Azərbaycanı dünyada layiqincə tanıdan möhtəşəm idman hadisəsi

Bu gün I Avropa Oyunlarının başlamasından bir il ötür. Müstəqilliyi ərzində çoxlu sayda böyük uğura imza atan Azərbaycan Respublikası ötən il iyunun 12-28-də Avropada ilk dəfə keçirilən bu idman müsabiqəsini layiqincə təşkil etməklə tarixini daha bir möhtəşəm nailiyyətlə zənginləşdirdi. Respublikamız təkcə yüksək evsahibliyi nümunəsi ortaya qoymadı. Həm də sübut olundu ki, iradə, qətiyyət olan yerdə hər şey mümkündür.

Azərbaycana yüksək etimad göstərilir

Ümumiyyətlə, çoxsaylı idman növlərinin təmsil olunduğu beynəlxalq idman tədbirlərinə evsahibliyi etmək hər bir ölkənin arzusudur. Amma o da məlumdur ki, hər ölkə bu cür idman yarışlarını təşkil etmək imkanında deyil. Bunun üçün mükəmməl idman infrastrukturu, o cümlədən sayı on minlərlə ölçülən idmançıları və xarici qonaqları yerləşdirmək üçün imkanlar olmalıdır. 4 ildən bir keçirilən yay olimpiya oyunları məhz bu imkanlara malik ölkələrdə təşkil olunur.

Azərbaycanın evsahibliyi etdiyi Avropa Oyunları isə Avropanın tarixində birinci dəfə keçirilirdi. Oyunların Bakıda keçirilməsi haqqında qərar 2012-ci il dekabrın 8-də Romada Avropa Olimpiya Komitəsinin 41-ci Baş Assambleyasında qəbul edilmişdi. O zaman ölkəmizin böyük tarixi uğuru olan bu qərarın qəbul edilməsində bir neçə amil öz rolunu oynamışdı. Bunlar Azərbaycanın inkişafı, siyasi-ictimai sabitliyi, beynəlxalq tədbirlərin təşkilində ortaya qoyduğu ideal təşkilatçılıq, idman ölkəsinə çevrilməsi, o cümlədən son 15 ildə idman infrastrukturunun tamamilə yenilənməsidir.

Bəli, ölkəmiz son 10-12 ildə inkişaf templərinə görə dünyanın öncülləri sırasında qərar tutub. Azərbaycanın siyasi-ictimai sabitliyini isə heç bir qüvvə pozmaq iqtidarında deyil. Beynəlxalq tədbirlər məkanına çevrilən ölkəmizdə 40-dan artıq yeni olimpiya idman kompleksi və digər idman qurğuları inşa olunub. Bütün bunların, o cümlədən idman sahəsində gerçəkləşdirilən dövlət siyasəti, olimpiya ideallarının təbliği və digər tədbirlər nəticəsində ölkəmiz mötəbər beynəlxalq yarışların keçirildiyi məkana, dünyanın idman mərkəzlərindən birinə çevrilib.

Təsdiq edildi ki, Azərbaycanın Avropa Oyunlarına evsahibliyi etməyə tam haqqı çatır və ilk Oyunların harada keçirilməsi məsələsi müzakirə olunarkən Avropa Olimpiya Komitəsi bu reallıqları nəzərə aldı.

2012-ci il həm də Azərbaycanda "İdman ili" elan olunmuşdu. Və ilin sonlarına doğru Romadan gələn bu xəbər "İdman ili"nə özünün möhtəşəm möhürünü vurdu. Avropa Olimpiya Komitəsinin tarixdə ilk dəfə keçiriləcək bu möhtəşəm idman tədbiri ilə bağlı qərarı ölkəmizdə "İdman ili"ndə həyata keçirilən fəaliyyətin və bütövlüklə ötən illərdə qazanılan uğurların məntiqi nəticəsi, Azərbaycanın idman uğurlarının beynəlxalq etirafı idi.

