Zəhmət hədər getmir

5 oktyabr Beynəlxalq Müəllimlər Günüdür

Müəllim peşəsi hər zaman seçilib. Bu peşənin davamçıları sırasında “Tərəqqi” medalı ilə təltif olunmuş Elmira Hacıyeva da var. Zaqatala rayonunun Kəpənəkçi kəndində dünyaya göz açan Elmira müəllimə ilk təhsilini kəndlərindəki 8 illik məktəbdə alıb. Sonra Qandax kənd orta məktəbini bitirib, Gəncə Dövlət Pedaqoji Universitetinin Tarix fakültəsinə daxil olub.

1976-cı ilin 1 sentyabr gününü Elmira müəllimə belə xatırlayır: “Təyinatım rayonumuzun Yengiyan kənd orta məktəbinə verilmişdi. Burada tarix fənnini tədris etməli idim. İlk dəfə müəllim kimi sinfə daxil olmağın həyəcanını indi də unuda bilmirəm. Lakin bu, çox çəkmədi. Az vaxtda şagirdlərlə aramızda xoş münasibət yarandı.

Elmira müəllimə İ.Qayıbov adına Efir yağları sovxoz-zavod orta məktəbində, Ş.Qurbanov adına 3 saylı orta məktəbdə, Azərbaycan Müəllimlər İnstitutunun Zaqatala filialında işləyib. 2003-2009-cu illərdə Zaqatala Rayon İcra Hakimiyyətində Təhsil, səhiyyə və mədəniyyət şöbəsinin referenti vəzifələrində fəaliyyətini davam etdirib. Bir neçə il sonra Ş.Qurbanov adına 3 nömrəli tam orta məktəbə direktor göndərilib və etimadı burada da doğruldub.

Təkcə bu il həmin təhsil ocağından ali məktəbə sənəd verən abituriyentlərdən 29 nəfəri tələbə adını qazanıb. 6 nəfər orta ixtisas məktəblərinə daxil olub. Onlardan 6 nəfəri 600-dən, 5 məzun 500-dən çox bal toplayıblar. Maraqlıdır ki, 600-dən yuxarı bal toplayan məzunların hamısı bir sinfin şagirdləridir. Ümumilikdə həmin sinifdə təhsil alan 24 şagirddən 20 nəfəri ali məktəbə qəbul olub. 18 nəfər respublikamızda, 2 nəfər xarici ölkələrin ali məktəblərində təhsillərini davam etdirir.

Elmira müəllimə məktəbə rəhbərlik etməklə bərabər, tarix fənnini də tədris edir.

Ə.XASAYOĞLU,

Azərbaycan.-2016.- 5 oktyabr.- S.7.