Azərbaycanın özü qədər əbədi

İlham ƏLİYEV: “Biz Heydər Əliyev siyasətinə sadiqik, bu yolla gedirik və bundan sonra da gedəcəyik, Azərbaycan xalqının xoşbəxt gələcəyini təmin edəcəyik”

13 il öncə, 2003-cü ilin 1 oktyabrında ulu öndər Heydər Əliyev Azərbaycan xalqına son müraciətini etdi, tövsiyəsini verdi. Dünyanın ən böyük azərbaycanlısı bu müraciətində həm də uğurlu fəaliyyətinin, daha doğrusu, Azərbaycanın qazandığı zəfərlərin formulunu, məziyyətini belə açıqlayırdı:

“...Mənim Azərbaycan Respublikasına bütövlükdə rəhbərliyimin 34, müstəqil Azərbaycan dövlətinə Prezident kimi rəhbərliyimin isə 10 ili tamam olur. Bu illərdə istər bir azərbaycanlı, Azərbaycan Respublikasının vətəndaşı, istərsə də onun rəhbəri, Prezidenti kimi mənim həyat amalım yalnız sizə - bütün varlığım qədər sevdiyim Azərbaycan xalqına, dövlətçiliymizə, ölkəmizin iqtisadi, siyasi, mənəvi inkişafına xidmət olmuşdur. Bu yolda bütün gücümü və iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımı təmin edib...”

34 il və Azərbaycan - Heydər Əliyev vəhdəti...

10 il və Azərbaycan - Heydər Əliyev zəfər yolu...

Bu, tarixin statistik göstəricisi deyil. Bu, tariximizin az təsadüf edilən şərəf və qeyrət, ucalıq və intibah, layiqli dövlətçilik və fədakar vətəndaşlıq səhifəsinin ən möhtəşəm sətirləridir. Heydər Əliyev haqda yazılan kitabların, çəkilən filmlərin, deyilən fikirlərin, - onların sayı minlərlədir, - mahiyyəti bu şəxsiyyətin malik olduğu qüdrətin heç onda birini də vəsf etməyə kifayət deyil. Bu tərs-mütənasibliyin səbəbini heç də ortada olan sənət nümunələrinin yaradıcı uğursuzluğunda, yaxud da səslənən mülahizələrin və münasibətlərin əsassızlığında axtarmağa lüzum yoxdur. Əksinə... Səbəb sözün ən səmimi, ən uca məqamının da Heydər Əliyev zirvəsindən aşağıda olmasıdır. Ən ali söz belə bu İnsanın xalqı və dövləti qarşısında göstərdiyi misilsiz xidmətləri, eləcə də millətinin bütün nailiyyətlərinə, sevinclərinə, ən nəhayət, uzun illər həsrətini çəkdiyi normal yaşayışına görə Liderinə bəslədiyi münasibəti əks etdirməkdə gücsüzdür.

Əsas olan milyonların qəlbindəki şükranlıq, xatirələr, duyğular, düşüncələrdir - ən böyük həqiqətlər bunlarda əks olunub. Ali həqiqəti isə dünən hər kəs bir daha gördü. Cavanlı-qocalı on minlərlə insan məmləkətin Baş Ziyarətgahına axışırdı. Bu, artıq 13 ildir xalqımız üçün yazılmamış qanuna, milli ənənəyə çevrilib. Dünən də hər kəs minnətdarlığın əsas ünvanında səssizcə dayanaraq bitməyən sevgisini, əbədi ehtiramını göstərirdi...

İki gün öncə Prezident İlham Əliyevin təşkil etdiyi rəsmi qəbulda da ümummilli liderin xatirəsi anıldı. Mərasimdəki nitqində ölkə rəhbəri Heydər Əliyev şəxsiyyətinə münasibətini yalnız bir övlad, yaxud Azərbaycan vətəndaşı kimi bildirmədi. Bu münasibət, əslində, müasir Azərbaycanı dünyanın nüfuzlu və qüdrətli dövlətinə çevirən Liderin bu nailiyyətlərin səbəbkarı olan Liderə təşəkkürü, onun əməllərinə heyranlığı və uğurla davam edən siyasi irsə vəfa borcu idi!

Bu çıxışdakı məqam bizlərə bir gerçəyi də xatırlatdı:

1969-cu ildən başlanan missiyada

İlham Əliyev daim Heydər Əliyevin yanında olub, onu hamıdan daha aydın müşahidə edib, fəaliyyətini hər kəsdən daha yaxın görüb. Heydər Əliyevlə bərabər İlham Əliyev də yeniyetməliyindən gəncliyinə qədər Azərbaycanı qarış-qarış dolaşıb, kəndbəkənd gəzib... Qarabağdan Naxçıvana, Lənkərandan Qazaxa qədər hər yerdə ulu öndəri müşayiət edib. Zirvələrin fəthini də, üzləşdikləri nankorluqları da birlikdə yaşayıblar. Siyasətin enişli-yoxuşlu bütün mərhələlərini bərabər addımlayıblar. Qanlı Yanvar günlərində Moskvadakı nümayəndəlikdə də Heydər Əliyevin yanında o dayanmışdı.