Təşkilat Komitəsi hazırlıq işlərini ən yüksək səviyyədə başa vurdu

2013-cü ilin 17 yanvar tarixində Prezident İlham Əliyev "I Avropa Oyunlarının 2015-ci ildə Bakı şəhərində keçirilməsi üzrə Təşkilat Komitəsinin yaradılması haqqında" sərəncam imzaladı. Sərəncama əsasən, Heydər Əliyev Fondunun prezidenti, Azərbaycan Respublikası Milli Olimpiya Komitəsi İcraiyyə Komitəsinin üzvü, UNESCO-nun xoşməramlı səfiri Mehriban Əliyevanın sədrliyi ilə Bakı şəhərində I Avropa Oyunlarının keçirilməsi üzrə Təşkilat Komitəsi yaradıldı.

Yay Olimpiya Oyunları üçün 7-8 il vaxt verilsə də, Azərbaycanın Avropa Oyunlarına hazırlıq üçün cəmi iki il vaxtı vardı. Lakin bu müddət Yay Olimpiya Oyunları səviyyəsində olan bir idman yarışmasının təşkili üçün yetərli deyildi. Bundan başqa, Yay Olimpiya Oyunlarının keçirilməsində artıq böyük təcrübə mövcuddur və Beynəlxalq Olimpiya Komitəsi, demək olar ki, hər bir sahə üzrə öz göstərişlərini verirdi. Mövcud təlimatlarda hər bir istiqamət üzrə müəyyən edilmiş metodiki qaydalar vardı. I Avropa Oyunları üçün isə heç bir təlimat və təcrübə yox idi. Belə olan halda bütün məsuliyyət, təşkilati məsələlərin yoluna qoyulması Azərbaycanın üzərinə düşürdü.

O zaman bəzi xarici çevrələrdə Azərbaycanın bu idman yarışmasını lazımi səviyyədə təşkil etməsinə inam yox idi. Onlar bizim bu beynəlxalq idman yarışının təşkilinin öhdəsindən gələ bilməyəcəyimizi zənn edirdilər. Lakin Azərbaycan iki ilyarım vaxt ərzində ən mükəmməl hazırlıq işlərini həyata keçirdi və bütün Avropaya öhdəliyə əməl etməyin yeni nümunəsini göstərdi. Hazırlıq işlərinə başlanandan sonra isə Azərbaycanın cəmi iki ildən bir qədər artıq vaxtı var idi. Bu müddətdə Azərbaycanın birinci xanımı Mehriban Əliyevanın rəhbərlik etdiyi I Avropa Oyunlarının Təşkilat Komitəsi əzmkar, yorulmaz və gərgin fəaliyyəti ilə bu idman müsabiqəsinin qüsursuz keçirilməsi üçün bütün işləri həyata keçirdi. Müddətin az olmasına baxmayaraq, Təşkilat Komitəsi hazırlıq işlərini ən yüksək səviyyədə başa vurdu. Həmin dövrdə Bakıda 5 yeni və möhtəşəm idman qurğusu inşa edildi. Bunlar Bakı Olimpiya Stadionu, Milli Gimnastika Arenası, Bakı Su İdmanı Sarayı, Bakı Atıcılıq Mərkəzi və Veloparkdır. Yarışların keçiriləcəyi digər idman kompleksləri ən müasir standartlar səviyyəsində yenidən quruldu. Atletlər və Media kəndləri bütün xarici qonaqları heyran etdi. Sadalananlar dünyada idman ölkəsi kimi tanınan, Olimpiya hərəkatına dəstəyi dövlət siyasətinin əsas istiqamətlərindən biri elan edən Azərbaycanın uğurlu inkişafının göstəricisi idi. Bakıda yeni infrastrukturun yaradılması və oyunların təşkili üzrə digər işlər sürətlə həyata keçirildi. Bununla Mehriban Əliyevanın rəhbərlik etdiyi Təşkilat Komitəsi hazırlıq işlərini göstərilən vaxtda başa çatdırdı.

