NDU-nun müəllimi dünya çempionatında gümüş
medal qazandı
Bu
günlərdə Finlandiyanın Seynyajoki şəhərində
veteranlar arasında yunan-Roma güləşi üzrə
növbəti dünya çempionatı başa
çatmışdır. Dairəvi sistem üzrə
keçirilən yarışlarda ən çox qələbə
qazanan idmançı qalib elan olunurdu. Yarışlarda 44
ölkədən 250 güləşçi 7 dəst
mükafat uğrunda mübarizə aparmışdır.
Ölkəmizi
dünya çempionatlarının 7 qat
mükafatçısı Əlisahib Əliabbasov (76 kq), Məmməd
Əliyev (85 kq) və Rövşən İsmayılxanlı
(130 kq) təmsil etmişlər.
Bundan
əvvəlki çempionatlarda olduğu kimi, bu dəfə də
azərbaycanlı pəhləvanlar vətənə əliboş
qayıtmamışlar. Hüquq mühafizə
orqanlarının sabiq əməkdaşı, hazırda
Naxçıvan Dövlət Universitetinin müəllimi Rövşən
İsmayılxanlı yer aldığı D qrupunda
gümüş medal qazanmışdır. O, ardıcıl
olaraq macarıstanlı güləşçi Ferents Kirali, fin
pəhləvanı Juha Mikkonen və belaruslu idmançı
Sergey Kudryavtsevi məğlubiyyətə
uğratmışdır. Həlledici görüşdə
Rövşən İsmayılxanlının rəqibi ikiqat
olimpiya çempionu polşalı Andcey Vronski idi. Bu
qarşılaşma rəqibin xeyrinə bitmiş və azərbaycanlı
güləşçi dünya çempionatının
gümüş medalına layiq görülmüşdür.
Qeyd
edək ki, Rövşən İsmayılxanlı bundan əvvəlki
çempionatlarda iki dəfə bürünc medal
qazanmışdı.
Digər
təmsilçilərimizə gəldikdə F qrupunda yer alan
Əlisahib Əliabbasov ilk görüşündə
İsveç təmsilçisi Eduin Tuomistoya, A qrupunda güləşən
Məmməd Əliyev almaniyalı Andreas Kiferə qalib gələrək
yarışa qələbə ilə başlamış, lakin
sonradan aldıqları zədə ucbatından medalların bir
addımlığında mübarizəni dayandırmalı
olmuşlar.
Azərbaycan.-2016.- 5 oktyabr.- S.7.