İlham Əliyev üçün Heydər Əliyev həm də böyük bir məktəb, örnək idi. Azərbaycanın mövcud uğurlarının, inkişafının qayəsində də məhz bu mükəmməl təcrübə dayanır!

Prezident İlham Əliyev qəbuldakı nitqində ulu öndərin fəaliyyətini iki dövrə bölərək qeyd etdi ki, Heydər Əliyev hər dəfə Azərbaycanı tənəzzüldən, anarxiyadan, xaosdan inkişafa, tərəqqiyə doğru apardı.

Heydər Əliyevin ilk idarəçiliyi 13 il 4 ay çəkdi. Bu epoxanı tam mənasında dərk edə bilmişikmi? Deyəsən, bu mərhələ də tarixin qiymətini dolğunluğu ilə almayıb. 46 yaşlı Heydər Əliyev qısa müddət ərzində özünü sadə azərbaycanlının mifik təfəkküründəki adil hökmdarın müasir prototipi, ədalət mücəssəməsi və canlı idarəçilik ensiklopediyası kimi təsdiq etdi. Qorxmalı olan ondan qorxur, sadə vətəndaş sevir, vəzifəli şəxslər isə fəaliyyətlərini Əliyev metodları ilə qururdular. Bu İnsan əsl azərbaycanlı, əsl dövlət xadimi, əsl lider örnəyi yaratdı. Vətəndaş qürur duymağa rəhbər, bənzəməyə kamil nümunə, problemlərinin həllini bacaran həmdəm tapmışdı.

Həmin illərin uğur təzahürləri tək Azərbaycanın iqtisadi gücünün artırılıb, iqtisadi muxtariyyətin bərqərarı ilə yekunlaşmadı. Bu, milli-mənəvi, mədəni, ədəbi yüksəlişlərlə, əsl azərbaycanlı düşüncə tərzinin və şüurunun yaranması ilə davam etdi. Saxta beynəlmiləlçilik dalğasında milli mənliyini itirən, dilini unudan, kimliyini danan, tarixindən imtina edən, əcdadından dönən... azərbaycanlının qarşısında Heydər Əliyevin kəskin və sərt mövqeyi dayanmışdı. Artıq Azərbaycanda Azərbaycan ruhu və azərbaycanlı mahiyyəti hakim idi. Azərbaycan heç vaxt olmadığı kimi azərbaycanlıların idi. Milli ruh, milli mənəviyyat, milli keçmiş, milli intibah artıq adi söz deyildi, bunlar cəmiyyətin və vətəndaşın əsas xüsusiyyət göstəriciləri idi. Heydər Əliyev Azərbaycanı müstəmləkə kimi deyil, iqtisadi və milli-mənəvi muxtariyyatı olan ölkətək yaşadırdı.

Prezident İlham Əliyev ulu öndərin 1993-2003-cü illərdəki ikinci hakimiyyət mərhələsini “dövlətin əsaslarının qoyulduğu, müstəqilliyin bərqərar olduğu” dövr kimi səciyyələndirərkən tarixi prosesləri, xaosdan qurtuluşa keçidin çətinliklərini xatırlatdı. Həqiqətən də bunlar qarşıdakı dövrlərdə yenidən bu sınaqlara məruz qalmamaq üçün heç zaman unutmamalı olduğumuz tarixi dərslərdir!

23 il öncə başlanan ikinci qurtuluş missiyası ilə Heydər Əliyev Azərbaycana həqiqi müstəqillik, Milli Ordu, əsgərə ehtiram, qürur bəxş etdi. Heydər Əliyev məmləkətinə sabitlik, siyasi islahatlar, demokratikləşmə, iqtisadi yüksəliş, sosial inkişaf gətirdi. Heydər Əliyev vətəndaşına ən ali hüquq və azadlıqlar, sərbəstlik, təkmil Konstitusiya, azad və ədalətli seçkilər, xalqın səsi ilə ərsəyə gələn parlament verdi. Heydər Əliyev MDB-də ilk dəfə olaraq torpaq islahatı apardı və torpağı minilliklərlə ölçülən tariximizdə ilk dəfə olaraq kəndliyə təmənnasız bağışladı. Heydər Əliyev nefti “fəlakət mənbəyi”ndən yüksəlişin əsas amilinə və ümumxalq sərvətinə çevirdi, millətin və dövlətin əsrlər boyu davam edəcək intibahının və təhlükəsizliyinin əsas təminatı etdi. Heydər Əliyev şəffaf özəlləşdirmə prosesinin banisi oldu, xalqı mülkiyyətçiyə, sahibkara, pul yiyəsinə çevirdi, halallıqla dolanmağı və çörək qazanmağı öyrətdi. Heydər Əliyev Azərbaycana milyardlarla dollar həcmində sərmayə, zəngin valyuta ehtiyatı gətirdi.