Qısa müddətdə bu qədər işin görülməsi, həqiqətən, gərgin və fədakar zəhmət tələb edirdi. Lakin ölkəmiz ən yüksək formada bunun öhdəsindən gəlməyi bacardı. Bir vaxtlar heç düşünə bilməzdik ki, Böyük Şor gölü yaxınlığında, ekoloji natəmiz bir ərazidə Bakı Olimpiya Stadionu kimi möhtəşəm bir idman kompleksi tikilər, o torpaqlar abadlaşdırıla bilər. Amma qısa müddətdə həmin ərazi neft tullantılarından təmizləndi. Yerində dünyanın ən böyük stadionları ilə rəqabətə girən möhtəşəm idman qurğusu, gölün sahilində isə gözəl bulvar salındı. İdmançıların yaşadığı Atletlər Kəndində yaradılan şəraitə digər ölkələr, sadəcə, qibtə edə bilərlər. Media təmsilçilərə yaradılan şərait isə ölkəmizə gələn hər bir xarici jurnalistin heyranlığına səbəb olmuşdu. İdmançıların, o cümlədən akkreditasiyadan keçən jurnalistlərin, könüllülərin idman qurğularına getməsi üçün xüsusi nəqliyyat vasitələrinin hərəkət marşrutu və qrafiki saat dəqiqliyi ilə qurulmuşdu.

Bakıda işlərin çox olmasına baxmayaraq, Mehriban xanım Əliyevanın təşəbbüsü və dəstəyi ilə Avropa ölkələrində I Avropa Oyunlarının təqdimatları keçirildi. Həmin təqdimatlarda yalnız bu idman yarışı barədə müzakirələr açılmırdı. Onların hər birində Azərbaycanın tarixi, mədəniyyəti barədə geniş məlumatlar verilir, milli-mənəvi dəyərlərimiz musiqimiz əcnəbilərə çatdırılırdı. Bu vasitə ilə Azərbaycan tanıtdırılırdı. Sözün yaxşı mənasında, ələ düşən hər fürsətdən Azərbaycanın təbliği üçün məharətlə istifadə edilirdi. Bu təqdimatların gedişi I Avropa Oyunlarının çox yüksək səviyyədə keçiriləcəyindən xəbər verirdi.

Ötən il iyunun 29-da I Avropa Oyunlarında qalib gəlmiş idmançılarımız, onların məşqçiləri, Azərbaycan idman ictimaiyyətinin nümayəndələri və Oyunların təşkilində xidmətləri olan xarici tərəfdaşlarla görüşdə Prezident İlham Əliyev Təşkilat Komitəsinin işi barədə deyib: "Mən bu gün Təşkilat Komitəsinin fəaliyyətini xüsusi qeyd etmək istəyirəm. Çünki Təşkilat Komitəsinin çox böyük və gərgin fəaliyyəti olmuşdur. Təbii ki, ictimaiyyət tam şəkildə bu fəaliyyətin nədən ibarət olduğunu bilə bilməz. Çünki Təşkilat Komitəsinin tədbirləri mütəmadi qaydada keçirilirdi. Ancaq ictimaiyyətə o qədər də geniş məlumatlar verilmirdi. Hər bir xırda məsələ üzrə bütün işlər ən yüksək səviyyədə görülmüşdü və məhz buna görə Oyunların keçirilməsində heç bir problem yaşanmadı. Təşkilat Komitəsinə rəhbərlik etmiş Mehriban Əliyevanın böyük fəaliyyətini xüsusilə yüksək qiymətləndirirəm. O, bu Oyunların keçirilməsinə çox böyük töhfə vermişdir. Deyə bilərəm ki, bu Oyunların bu səviyyədə keçirilməsinə öz canını qoymuşdur. Mən Təşkilat Komitəsinin tərkibini müəyyən edərkən tam əmin idim ki, bu tərkibdə bu Komitə ən yüksək nəticə göstərə bilər. Çünki burada həm təcrübə, həm peşəkarlıq və ən önəmlisi xalqa, dövlətə sevgi, məhəbbət var idi və var. Bu, ümumiyyətlə ölkəmizin əldə etdiyi uğurların əsas şərtidir".

Atəşgah məbədindən alovlanan məşəl bütün Azərbaycanı gəzdi

Aprelin 26-da Bakıda Atəşgahda I Avropa Oyunlarının məşəli alovlandırıldı və bununla da möhtəşəm idman tədbiri özünün yeni mərhələlərinə qədəm qoydu. Məşəl simvol sayıldığından Bakıda I Avropa Oyunlarının məşəlinin alovlandırılması ölkəmizin və eləcə də dünyanın idman tarixində əlamətdar hadisələrdən biri idi. Ona görə aprelin 26-sı ilk Avropa Oyunlarının həyəcanının başlanğıc günü kimi tarixə düşdü.

