Korrupsiyaya qarşı mübarizə sahəsində beynəlxalq əməkdaşlıq uğurla davam etdirilir

Korrupsiyaya Qarşı Avropa Tərəfdaşları Təşkilatının (EPAC) və Korrupsiyaya Qarşı Avropa Əlaqələndiricilər Şəbəkəsinin (EACN) İşçi Qrupunun Rumıniyanın paytaxtı Buxarestdə “Səhiyyə sistemində korrupsiya – preventiv tədbirlər və istintaq, ən yaxşı təcrübələr və qarşıda duran vəzifələr” mövzusunda konfransı keçirilib.

Baş Prokurorluğun mətbuat xidmətindən AZƏRTAC-a bildiriblər ki, tədbirdə təşkilata üzv ölkələrin səhiyyə sistemində korrupsiyanın qarşısının alınması üçün görülmüş qabaqlayıcı tədbirlər, bu sahədə dövlət satınalmalarının həyata keçirilməsi zamanı baş verən korrupsiya hüquqpozmalarının araşdırılması üsulları və mübarizə mexanizmləri ilə bağlı geniş fikir mübadiləsi aparılıb.

Konfransda Azərbaycanı təmsil edən Baş Prokuror yanında Korrupsiyaya Qarşı Mübarizə Baş İdarəsinin Təşkilati və informasiya təminatı idarəsinin prokuroru İsfəndiyar Hacıyev çıxış edərək ölkəmizdə korrupsiyaya qarşı mübarizənin möhkəm siyasi iradəyə əsaslandığını vurğulayıb. O, həmçinin səhiyyə sistemində korrupsiyanın qarşısının alınması məqsədilə həyata keçirilmiş hüquqi və institusional tədbirlər barədə ətraflı məlumat verib, tədbir iştirakçılarını maraqlandıran sualları cavablandırıb.

Mədəniyyət.- 2016.- 1 iyun.- S. 7.