Asiyadan Avropaya yol Azərbaycandan
keçir
Son illər həyata keçirilən
mühüm infrastruktur layihələri ölkəmizin tranzit
daşımaçılığında daha üstün
mövqelərə sahib olmasını təmin edib
Respublikamızın tranzit potensialından və onun əlverişli
coğrafi mövqeyindən tam faydalanmaq üçün son
illər ölkə rəhbərliyinin təşəbbüsləri
və xüsusi diqqəti sayəsində kifayət qədər
mühüm islahatlar və irimiqyaslı tədbirlər həyata
keçirilib.
Bir neçə beynəlxalq hava limanının
tikintisi, yeni təyyarə və gəmilərin
alınması, müasir avtomobil yolları şəbəkəsinin
yaradılması və digər bu kimi başa
çatdırılan infrastruktur layihələri ölkəmizin
nəqliyyat imkanlarının güclənməsində
mühüm rol oynayıb. O cümlədən,
respublikamızın tranzit daşımalarda iştirak
imkanlarını genişləndirib.
Həyata keçirilən tədbirlər
müsbət nəticə verir
Bir fakta diqqət yetirməklə həyata keçirilən
tədbirlərin tədricən müsbət nəticə
verdiyini görmək olar. Bu da ilin 9 ayı ərzində
“Bakı Beynəlxalq Dəniz Ticarət Limanı” QSC-də
(Bakı Limanı) göstərilən bütün xidmətlər
üzrə artımların müşahidə
olunmasıdır. Ən çox artım
isə irihəcmli nəqliyyat vasitələrində, o
cümlədən qoşqu və digər avtotexnikanın
daşınması üzrə qeydə alınıb. Belə
ki, keçən ilin müvafiq dövrü ilə müqayisədə
Bakı Beynəlxalq Dəniz Ticarət Limanının xidmətlərindən
istifadə edən bu tipli nəqliyyat vasitələrinin
sayı 3,2 dəfə artıb və əksər
hallarda yükün son ünvanı Qazaxıstan və
Türkmənistan olub. Ümumi yükaşırmanın həcmi
ötən ilin müvafiq dövrünə nisbətdə 41
faiz artaraq 3,25 milyon tona çatıb. Bunun
da 86,8 faizi tranzit yükaşırmanın
payına düşüb. Yük dövriyyəsinin
artması ilə gəmi yanalmalarının sayı da 82 faiz
artıb.
Ümumiyyətlə, ölkələr arasında əlaqələrin
məzmunu zaman-zaman yeni keyfiyyət dəyişikliklərinə
məruz qalsa da, ticari və iqtisadi dəhlizlərin əhəmiyyəti
öz aktuallığını daim qoruyub saxlayır. Hazırda
dünyanın hər yerində istər sərnişin, istər
beynəlxalq yükdaşımalar sahəsində ciddi rəqabətin
olması təsadüfi sayılmamalıdır. Belə şəraitdə böyük tranzit
potensialına malik Azərbaycan müşahidəçi
mövqeyində dayana bilməz. Çünki
tarixi İpək yolunun keçdiyi Azərbaycanın yerləşdiyi
ərazi bütün dövrlərdə Avropa və
Asiyanı, ən uzaq dövlətləri birləşdirən,
strateji ticari-iqtisadi dəhlizlərin qovuşduğu məkanlardan
biri olub. Odur ki, Prezident İlham Əliyevin
qarşıya qoyduğu əsas məqsədlərdən biri
ölkəmizin tranzit mərkəzinə çevrilməsini
tam təmin etməkdir. İlin əvvəlindən
Bakı Beynəlxalq Dəniz Ticarət Limanı vasitəsilə
xidmətlərin həcminin artması ölkəmizin tranzit
yükdaşımaçılığı sahəsində
getdikcə daha üstün mövqelərə sahib olduğunu
göstərir.