Həmin gündən etibarən Azərbaycanın nəbzi bu möhtəşəm idman tədbiri ilə döyündü. Çünki I Avropa Oyunlarının ab-havası təkcə Bakıda deyil, respublikamızın dörd bir yanında hiss olundu. Prezident İlham Əliyevin alovlandırdığı məşəl Azərbaycanın hər bir guşəsini gəzib-dolaşdı. Məşəlin səyahət etdiyi şəhər və rayonlarda böyük qələbəlik, bayram sevinci müşahidə olundu. Hər bir bölgənin idmançılarından, ictimai fəal sakinlərindən ibarət məşəlçilər qardaşlıq ruhunda alovlanan məşəli bir-birinə ötürərək idman vasitəsilə sülh, dostluq və təntənə mesajını yaydılar. Xüsusən gənclər ümumxalq bayramına çevrilən məşəlin səyahəti tədbirlərində yaxından iştirak etdilər. İstər təşkilatçılıq, istərsə də məşəlin daşınmasında, o cümlədən alov mərasimlərində gənclərimiz olduqca mütəşəkkillik göstərərək, ölkəmizin adı ilə bağlı olan və tarixdə ilk dəfə keçirilən bu möhtəşəm idman tədbirinə özlərinin layiqli töhfələrini verdilər. Bu mənada Təşkilat Komitəsinin təqdirəlayiq addımlarından biri də I Avropa Oyunlarının sevincini bütün Azərbaycan xalqına yaşatması idi.

Onu qeyd edək ki, I Avropa Oyunlarının məşəlinin alovlandırılmasının rəmzi mənası var idi. Çünki Olimpiya məşəlinin alovlandırılmasının və estafetin müasir ənənəsinin əsasını qoymuş, qədim idman oyunlarını yaratmış yunan sivilizasiyası odu, alovu müqəddəs sayırdı. Azərbaycan da tarixən "Odlar diyarı" kimi tanınmışdır. Odur ki, bu Oyunların ən mühüm elementlərdən biri - ölkəmizin milli rəmzlərindən olan alov, eyni zamanda, Olimpiya Hərəkatının gücünün və qüdrətinin, o cümlədən ölkəmizin tarixinin, adət-ənənələrinin təcəssümü oldu.

Məşəlin gövdəsi "Bakı-2015" brendində yer alan nar ağacını xatırladırdı, alovu qoruyan mis başlıq da nar formasında idi. Onun 50 çəyirdəyi Oyunlarda iştirak edən ölkələrin sayını təmsil edirdi. 47 gün ərzində 5,5 min kilometr məsafə qət edən, 60 şəhər və rayondan keçən məşəlin səyahəti zamanı ümumilikdə mindən çox məşəlçi iştirak etdi. Məşəl yer üstündə avtobus, funikulyor, velosiped, yer altında isə Bakı metrosu, suda qayıq, havada isə təyyarə ilə daşındı.

Məşəl bütün şəhər və rayonlarımızda çox böyük coşqu və alqışlarla qarşılandı. Diqqəti çəkən əsas məqamlardan biri də o idi ki, həmin günlərdə Azərbaycanı qarış-qarış gəzən məşəl həm də regionlarımızın, şəhər və rayonlarımızın son illərdə keçdiyi dinamik inkişaf və quruculuq yolunu, insanların artan sosial rifahını tərənnüm etdi. Məşəl estafetini izləyən hər kəs, o cümlədən beynəlxalq ictimaiyyət respublikamızın sosial-iqtisadi yüksəlişinə, insanların çöhrəsindəki sevincə şahid oldu. Bütün dünya Azərbaycanın rayonlarının, o cümlədən vaxtilə döyüş əməliyyatları getmiş cəbhə rayonlarının abadlığını, gözəlliyini, insanların qələbə əzmini, sabaha dərin inamını gördü. Odur ki, I Avropa Oyunlarının məşəli Azərbaycanın dünya tərəfindən yaxından tanınması və ölkəmizin dəyərlərinin təbliği üçün mühüm addım idi.

