Sumqayıtda rəsm festivalı keçirilib

Dünən Sumqayıt şəhər rəsm qalereyasında Əli Eminlinin fərdi layihəsi əsasında “Ani fantaziya” rəsm festivalı keçirilib.

Rəsm festivalının əsas məqsədi istedadlı gənclərə öz bacarıqlarını, fantaziya və yaradıcılıqlarını göstərə biləcəkləri bir mühitin yaradılması, yeni dostluqlar qazanmaları, əl işlərinin sərgilənməsi və incəsənətin təbliğidir.

Layihənin fərqli cəhəti mövzunun festival gününə qədər açıqlanmaması, festivalda gənclərin çəkəcəyi rəsmlərin mövzusunun həmin an elan edilməsi olub.

Mövzu isə dünyada və ölkəmizdə aktual olan “Multikulturalizm, Sülh və Tolerantlıq” olmuşdur. Mövzunun seçilməsinə səbəb ölkəmizdə 2016-cı ilin “Multikulturalizm ili” olması, bu məsələ ilə bağlı dünya ölkələrindəki problemlərə diqqət çəkmək, respublikamızda isə müxtəlif millətlərin bir arada tolerant və sülh şəraitində yaşamalarını bütün dünyaya nümunə kimi göstərmək olmuşdur.

Müsabiqə xarakteri daşıyan festivalda onlarca gənc iştirak etmişdir.

Akif ƏLİYEV,

Azərbaycan.- 2016.- 16 noyabr.- S. 12.