Onu da qeyd
edək ki, hələ bir neçə il əvvəl
təsdiq olunmuş “Azərbaycan 2020: gələcəyə
baxış” İnkişaf Konsepsiyasında bildirilir ki, Azərbaycanı
regionun ticarət mərkəzinə çevirmək məqsədilə
ölkənin strateji coğrafi mövqeyindən səmərəli
istifadə etməklə tranzit və nəqliyyat xidmətlərinin
inkişafı, ölkənin bölgələrində
logistika mərkəzlərinin yaradılması nəzərdə
tutulur. Bütün bunlar eyni zamanda istehsal və
investisiya mərkəzi kimi də ölkənin cəlbediciliyinin
artmasına, yeni biznes və məşğulluq
imkanlarının yaranmasına yol açacaq. Bu məqsədlə yerli və beynəlxalq
daşımaların idarə olunması mexanizmi təkmilləşdiriləcək,
ölkənin nəqliyyat sisteminin beynəlxalq nəqliyyat
sisteminə inteqrasiyası genişləndiriləcək, əhaliyə
göstərilən nəqliyyat xidmətlərinin keyfiyyəti
artırılacaq. İllər
ötdükcə qarşıya qoyulan vəzifə və məqsədlərin
həyata vəsiqə alması günümüzün
reallığıdır.
Qitələri birləşdirən
körpü
Qeyd edildiyi kimi, qarşıya qoyulan vəzifələrin
bir qismi uğurla yerinə yetirilib. Ölkəmizdə
tranzit potensialının artırılması istiqamətində
bir sıra irimiqyaslı layihələr həyata
keçirilib, bu sahəyə irihəcmli investisiyalar yönəldilib.
Bakıda və ölkə regionlarında beynəlxalq hava
limanlarının, “Şərq-Qərb” və “Şimal-Cənub”
nəqliyyat dəhlizləri istiqamətində beynəlxalq əhəmiyyətli
avtomobil yollarının tikintisi və dəmir yolu xətlərinin
yenilənməsi Azərbaycanın xarici iqtisadi əlaqələrinin
genişlənməsində mühüm rol oynayır. Ən əsası, bunlar Azərbaycanın tranzit
potensialını və tranzit daşımalarında
iştirak imkanlarını genişləndirir. Digər tərəfdən,
İpək yolu üzərində geniş iqtisadi
zolağın yaradılmasının fəal dəstəkçisi
olan respublikamız digər dəhlizlərlə müqayisədə
yüklərin Azərbaycan ərazisindən keçməklə
müxtəlif istiqamətlərə tranzit
daşımalarının səmərəli təşkilinə
etibarlı təminat verir, daha əlverişli şərtlərlə
qısa müddətdə, təhlükəsiz və
vaxtında çatdırılmasına, tranzit
daşımalarının həcminin dəfələrlə
artmasına imkan yaradır. Prezident İlham Əliyevin qeyd
etdiyi kimi: “Azərbaycan Asiyanı Avropa ilə birləşdirən
körpüdür. Biz indi öz nəqliyyat
infrastrukturumuzu möhkəmləndiririk. Bizim
dəniz nəqliyyatına, dəmir yoluna böyük
investisiyalar qoyulur. Bir sözlə, nəqliyyat
sektoru gələcəkdə böyük rol oynayacaqdır.
Regionda digər mühüm işlər də məhz
bununla bağlıdır”.
Azərbaycanın önəm verdiyi beynəlxalq nəqliyyat
layihələrindən biri “Şimal-Cənub” Beynəlxalq Nəqliyyat
Dəhlizidir.
Ölkəmizin tranzit potensialının
artırılması istiqamətində görülən
işlər bu nəqliyyat dəhlizinin Azərbaycandan keçən
hissəsində işlərin sürətləndirilməsini
zəruri edib. Bu məqsədlə Prezident
İlham Əliyev 2015-ci il dekabr ayında “Şimal-Cənub”
Beynəlxalq Nəqliyyat Dəhlizinin Azərbaycan
Respublikasının ərazisindən keçən hissəsində
işlərin sürətləndirilməsi haqqında” sərəncam
imzalayıb. Sərəncama əsasən,
üzərimizə düşən vəzifəni layiqincə
yerinə yetirmək üçün bütün qüvvələr
səfərbər olunub.