Möhtəşəm açılış və bağlanış mərasimləri

I Avropa Oyunlarının açılış mərasiminin keçirildiyi iyunun 12-si təkcə Azərbaycanın deyil, dünyanın və Avropanın idman həyatında ən əlamətdar tarixlərdən biri idi. Çünki həmin gün axşam Bakı Olimpiya Stadionunda uzun müddətdən bəri səbirsizliklə gözlənilən Oyunlar özünün əsas mərhələsinə qədəm qoydu.

İyunun 12-də Bakı Olimpiya Stadionuna toplaşmış 68 min tamaşaçı, eləcə də dünyada yüz milyonlarla televiziya tamaşaçısı unudulmaz tarixi anın şahidi oldular. Dünyanın aparıcı bədii, yaradıcı və texniki heyətlərinin iştirakı ilə ərsəyə gələn kreativ şou heyrətamiz bir mənzərə yaratmaqla hər bir azərbaycanlını qürurlandırdı. Biz bir çox mötəbər idman yarışlarının açılış mərasimlərini izləmişik. Lakin I Avropa Oyunlarının açılış mərasimi bunların arasında ən möhtəşəmi idi. Bu mərasimin ən mühüm cəhəti isə onun əvvəldən axıra kimi məhz xalqımızın milli-mənəvi dəyərlərini özündə əks etdirməsi idi. Rəngarəng kompozisiyalar o qədər gözəl idi ki, insanlar həmin mənzərəni izlədikcə həyəcanlanmaya, fəxr etməyə, qürurlanmaya bilmirdi.

Qədimliklə müasirliyin sintezinə əsaslanan səhnələr zəngin mənəvi dəyərlərə malik, tolerant azərbaycanlı obrazının, xalqımızın əsrlər boyu formalaşmış zəngin mənəvi-intellektual sərvətinin - milli düşüncə tərzinin, folklorunun, ədəbiyyatının, musiqisinin, incəsənətinin, humanizm və insansevərlik kimi bəşəri keyfiyyətlərə sadiqliyinin dolğun nümunəsi idi. "Uçan xalça", görkəmli muğam ustası Alim Qasımovun ifasında "Qarabağ şikəstəsi", balabanda "Sarı gəlin" mahnısının səsləndirilməsi, dahi Nizami Gəncəvinin "Xəmsə"sinə daxil olan əsərlərin yüksək səhnə nümayişi, hamılıqla şahidi olduğumuz başqa innovativ yeniliklər açılış mərasimini milyonlarla insan üçün unudulmaz xatirəyə çevirdi.

Bağlanış mərasiminin də süjet xətti orijinallığı və qeyri-adiliyi ilə seçilirdi. Folklor nümunələrimizdə Simurq quşu əsas mifoloji obrazlardan biri olaraq insanları xilas edən, onlara yardım göstərən, qanadından tük verərək dar gündən xilas edən əfsanəvi varlıq kimi öz əksini tapıb. O həyat ağacını səmadan yerə endirən, insanlara həyatı, yaşamağı öyrədən bir quşdur. Bu mənada, bağlanış mərasimində nümayiş olunan Simurq quşu Azərbaycanın bütün dünyaya yardım üçün açıq ölkə olduğunu göstərirdi.

Açılış və bağlanış mərasimləri xalqımızın milli kimliyini nümayiş etdirməklə yanaşı, öz vətəndaşını da dünyaya tanıtdırdı. İnsanı təsirləndirən və heyrətləndirən ssenariləri, ayrı-ayrı süjetlərin özündə ehtiva etdiyi dərin fəlsəfi məzmun yükü hələ uzun illər xatirələrdən silinməyəcək.

