

Yoxlamalar 714 dəfə azalıb, iqtisadiyyata 6,3 milyard dollar sərmayə qoyulub

Prezidentin nitqi həm də iqtidarın öz fəaliyyətində şəffaflığa və xalq qarşısında hesabatlılığa necə böyük önəm verdiyini bir daha göstərdi. Vətəndaşların bugündən narahat olmamağa, sabaha isə daha nikbin baxmağa yetərincə əsası var.

Ölkə rəhbərinin uğur hesabatı kimi qəbul edə biləcəyimiz ötən altı ayın əsas faktlarını qısaca ümumiləşdirsək:

* iqtisadiyyata 6,3 milyard dollar sərmayə qoyulub;

* iqtisadiyyatın əsas sahələrində yüksəliş var: qeyri-neft sənayesi 2,4 faiz, kənd təsərrüfatı

3,1 faiz artıb;

* yoxlamalar 714 dəfə azalaraq 40 mindən 56-ya düşüb;

* 78 mini daimi olmaqla 90 min iş yeri açılıb;

* sahibkarlara 73 milyon manat kredit verilib;

* maaşlar, pensiyalar 10 faiz, gömrükdən daxilolmalar 17 faiz, vergidən isə 2 faiz artıb;

* yüz mindən çox ailəyə sosial yardım ayrılıb;

naztəminatlı ailələrə ucuz mənzillərin inşası prosesinə başlanılıb;

* kənd yollarının tikintisi üçün 200 milyon manat ayrılıb və s.

Prezident eyni zamanda qarşıya da mühüm vəzifələr qoydu, daha doğrusu, davam edən islahatların, proseslərin nəzərdə tutulduğu kimi yekunlaşmasına qəti tapşırıq verdi:

* bütün sahələrdə islahatlar dərinləşməli, şəffaflıq təmin edilməli, nəzarət daha da gücləndirilməlidir;

* Azərbaycan nəinki regional, dünya miqyaslı nəqliyyat mərkəzlərinin birinə çevrilməlidir;

* iqtisadi potensialı müəyyən edən orta və kiçik sahibkarlığın inkişafı üçün əlavə tədbirlər görülməlidir;

* yeni sənaye mərkəzləri və müəssisələri açılmaqla özümüzü bütün sənaye məhsulları ilə təmin etməli və çox ciddi ixrac potensialı yaratmalıyıq;

* ərzaq təhlükəsizliyinin təmini və aqrar sektorun daha sürətli inkişafı üçün taxılçılıq, pambıqçılıq, baramaçılıq, tütünçülük, fındıqçılıq, heyvandarlıq və bu kimi digər sahələrə dövlət qayğısı davam etməli, yeni texnologiyaların tətbiqini genişləndirməli, nəticə etibarilə kənd təsərrüfatında idxala son qoyulmalıdır və s.

Ali Baş Komandan Qarabağdakı 22 illik status-kvonu dəyişdirdi

Xarici siyasət və Dağlıq Qarabağ probleminin nizamlama prosesində ötən altı ay xüsusi əlahiddəliyi ilə fərqlənib. Əvvəla, son 22 ildə toxunulmaz qalan status-kvo Azərbaycan əsgərinin şücaəti ilə dəyişib və ordumuz tarixi qələbə əldə edib. Həmçinin münaqişənin həlli prosesi çərçivəsində aparılan danışıqlar yeni mərhələyə qədəm qoyub, Prezident Vyana və Sankt-Peterburq danışıqlarına qatılıb.

İlham Əliyev Nazirlər Kabinetinin iclasında Ali Baş Komandan kimi sərt bəyanat verdi, əslində isə Ermənistana sonuncu xəbərdarlığını etdi: yaranmış əlverişli situasiyadan istifadə edərək, təcavüzkar dövlət mərhələli həll variantına sadiq qalaraq əraziləri boşaltmalıdır, yoxsa, son sözü diplomatlar yox, Ali Baş Komandanın timsalında Azərbaycan əsgəri deyəcək!

Ötən altı ayda Azərbaycan Prezidenti 6 beynəlxalq sammitdə iştirak edib, bundan əlavə 6 ölkəyə səfərə gedib. Həmçinin 10-dan artıq dövlət və hökumət başçısı respublikamıza səfər edib.

6 ay öncə Prezident 2016-cı ilin “dərin islahatlar ili” olacağına əminliyini ifadə etmişdi. Ötən müddət bu əminliyin gerçəkləşməsinə hər sahədə əsas yaratdı. İki gün öncə isə İlham Əliyev cari ilin ötən dövrünün yekunlarından razı qaldığını ifadə etməklə qarşıdakı mərhələdə uğurların artacağına inandığını söylədi. Bu inamın da reallaşacağına heç bir şübhə yoxdur.

Qlobal böhranda milli inkişafa nail olan Azərbaycan və onun lideri, şübhəsiz ki, daha böyük nailiyyətlərə müəlliflik edəcək!..

İxtiyar HÜSEYNLİ,

Azərbaycan.- 2016.- 12 iyul.- S. 1.