Sosial infrastrukturun yaradılması yenə də diqqət mərkəzində olacaq

Bu fikir Nazirlər Kabinetinin son iclasında qətiyyətlə səsləndi

Ötən ilə yekun vurularkən və qədəm qoyduğumuz ilin əsas vəzifələrinə nəzər salarkən infrastruktur layihələrinin də diqqət mərkəzində olduğu aydın görünür. İnsanların rahat yaşayışına xidmət edən sosial infrastrukturun yaradılması xüsusi önəm daşıyır. Elektrik enerjisi qurğularının tikilməsi, ən ucqar kəndlərə qaz xətlərinin çəkilməsi, yeni yolların salınması, məktəblərin, tibb müəssisələrinin inşa edilməsi - bunlar sözügedən infrastrukturun yalnız bir hissəsidir.

Nazirlər Kabinetinin 2015-ci ilin yekunlarına və qarşıda duran vəzifələrə həsr olunmuş iclasında Prezident İlham Əliyev həm giriş, həm də yekun nitqində bu məsələdən ətraflı bəhs etmişdir. Yaradılmış sosial infrastrukturu qeyd etməklə yanaşı, bu işin davamlı olduğunu demişdir: “Sosial infrastruktur layihələri Dövlət İnvestisiya Proqramında nəzərdə tutulmuşdur və onlar icra edildi, bu il də icra edilməlidir”.

2015-ci ildə 3 milyard 659 milyon manat əsaslı dövlət vəsaitləri qoyuluşu xərcləri hesabına elm, təhsil, səhiyyə, mədəniyyət, idman və digər sosial-mədəni və məişət təyinatlı obyektlərin, ölkənin əsas enerji, su və qaz təchizatı, nəqliyyat, kommunal, meliorasiya infrastrukturlarının tikintisi və yenidən qurulması layihələrinin icrası davam etdirilib. Ötən il əsaslı dövlət vəsaitləri hesabına eləcə də 25 məktəb, 10 uşaq bağçası, 50 məktəbdə əlavə korpuslar və sinif otaqları, bir incəsənət məktəbi tikilib istifadəyə verilib. Neçə-neçə məktəb, kollec və uşaq bağçasının binaları yenidən qurulub.

Bu siyahını xeyli artırmaq da olar. Çünki sosial infrastruktur layihələri ölkənin hər yerində və bütün sahələrdə həyata keçirilib. Məsələn, qazlaşdırma təxminən 90 faizə çatıb. “Azərişıq” bölgələrdə fəal iş aparır. Nəticədə son vaxtlarda rayon və kəndlərdə elektrik enerjisi ilə təchizat daha da yaxşılaşıb. Hədəf isə bölgələrin işıq təminatının paytaxtın səviyyəsinə çatdırılması, elektrik enerjisinin insanlara fasiləsiz çatdırılmasıdır. Məhz buna görə də ölkədə yeni generasiya gücləri yaradılıb.

Keçən il 300 subartezian quyusunun qazılması Azərbaycan əhalisinin su ilə təminatının ildən-ilə daha da yaxşılaşmasının göstəricisidir. Bundan əlavə, 2015-ci ildə 60-a yaxın kənddə sutəmizləyici qurğular quraşdırılıb. Beləliklə, indiyədək işə salınmış sutəmizləyici qurğuların sayı 384-ə çatıb. Nəticədə kəndlərdə sudan korluq çəkən minlərlə insan təmiz su ilə təmin olunub.

Su xətlərini “Azərsu” çəksə də, bu qurumun olduqca böyük layihələrin icra edilməsində texniki imkanları kifayət etməz. Odur ki, Prezident İlham Əliyevin dediyi kimi, “burada da müxtəlif şirkətlər cəlb edilməlidir. Belə olan halda biz bunu daha da ucuz qiymətə, daha böyük səmərə ilə şəffaf, açıq şəkildə icra edəcəyik”.

Bu, yolların tikintisinə də şamil olunur. İmkanı olan şirkət - istər yerli, istərsə də xarici - bu işdə iştirak etməlidir. Dövlət başçısı hökumətin həmin məsələlərə ciddi nəzarət etməsini tapşırmışdır.

