Canından əziz tutdu Vətən sevgisin

Azərbaycanın Milli Qəhrəmanı, aprel döyüşlərində canını Vətənin müdafiəsi uğrunda qurban vermiş zabit Samit İmanovun valideynlərinə baş çəkməyi özümüzə borc bildik. Neftçala rayonunun Həsənabad qəsəbəsində həyət darvazası qarşısında bizi qəhrəmanın atası Gülağa kişi qarşıladı. Qəhrəmanın ildönümünə hazırlıq aparıldığı hiss olunurdu.

Səliqə-sahmanlı evin hər tərəfində Samit İmanovun müxtəlif şəkilləri diqqət çəkirdi. Otağın baş tərəfindəki divardan asılan portret-xalçadan boylanan qəhrəmanın, cəsur döyüşçünün keçdiyi qısa - cəmi 35 illik, lakin mənalı ömür yolundan xəbər tutmaq istəyirik. Bir müddət araya sükut çökür. Gülağa kişinin yaşarmış gözlərinə baxanda söhbətə nədən, haradan başlamaq barədə götür-qoy etdik. Gülağa kişi bir albom gətirib göstərdi. Burada qəhrəmanın ömrünün müxtəlif anlarını əks etdirən çoxlu fotoşəkil var. Ata nə isə axtarırmış kimi, albomu xeyli vərəqləyir. Sonra üzünü qapısı açıq olan o biri otağa tərəf tutaraq:

- Samitin sənədlərini buradan kim götürüb?

- Bu otaqdadır. Keçən dəfə bir jurnalist gəlmişdi, onda gətirib buraya qoymuşam, - kövrək bir qadın səsi eşidilir, - indi gətirərəm.

Təxminən iki dəqiqədən sonra əlindəki çay padnosu ilə gələn Samitin anası qovluğu stolun üstünə qoyur. Sənədlərə, fotoşəkillərə baxa-baxa söhbətimiz yavaş-yavaş məcrasına düşür. Ata deyir ki, Bankə qəsəbəsi Kürün sol sahilində, çayın o tayında yerləşsə də, çox uzaqda deyil: “Bankədə sovetlər birliyi zamanında hərbi hissələr var idi. Biz hərdən dost-tanışlara baş çəkmək üçün Bankəyə gedərdik. O vaxtlar Samitin 10 yaşı ancaq olardı. Qəsəbədə zabit, əsgər görəndə uşaq marağı ilə onlara diqqətlə baxardı. Hələ orta məktəbin 10-cu sinfində oxuyarkən yoldaşlarına da demişdi ki, hərbçi olmaq arzusundadır. Belə də etdi. Orta təhsilini başa vurub sənədlərini Bakı Ali Hərbi Məktəbinə verdi, imtahandan uğurla keçdi. 2003-cü ildə oranı fərqlənmə diplomu ilə bitirib, hərbi hissələrdən birində xidmətə başladı. Sonrakı illərdə təhsilini lazım gəldikcə ayrı-ayrı hərbi kurslarda davam etdirdi”.

Samit Türkiyə Cümhuriyyətində “Daxili təhlükəsizlik əməliyyatlarının planlaşdırılması və icrası”, “Komando təlimi və paraşütdən sərbəst atılmaq” kurslarında, habelə “Anadolu-2007”, “Anadolu Qartal-2007” birgə taktiki təlimlərində, Pakistanda “Ləpirçi və antiterrorist”, İsveçrə Krallığında “Dağ təlimi”, Rumıniya Respublikasında “Dağ dırmanma üzrə təlimatçı” kurslarında iştirak etdi. Bütün bunlar onun bacarıqlı hərbçi kimi formalaşmasına şərait yaratdı. Pillə-pillə rütbəsi, vəzifəsi də yüksəldi. 2004-cü ildən başlayaraq xüsusi təyinatlı hərbi hissədə qrup komandirinin müavini, qrup komandiri, blok komandiri, dəstə komandiri, hərbi hissənin qərargah rəisi, hərbi hissə komandirinin müavini vəzifələrində çalışdı. Qısa müddət ərzində 6 medalla təltif olunub, mayor rütbəsi aldı. Təlimdə əziyyət çəkən döyüşdə qələbə qazanar. Mayor S.İmanovun keçdiyi ömür yolu, hərbi uğurları da bundan xəbər verir.