Şimali
Avropanı Cənub-Şərqi Asiya ilə birləşdirən
“Şimal-Cənub” Beynəlxalq Nəqliyyat Dəhlizi Azərbaycan
üçün çox önəmli marşrut olaraq
respublikamızın tranzit potensialından yüksək səviyyədə
bəhrələnməyə imkan verəcək. Bu layihə Hindistandan başlayaraq İrandan
keçməklə Azərbaycan, Rusiya, Fin körfəzinə
qədər ərazini əhatə edir. Azərbaycan
isə “Şimal-Cənub” nəqliyyat dəhlizi çərçivəsində
dünyanın böyük iqtisadiyyatlarını birləşdirəcək.
Bu layihənin gerçəkləşdirilməsi
yüklərin ünvanına çatdırılma müddətlərini
2-3 dəfə azaldacaq.
Azərbaycan həm də “Şərq-Qərb” nəqliyyat
dəhlizi üzərində yerləşir. 1998-ci ildə
ulu öndər Heydər Əliyevin təşəbbüsü
ilə imzalanmış Avropa-Qafqaz-Asiya Beynəlxalq Nəqliyyat
Dəhlizi - TRASEKA müqaviləsinin məqsədi bir zamanlar
Avropa və Asiya arasında ticarətin
aparıldığı İpək Yolunun bərpasını
təmin etmək idi. Azərbaycan dövləti
indiyədək bu istiqamətdə də üzərinə
düşən işləri layiqincə yerinə yetirib.
Azərbaycan həm də tranzit
imkanlarının genişlənməsinə yol açan təşəbbüslərin
müəllifidir. Bu təşəbbüslərdən
biri Bakı-Tbilisi-Qars (BTQ) dəmir yolu layihəsidir. BTQ-nin istifadəyə verilməsi ilə konteyner
qatarlarının Çindən birbaşa Avropaya və
Aralıq dənizinə getməsi mümkün olacaq.
Bu gün dünyanı gəmiçiliksiz təsəvvür
etmək mümkün deyil. Dəniz nəqliyyatı
ticarətin və qloballaşmanın əsasına
çevrilib. Gəmilərlə qida məhsulları,
texnologiyalar, dava-dərman və digər vacib mallar göndərilir.
Dünyada, xüsusən inkişaf etməkdə
olan ölkələrdə əhalinin sayı durmadan artır,
bununla əlaqədar ucuz başa gələn və səmərəli
dəniz daşımaları iqtisadi artım və davamlı
inkişaf üçün getdikcə daha çox əhəmiyyət
kəsb edir. Dəniz daşımaları
bütün dünyada həyat səviyyəsinin sürətlə
artmasında mühüm rol oynayır.
Azərbaycanda da dəniz nəqliyyatının
inkişafına xüsusi diqqət yetirilir. Ələt qəsəbəsində
tikilməkdə olan yeni Bakı Beynəlxalq Dəniz Ticarət
Limanı Kompleksi tezliklə regionun avtomobil, dəmir və dəniz
yollarının kəsişmə nöqtəsinə
çevriləcək. Limanın inşasının
birinci fazası 2017-ci ildə başa çatacaq və
Çindən tutmuş Mərkəzi Asiya və Avropayadək
daşımalara töhfəsini verəcək. Birinci mərhələdə limanın
yükaşırma qabiliyyəti ildə 10 milyon ton yük və
50 min konteynerdən ibarət olacaq. İkinci mərhələdə
limanın yükaşırma gücü 17 milyon ton yük və
150 min konteynerə, üçüncü mərhələnin
yekununda isə 25 milyon ton yük və 1 milyon konteynerə
çatdırılacaq. Limanda layihə üzrə
logistika mərkəzinin yaradılması da mühüm əhəmiyyət
kəsb edir.