Yeri gəlmişkən vurğulayaq ki, regionlarda, xüsusilə kənd yerlərində yaşayan əhalinin ticarət-iqtisadi münasibətlərində, rahat hərəkətinin təmin edilməsində yol infrastrukturunun necə olması mühüm əhəmiyyət daşıyır. Bu baxımdan keçən il Azərbaycanın müxtəlif regionlarını, kənd və qəsəbələrini birləşdirən, ümumi uzunluğu 348 kilometr olan avtomobil yollarının əhalinin istifadəsinə verilməsi önəmli faktdır.

Paytaxtda və Abşeron yarımadasında yaşayan əhalinin gediş-gəlişində və şəhərdaxili hərəkətində mühüm rol oynayan Bakı-Sumqayıt-Bakı dəmiryol xəttinin yenidən qurulması, metronun “Elmlər Akademiyası” stansiyasının ikinci çıxışının inşası və digər tədbirlər də bu qəbildən olan yeniliklərdir. Keçən il eləcə də Bakıdakı Ziya Bünyadov prospektinin tikintisi və genişləndirilməsi avtomobillərin hərəkətini asanlaşdırıb. Qala-Pirallahı yolları yenidən tikilərək istismara verilib.

Neftin ucuzlaşması nəticəsində ölkənin gəlirlərinin azalmasına baxmayaraq, dövlət Azərbaycan vətəndaşının rifahına və sağlamlığına xidmət edən infrastruktur layihələrinə diqqəti azaltmayıb. Məsələn, keçən il ölkədə səhiyyə müəssisələrinin tikintisi və yenidən qurulması da ardıcıllıqla davam etdirilib. 60-a qədər tibb müəssisəsi inşa edilib və təmir olunub. Ağsu Rayon Mərkəzi Xəstəxanasının tikintisinin, Gəncədə, Mingəçevirdə və Göyçayda xəstəxanaların əsaslı təmirinin keçən il başa çatdırılmasını misal göstərmək olar.

Lakin dünyada neftin qiymətinin aşağı düşməsi və Azərbaycanın özündən asılı olmayan səbəblərdən ölkədə ortaya çıxan çətinliklər hazırkı mərhələdə digər məsələlər kimi infrastruktur layihələrinin həyata keçirilməsinə də yaranmış vəziyyət baxımından yanaşmağı tələb edir. Prezident İlham Əliyev Nazirlər Kabinetinin iclasında bu barədə ətraflı bəhs edərək demişdir: “Biz çalışırdıq ki, əsas infrastruktur layihələrini maksimum tez bir zamanda icra edək və buna nail ola bilmişik. Bu gün deyə bilərəm ki, Azərbaycanda əsas infrastruktur layihələri icra edilibdir. Elektrik enerjisi ilə bağlı generasiya güclərimiz kifayət qədər böyükdür, qazlaşdırma uğurla aparılır, içməli su layihələri, yolların tikintisi. Yəni, Dövlət Neft Fondunun transfertlərinin məqsədi bundan ibarət idi ki, infrastruktur, biznesin inkişafı üçün daha yaxşı şərait yaradılsın və biz buna nail ola bilmişik. İndiki şəraitdə biz Neft Fondunun vəsaitini qorumalıyıq. Əvvəlki illərdə apardığımız siyasət davam etdirilə bilməz. Neft Fondundan dövlət büdcəsinə transfertlər bu il azalır və biz gələcəkdə də xüsusilə hər bir layihəyə, onun əhəmiyyətinə baxmalıyıq və məhz ondan sonra qərar qəbul edilməlidir”.

Bu isə o deməkdir ki, dövlət xalqa xidmət edən sosial infrastrukturun yaradılmasını yenə də diqqət mərkəzində saxlayır, bu sahədə nəzərdə tutulan işləri həyata keçirmək üçün əlavə yollar və imkanlar axtarır. Bütün bunlar dövlətin siyasətinin mərkəzində Azərbaycan vətəndaşının dayandığını bir daha təsdiqləyir.

Flora SADIQLI,

Azərbaycan. - 2016.- 13 yanvar.- S.2.