Azərbaycanlı alimin Moskvada kitabı çap edilib

Rusiya Federasiyası Mədəniyyət Fondunun “İnsan” nəşriyyatında Milli Məclisin deputatı, Azərbaycan Milli Elmlər Akademiyasının Qafqazşünaslıq İnstitutunun direktoru professor Musa Qasımlının iki hissədən ibarət “Azərbaycan Respublikasının xarici siyasəti (1991-2003)” kitabı rus dilində çap edilib.

Azərbaycanın Xarici İşlər Nazirliyinin qərarı ilə “Azərbaycan Respublikasının diplomatiya tarixi” seriyasından hazırlanan bu əsər 1991-2003-cü illər xarici siyasət tariximizi əhatə edir. Əsərdə Azərbaycan, Rusiya, Gürcüstan, Türkiyə, ABŞ, Böyük Britaniya və digər ölkələrin, ATƏT-in arxivlərinin, Vyanada BMT-nin və Atom Enerjisi üzrə Beynəlxalq Agentliyin kitabxanalarının materialları əsasında diplomatiyamızın keçdiyi yol tədqiq edilir.

Əsərin birinci hissəsində dağılma ərəfəsində olan SSRİ-nin daxili ictimai-siyasi və beynəlxalq vəziyyəti, ölkəmizin dövlət müstəqilliyinin bərpası, Ermənistan-Azərbaycan, Dağlıq Qarabağ münaqişəsinin həlli üçün Azərbaycan diplomatiyası qarşısında duran vəzifələr, Xəzər dənizinin hüquqi statusunun müəyyənləşdirilməsi istiqamətində diplomatiyamızın mövqeyi və qonşu ölkələrlə münasibətlər araşdırılır. Nəşrin ikinci hissəsində isə Azərbaycanın Avropa, Asiya, Afrika ölkələri, eləcə də ABŞ ilə münasibətləri, beynəlxalq təhlükəsizlik və əməkdaşlıq sistemində tutduğu yer, xarici siyasətdə iqtisadiyyat amilinin rolu və digər məsələlər tədqiq edilir. Diplomatlar, siyasətçilər, beynəlxalq münasibətlər tarixi ilə məşğul olan mütəxəssislər, bu ixtisas üzrə təhsil alan tələbələr üçün nəzərdə tutulan əsər Azərbaycanın dövlət müstəqilliyinin 25 illiyinə dəyərli töhfədir.

Qeyd edək ki, əvvəlcə Bakıda Azərbaycan dilində nəşr edilən kitabın baş redaktoru xarici işlər naziri Elmar Məmmədyarov, redaksiya şurasının üzvləri isə nazir müavinləri Hafiz Paşayev, Araz Əzimov, Nadir Hüseynov, Xələf Xələfov, Mahmud Məmmədquliyev, nazirliyin əməkdaşları Cavanşir Məmmədov və Cavanşir Vəkilovdur.

Elçin CƏFƏROV,

Azərbaycan.- 2016.- 2 noyabr.- S. 4.