Azərbaycan idmançıları tarix yazdılar

Avropa Oyunları qitə və dünya üçün çox maraqlı, cəlbedici, proqressiv idman yarışı kimi tarixə yazıldı. Avropanın idman tarixində yeni səhifə açan Azərbaycan 17 gün ərzində əsl bayram libasına büründü. Həmin günlərdə 50 ölkədən olan 6000-dən çox idmançı 20 növ üzrə 253 dəst medal uğrunda mübarizə apardı. 12 idman növü üzrə Rio - 2016 Yay Olimpiadasına təsnifat imkanları verildi. Rusiya Federasiyasının komandası 164 medalla (79 qızıl, 40 gümüş, 45 bürünc) birinci, Azərbaycan 56 medalla (21 qızıl, 15 gümüş, 20 bürünc) ikinci, Böyük Britaniya isə 47 medalla (18 qızıl, 10 gümüş, 19 bürünc) üçüncü oldu.

İlk dəfə Azərbaycanda reallığa çevrilən bu Oyunlarda hər keçən gün bir-birindən maraqlı mübarizələrlə yadda qaldı, idman həyatının yeni rekordları müəyyənləşdi. Oyunlar xüsusən Azərbaycan idmançıları üçün yaddaqalan oldu. Belə ki, əvvəllər Yay Olimpiya Oyunlarında, dünya və Avropa çempionatlarında çıxış edən Azərbaycan atletlərini idmanın güləş, boks, cüdo, ağırlıqqaldırma növlərində favoritlərdən hesab edirdilərsə, Avropa Oyunlarının gedişatında bu fikir tamamilə dəyişdi. Çünki Azərbaycan idmançıları taekvondo, idman gimnastikası, qılıncoynatma, triatlon, avarçəkmə sahəsində də öz uğurlu çıxışları ilə yadda qaldılar. Qazanılan qızıl medalların sayına görə də ölkəmizin dünyada böyük idman dövlətlərindən biri olduğu sübut edildi. Heç kim Azərbaycan atletlərinin Avropa Oyunlarında bu qədər medal qazanacağını gözləmirdi. Proqnozlara, təxmini hesablamalara görə, idmançılarımızın 20-25 medal qazanacaqları gözlənilirdi. Yekunda isə atletlərimiz Azərbaycan idmanı tarixində yeni rekord əldə etdilər: ümumilikdə 56, o cümlədən 21 qızıl medal qazanaraq ölkəmizin adını dünyanın idman tarixinə qızıl hərflərlə yazdılar. Medalların istər kəmiyyətinə, istər keyfiyyətinə, istərsə də ümumi nəticəyə nəzər salsaq, əminliklə deyə bilərik ki, bu, gözləniləndən qat-qat artıq idi. Xüsusilə qeyd etməliyik ki, Azərbaycan idmançıları 3 idman növündə qitədə ilk pilləni tutdular. Azərbaycan Respublikasının Prezidenti İlham Əliyev və xanımı Mehriban Əliyevanın idmançılarımızın çıxışını dəfələrlə arenalarda izləmələri isə onlara göstərilən ən böyük mənəvi dəstək idi.

Yeri gəlmişkən, ilk Avropa Oyunlarının iştirakçısı olan 50 ölkədən 42-si medal qazandı. Bu, Oyunların uğuru deməkdir. Şanlı qələbələri ilə xalqımızı sevindirən atletlərimiz tərəfindən Avropa Oyunlarında qazanılan medallar isə idmançılarımızın bu il Braziliyada keçiriləcək Yay Olimpiya Oyunlarına daha ciddi hazırlaşmaları üçün əlavə məsuliyyət hissi yaratdı.

Hər sahədə ideal təşkilatçılıq vardı

I Avropa Oyunlarının əsas simalarından biri könüllülər idi. Oyunlar başlamazdan bir neçə ay əvvəldən Bakının küçələrində və yarışlarda gördüyümüz xüsusi uniformalı oğlan və qızlar xoş ovqat oyadırdılar. İstənilən böyük idman yarışında könüllülərin köməyinə ehtiyac duyulur. "Bakı-2015" Avropa Oyunlarının "Alov qoruyanlar" adlandırılan könüllüləri də I Avropa Oyunlarının möhtəşəm idman bayramına çevrilməsində yaxından iştirak etdilər. Onlar Oyunlar ərzində idmançılara və rəsmi şəxslərə kömək göstərdilər, idman yarışlarında işlədilər, tamaşaçılara, turistlərə və media nümayəndələrinə bələdçilik etdilər. Hətta gimnastika yarışlarında könüllülərdən biri polşalı idmançını zədə almaqdan xilas etdi. Bütövlükdə, könüllülər öz üzərlərinə düşən işi məsuliyyətlə yerinə yetirdilər. Könüllülük proqramı həm də böyük təcrübənin əldə edilməsidir. Çünki gələcəkdə Azərbaycanda digər yarışlar da təşkil olunacaq və bu zaman könüllülərin təcrübəsindən istifadə olunacaq.