Heydər Əliyev məcburi köçkünü bataqlıqdakı çadırdan müasir evlərə köçürdü, onların öz doğma yurdlarına dönmələri üçün isə dünyanı, beynəlxalq təşkilatları qarış-qarış gəzərək Azərbaycanın haqq səsini qəbul etdirdi və Ermənistanın təcavüzkar siyasətini ifşa edərək, qələbəmizin siyasi, diplomatik və informativ zəminini formalaşdırdı. Ən əsası isə, xalqda böyük zəfərə inam yaratdı. Heydər Əliyev Azərbaycan kəndlisini yoxsulluqdan çıxararaq övladlarını normal dolandıran ailə başçısına çevirdi, sabahına inamsızlığı daha uğurlu perspektivə olan ümidlə əvəzlədi, ruh düşkünlüyünü aradan qaldırdı. Heydər Əliyev Azərbaycanda vətəndaş qarşıdurmasını yox etdi, vətəndaş birliyini, sülhünü və həmrəyliyini yaratmaq məqsədilə on minlərlə insana amnistiya və əfv tətbiq etdi, hətta onun fiziki qəsdinə çalışan cinayətkarları bağışladı.

Heydər Əliyev Azərbaycan insanına güclü və qüdrətli dövlət, Azərbaycana isə uğrunda canından keçməyə hazır olan vətəndaşlar bəxş etdi. Heydər Əliyev elə bir siyasi kursun əsasını qoydu ki, bu kurs Azərbaycan durduqca məmləkətimizin dövlətçilik konsepsiyası kimi yaşayacaq.

Ən nəhayət, Heydər Əliyev Azərbaycana elə bir layiqli davamçı bəxş etdi ki, qurduğu dövlət və yaşamaq haqqı verdiyi millət bu gün ona - Prezident İlham Əliyevə alternativsiz inam, etimad ünvanı kimi yanaşır!

İndi Heydər Əliyev qurduğu dövlətin, yaşatdığı və ucaltdığı millətin əbədi rəhbərinə çevrilib. O, Azərbaycanın əbədiyyətinə çevrilməyə layiqli ömür yaşadı və bu haqqı fəaliyyəti, əməlləri ilə qazandı. Ona bu haqqı Azərbaycan verdi! Hər kiçik nailiyyətimizə görə də bizim ona böyük borcumuz var! Biz hələ onilliklər sonrası da onun təməlini qoyduğu planların bəhrələrini dadanda bu İnsanın necə böyük Vətəndaş, Şəxsiyyət, Lider olduğunu dərk edəcəyik! O, uğurlarda, zəfərlərdə, Azərbaycan tarixində yaşayacaq!

Prezident İlham Əliyevin rəsmi qəbulda səsləndirdiyi bu fikirlər isə artıq hər birimizin vətəndaş manifestimiz, fəaliyyət çağırışımızdır: “Azərbaycan Heydər Əliyev siyasətini zənginləşdirir, müasir dövrün çağırışlarını nəzərə alaraq bu dövrə uyğunlaşdırır, ancaq ümumi siyasi xətdən kənara çıxmır. Bizim siyasi xəttimiz müstəqilliyin möhkəmlənməsidir... Biz daha da güclü olmalıyıq və bu yolla gedirik. Bu yol Heydər Əliyev yoludur. Biz onun siyasətinə sadiqik, bu yolla gedirik və bundan sonra da gedəcəyik, Azərbaycan xalqının xoşbəxt gələcəyini təmin edəcəyik”.

Heydər Əliyevin taleyi əslində bir insanın ömür yolu deyil, bu, Azərbaycanın tarixidir, qurtuluş, inkişaf, milli tərəqqi salnaməsidir! Bu taleyi - bu tarixi indi Prezident İlham Əliyevi yaşayır, yaradır! Dünyanın ən böyük azərbaycanlısının sözüdür: “Nə qədər ki Azərbaycan var, mən də varam. Mən isə Azərbaycanda əbədi olacağam!”

Bu əbədiyaşarlıq həm də Azərbaycanın milli intibahının ən əsas təminatıdır!..

İxtiyar HÜSEYNLİ,

Azərbaycan.- 2016.- 11 may.- S. 1.