Rauf Məmmədov Amerikada “Milyonçular” open-yarışında qalib oldu

Azərbaycanlı beynəlxalq qrossmeyster, ikiqat Avropa çempionu Rauf Məmmədov Amerikanın Atlantik Siti şəhərində keçirilmiş “Milyonçular” şahmat festivalı çərçivəsində open-yarışının qalibi olmuşdur. O, yekunda 6,5 xal toplayaraq əlavə göstəricilərə görə amerikalı qrossmeysterlər Varujan Akobyan, Ceffri Ksünq, Yaroslav Jerebux və kubalı şahmatçı Lazaro Bruzonu geridə qoymuşdur.

İsveçrə sistemi üzrə keçirilən yarışlar zamanı Rauf Məmmədov ABŞ-ı təmsil edən erməni əsilli V.Akobyan, rusiyalı qrossmeysterlər Dmitri Şevelyov, Aleksandr İvanov, amerikalı şahmatçı Konrad Holt üzərində qələbə qazanmışdır.

Amerika turnirinin yekununa görə, Rauf Məmmədov öz reytinqinə 5,9 xal əlavə etmişdir.

Hazırda azərbaycanlı qrossmeyster dünya reytinqində 2683,9 xal göstərici ilə tanınır.

Azərbaycan.-2016.- 13 oktyabr.- S.8.