Bütün beynəlxalq yarışlar zamanı şəhərdə nəqliyyatın hərəkətində xüsusi tənzimləmələr olur. Bunun Bakıda da olacağı istisna deyildi. Hələ yarışlar başlamazdan öncə bəzi yollarda I Avropa Oyunlarında idmançılara və nümayəndə heyətlərinə xidmət edəcək, eləcə də tamaşaçıları idman komplekslərinə aparan xüsusi nəqliyyat vasitələri üçün zolaqlar ayrılmışdı. O cümlədən rayon qeydiyyatında olan avtomobillərin Bakıya girişinə məhdudiyyət qoyulmuş, bəzi marşrutların hərəkətində dəyişiklik edilmişdi. Olduqca sevindirici haldır ki, bütün paytaxt sakinləri, sürücülər bu müvəqqəti məhdudiyyətləri yüksək anlayışla, ehtiramla qarşıladılar. Bu, həm də vətəndaşlarımızın yüksək mədəni davranışından, ölkəmiz üçün əhəmiyyət kəsb edən bu cür məsələlərə həssas münasibətindən xəbər verirdi. Həmin günlərdə biz, eyni zamanda, yol polisi xidmətinin yüksək səviyyədə qurulmasının və burada çalışan əməkdaşların peşəkarlığının şahidi olduq.

Diqqəti çəkən əsas məsələlərdən biri də Oyunlar zamanı həyata keçirilən yüksək təhlükəsizlik tədbirləri idi. Əlbəttə, Azərbaycanda vətəndaşların və cəmiyyətin təhlükəsizliyi ən yüksək səviyyədə təmin olunur. I Avropa Oyunları beynəlxalq səviyyəli idman tədbiri olduğundan, həm də ölkəmizə minlərlə idmançının, on minlərlə turistin gələcəyini nəzərə alaraq yarışların keçirildiyi günlərdə daha ayıq-sayıq və güclü təhlükəsizlik tədbirlərinin həyata keçirilməsi vacib idi. Məhz ölkəmizin hüquq-mühafizə orqanlarının qarşılarında dayanan vəzifələrin öhdəsindən layiqincə gəlmələrinin, onların əməkdaşlarının əsl vətənpərvərlik, yüksək əzm və peşəkarlıq nümayiş etdirmələrinin nəticəsi olaraq I Avropa Oyunlarının təhlükəsizliyi ən yüksək səviyyədə təmin olundu. Bu, həm də onu göstərdi ki, Azərbaycan ictimai-siyasi baxımdan sabit ölkədir və burada hər hansı riyakar planın həyata keçirilməsi mümkün deyil.

Azərbaycan I Avropa Oyunlarını ən yüksək səviyyədə təşkil etdi. Bakıya gələn hər bir xarici qonaq xalqımızı daha yaxından tanıdı, öyrəndi və təbii ki, bu, ölkəmizlə bağlı onların təəssüratlarının düzgün formalaşmasına imkan verdi. Bu baxımdan I Avropa Oyunlarının Bakıda keçirilməsi həm də ölkəmizin dünyada təbliği oldu. Oyunların Təşkilat Komitəsinin sədri Mehriban Əliyeva respublikamızda mədəniyyətin, təhsilin, səhiyyənin və idmanın inkişafında səmərəli fəaliyyətinə, Azərbaycan xalqının mədəni irsinin beynəlxalq miqyasda geniş təbliğinə və I Avropa Oyunlarının təşkilində böyük xidmətlərinə görə "Heydər Əliyev" ordeni ilə təltif edildi.

