Əsl tolerantlıq mühiti

“Rusiya Kinosu Günləri”nin iştirakçıları Bakıdan bu təəssüratla ayrıldıqlarını bildirdilər

Mədəni əlaqələrin vacib faktora çevrilməsi günün reallıqlarından biridir. Azərbaycan xalqının yaxın-uzaq qonşularla daim mədəni, humanitar, sosial-iqtisadi əlaqələrinin möhkəmliyi dostlarının sayının artması, mədəniyyətinin və incəsənətinin daha geniş arenada təbliği baxımından da təqdir olunur.

Rusiya ilə tarixi və mədəni əlaqələrin daha dərin köklərə malik olması isə danılmaz faktlardandır. Keçmiş sovetlər birliyi dövründən qalma bu ənənə qorunub saxlanmaqla günümüzədək davam etdirilməkdədir.

Oktyabrın 10-dan 14-dək paytaxt Bakıdakı Nizami Kino Mərkəzində “Rusiya Kinosu Günləri”nin keçirilməsi də bu ənənənin yüksək səviyyədə davam etdirilməsini bir daha təsdiqlədi. “Festival xarakterli beynəlxaq tədbirin iştirakçıları Azərbaycanda əsl tolerantlıq mühitinin şahidinə çevrildilər”. Bu fikir Rusiyanın tanınmış teatr və kino xadimi, rejissor Yuri Vasilyevə məxsusdur. Kino günlərinə özünün “Qəhrəman” filmi ilə qatılan Y.Vasilyevin Bakı və müstəqil Azərbaycan haqqında əfsanəyə bənzər eşitdiklərinin reallığı özü demişkən, onda qeyri-adi hisslər oyadıb: “Bəli, bu gün nostalji hisslər yaşadım. “Hilton” hotelində yerləşdiyimiz zaman 40 il bundan əvvəlki Bakı dayandı gözümün önündə. Burada “İnturist” mehmanxanası vardı. 40 il əvvəl “Satira” teatr truppamızla həmin mehmanxanada qalırdıq. Bu gün həmin məkanda tam yeni görkəmdə bir hotel var. Azərbaycanın son illər tamamilə dəyişməsi, sürətli inkişafı, Avropaya inteqrasiyası müstəqilliyinin bəhrəsidir”.

Rusiyalı qonaq xalqımızın zəngin milli-mənəvi dəyərlərə malik, xüsusən mədəniyyət və incəsənətdə əvəzsiz sərvətlər sahibi olmasını diqqətə çatdırarkən, bəzi vacib məsələlərə də toxunub. Y.Vasilyev onu da vurğulayıb ki, hazırda çalışdığı teatrın 30 ildir ki, direktoru həmyerlimiz Məmməd Ağayevdir. Bu həm də o deməkdir ki, xalqınızın yetirmələri istedadları ilə dünyada məşhurdurlar. Bakı isə fantastik şəkildə dəyişib. Azərbaycan kinosu haqqında fikirlərini bölüşən rejissor onu da vurğulayıb ki, sovetlər dövründə Azərbaycan filmləri çox populyar idi: “Amma açıq deyəcəyəm, bu gün Moskvada sizin filmlər haqqında demək olar ki, məlumat yoxdur. Odur ki, Rusiyada da mütləq “Azərbaycan Kinosu Günləri” təşkil edilməlidir. Festivallarda və həmkarlar arasında biz bir-birimizi tanıya, məlumat ala bilərik. Əsas tamaşaçıların məlumatlı olmasıdır. Onlar üçün Azərbaycanın tarixi, milli-mədəni dəyərləri maraqlıdır. Onlar bu gün xalqın tarixini və incəsənətini bilməli, tanımalıdırlar. Qarşılıqlı mədəni mübadilə həmişə dostluğa xidmət edib”.

Bakının, bütövlükdə isə Azərbaycanın mədəni, tolerantlıq mühiti kimi nümunəyə çevrilməsi rusiyalı qonaqlarda xoş təəssürat yaradıb.

Məhəmməd NƏRİMANOĞLU,

Azərbaycan.- 2016.- 15 oktyabr.- S.12.