Prezident
İlham Əliyevin 18 mart 2015-ci il tarixli sərəncamı
ilə yaradılmış “Bakı Beynəlxalq Dəniz Ticarət
Limanı” Qapalı Səhmdar Cəmiyyəti Transxəzər
beynəlxalq nəqliyyat marşrutu, “Şərq-Qərb” və
“Şimal-Cənub” nəqliyyat dəhlizləri kimi layihələrin
fəal iştirakçısıdır. “Bakı Beynəlxalq
Dəniz Ticarət Limanı” QSC ilə Cibuti Limanı və
Azad Ticarət Zonası, o cümlədən
Bolqarıstanın Limanlar İnfrastrukturu şirkəti ilə
anlaşma memorandumlarının imzalanması isə limanlar
arasında təcrübə mübadiləsi də həyata
keçirilməsinə yol açacaq, liman idarəçiliyi
və heyətin təlim və tədrisi sahələrində
əməkdaşlıq imkanlarını artıracaq.
Yükdaşıma prosedurları sadələşdirilib
Ölkənin
nəqliyyat sektorunda icra edilən layihələrlə
yanaşı, Azərbaycan Respublikasının ərazisindən
keçən tranzit dəhlizlərin rəqabət qabiliyyətinin
və səmərəliliyinin artırılması, həmin dəhlizlərə
əlavə tranzit yük axınlarını cəlb etmək
istiqamətində bir sıra tədbirlərin görülməsi,
o cümlədən yükdaşımaların keyfiyyətinin
yüksəldilməsi, yüklərin çatdırılma
müddətinin və nəqliyyat xərclərinin
azaldılması da vacibdir.
Odur ki,
respublikamızda dəmir yolları, dəniz nəqliyyatı,
dəniz limanları və dəniz terminalları vasitəsilə
tranzit yüklərin daşınması sahəsində vahid,
çevik və şəffaf tarif siyasətinin həyata
keçirilməsi, sərhədkeçmə prosedurlarının
və daşıma proseslərinin
asanlaşdırılması, habelə bu sahədə fəaliyyət
göstərən dövlət qurumları arasında əlaqələndirmə
işlərinin təmin edilməsi məqsədi Prezident
İlham Əliyevin 21 oktyabr 2015-ci il tarixli sərəncamı
ilə Tranzit Yükdaşımalar üzrə Koordinasiya
Şurası yaradılıb. Respublikamızın ərazisindən
dəmir yolları, dəniz nəqliyyatı, dəniz
limanları və dəniz terminalları vasitəsilə
tranzit yüklərin daşınmasında “bir pəncərə”
prinsipinin tətbiqi üzrə vahid dövlət
orqanının səlahiyyətlərinin həyata
keçirilməsi bu quruma həvalə edilib.
Tranzit
Yükdaşımalar üzrə Koordinasiya Şurası və
Azərbaycanın yükdaşımalarda iştirak edən
müvafiq qurumları arasında aparılan məhsuldar əməkdaşlıq
nəticəsində Azərbaycan üzərindən
daşınan tranzit yüklər üçün əlverişli
şərait yaradılıb, yükdaşıma
prosedurları sadələşdirilib, harmonikləşdirilib,
tariflərdə şəffaflığa və endirimlərin tətbiqinə
nail olunub, bu işlərin nəticəsi olaraq tranzit yüklərin
həcmində artım müşahidə edilir.
Son illər
Azərbaycanın tranzit potensialını tam hərəkətə
gətirmək üçün xeyli iş görülüb. Bütün bunlar, öz növbəsində ölkəmizin
regionda nəqliyyat-logistika qovşağına çevrilməsinə
töhfə verir. Təbii ki, ölkəmizin
nəqliyyat dəhlizlərinin potensialından səmərəli
istifadə tezliklə bu sahənin qeyri-neft sektorunda çəkisinin
əhəmiyyətli dərəcədə artması ilə nəticələnəcək,
Azərbaycana valyuta axınını sürətləndirəcək.
Rəşad CƏFƏRLİ,
Azərbaycan.- 2016.- 9 noyabr.- S. 1, 4.