Antiazərbaycançı şəbəkə fiaskoya uğradı

Məlum olduğu kimi, Azərbaycanın uğurlarını həzm edə bilməyən müəyyən xarici dairələr zaman-zaman ölkəmizə qarşı qarayaxma kampaniyalarına cəhd ediblər, lakin hər dəfə uğursuzluğa düçar olublar. I Avropa Oyunları ərəfəsində də Azərbaycana qarşı qarayaxma kampaniyasının olacağı əvvəldən məlum idi. Erməni lobbisindən, erməni təəssübkeşlərindən ibarət olan bu şəbəkə hələ Oyunlar başlamazdan əvvəl ölkəmizə qarşı şər-böhtan kampaniyasına start vermişdi. Məsələn, öz fəaliyyətini yalnız qərəz və yalan üzərində quran "Amnesty International" təşkilatının I Avropa Oyunları ilə bağlı bədnam çağırışı antiazərbaycançı şəbəkənin sifarişi olaraq ölkəmizə qarşı təxribat idi. Həmin hadisə göstərirdi ki, bəzi xarici dairələr əvvəllər olduğu kimi, Avropa Oyunları ərəfəsində də Azərbaycanın imicini ləkələməyə və mühüm beynəlxalq idman tədbirinə qarşı açıq təxribat törətməyə cəhd göstərirlər. Lakin yalan və riyakarlıq üzərində qurulduğu üçün həmin təxribat elə beşiyindəcə boğuldu.

Bir qədər sonra Azərbaycanı gözü götürməyən, erməni təəssübkeşi olan mərkəzlər I Avropa Oyunlarının özünə kölgə salmağa cəhd göstərməklə öz riyakarlıqlarını yenidən ortaya qoydular. Onlar Böyük Britaniyanın www.insidethegames.biz internet saytında I Avropa Oyunlarına kölgə salmağa hesablanmış yazı yerləşdirdilər. Yazıda iddia olunurdu ki, əsl Avropa Oyunları Azərbaycanda yox, 2018-ci ildə Almaniya və Şotlandiyada keçiriləcək və guya I Avropa Oyunları ikinci dərəcəlidir. Beynəlxalq idman yarışlarının keçirilməsi qaydaları ilə az-çox tanış olan hər kəs bilir ki, Avropa Olimpiya Komitəsinin qərarı ilə keçirilən tədbir qitənin ali idman tədbiri sayılır. I Avropa Oyunlarının keçirilməsi barədə qərarı isə hansısa idman federasiyası yox, məhz Avropa Olimpiya Komitəsi qəbul edib. Böyük Britaniya saytının bədnam iddiasına ən layiqli cavab da elə Avropa Olimpiya Komitələrinin prezidenti Patrik Hikkidən gəldi.

Ermənipərəst dairələr I Avropa Oyunları zamanı Azərbaycana qarşı dəfələrlə hücuma cəhd göstərdilər. Lakin hər dəfə olduğu kimi, onların riyakar fəaliyyətləri nəticəsiz qaldı. Çünki Azərbaycan daha güclü, daha qüdrətlidir. Belə dövlətə isə təsir etmək mümkün deyil. Ona görə ölkəmizə qarayaxma kampaniyalarının hər biri iflasa uğradı. Azərbaycan I Avropa Oyunlarını ən yüksək səviyyədə təşkil etməklə antiazərbaycançı dairələrin bütün məkrli planlarını alt-üst etdi.

Azərbaycan ötən il ilk dəfə keçirilən I Avropa Oyunlarını ən yüksək səviyyədə təşkil etdi. Hər bir azərbaycanlının xatirəsinə həkk olunan bu tədbir unudulmayacaq idman bayramına çevrildi. Həmin günlərdə bütün dünya və Avropa Azərbaycanın həm nümunəvi evsahibliyini gördü, həm də xalqımızın gözəl dəyərləri ilə tanış oldu. Eyni zamanda, Azərbaycan Yay Olimpiya Oyunlarına evsahibliyi edə bilmək imkanlarını da nümayiş etdirdi. Bütövlükdə, Azərbaycan I Avropa Oyunlarının keçirildiyi ilk ölkə kimi adını tarixə yazdı və sözsüz ki, burada müəyyən olunan model və standartlar gələcək Oyunlarda tətbiq olunacaq.

Rəşad CƏFƏRLİ,

Azərbaycan.- 2016.- 12 iyun.- S. 1;4.