2014-cü ilin avqust ayında erməni təxribatının qarşısını almaq üçün Samitin dəstəsi əməliyyat keçirmiş, düşmənin 20-yə qədər canlı qüvvəsini məhv edərək geriyə qayıtmışdı. 2016-cı il aprelin 3-dən 4-ə keçən gecə də o, misilsiz qəhrəmanlıq göstərdi. Lakin bu, onun son döyüşü oldu. Mayor Samit İmanovun və komandiri polkovnik-leytenant Murad Mirzəyevin (o da şəhid olmuşdur) başçılıq etdikləri qrup düşmənin növbəti təxribatının qarşısını almaq üçün komandanlığın əmrinə əsasən, erməni postlarını darmadağın etdi. Düşmən tərəf çoxlu sayda canlı qüvvə itirdi. Mayor S.İmanov bu döyüşdə çiynindən və ayağından yaralanır. Belə ağır məqamda da onun necə zabit olduğu özünü göstərir. Əsgərlər yaralı S.İmanovu götürüb döyüş yerindən aparmaq istədikdə o, buna razı olmur, yaralı gizirin oradan uzaqlaşdırılmasını əmr edir. Yaralı giziri təhlükəsiz əraziyə çıxaran qrup geri qayıdır. Lakin gecədən səhərə qədər axtarsalar da, onu tapa bilmirlər. Əsgərlər öz həyatlarını təhlükə altında qoyaraq növbəti gün döyüş gedə-gedə ərazini yenidən axtarıb kolluqda onun cansız bədənini tapırlar. Məlum olur ki, aldığı yaradan öləcəyini hiss edən cəsur mayor meyitinin düşmən əlinə keçməməsi üçün arxası üstə uzanaraq, özünü kol-kos içində gizlətmiş, qumbaranı isə köksünün başına qoymuşdur.

Şəhidlik Vətən, torpaq uğrunda şüurlu ölümdür. Belələri ölümə daim hazır olurlar, Milli Qəhrəman Samit İmanov kimi. Kədər qəhrəmanın anası Xuraman xanımın gözlərinin altına kölgə salsa da, vüqarını əyə bilməyib: “Özü seçmişdi hərbçi peşəsini. Zirək, bacarıqlı, uca qamətli olduğu üçün onu xüsusi təyinatlı ordu hissəsinə qəbul etmişdilər. İşi elə idi ki, vaxtaşırı evə gəlirdi. Təzə ailə qurmuşdu. O, işdə olanda ya mən, ya da atası onlara gedirdik, gəlini tək qoymurduq. Qızı Fidanın 2 yaşı var, oğlu Turanın isə bu il fevralın 12-də 1 yaşı tamam oldu. Şəhid olanda oğlunun 40-ı çıxmamışdı...”

Ata da, ana da dövlətdən, ölkə rəhbərindən çox razılıq edirlər. Samitin ailəsinə yeni mənzil, yüksək pensiya verildiyini söylədilər: “Torpaqlarımız geri alınanda bütün şəhidlərimiz kimi, Samitin də ruhu şad olacaq” - dedilər.

Aprel döyüşlərindən bir il keçir. Amma o günlər hər birimizin xatirində silinməz izlər buraxıb. Erməni təxribatının qarşısını alarkən şəhid olan hərbçilərimiz hər yerdə xalq sevgisi, məhəbbəti ilə son mənzilə yola salındı. Həmin günlər xalqımız bir daha ordumuzun qüdrətinin şahidi oldu. Əllərində Azərbaycan bayrağı dalğalandıran, dillərində: “Şəhidlər ölməz, Vətən bölünməz”, - şüarını böyük coşqu ilə səsləndirən gəncləri gördükcə qürur hissi keçirirdik. O günlərdə müxtəlif bölgələrdə minlərlə gəncin hərbi səfərbərlik məntəqələrinə üz tutub, döyüşə getmək istədiklərini, lazım gələrsə candan keçməyə hazır olduqlarını bildirməsi vətənpərvərlik hissinin nə qədər yüksək olduğunu göstərdi.

Vətən babalarımızın bizə miras qoyub getdiyi əmanətdir. Bədnam qonşularımız isə zaman-zaman bu əmanəti ələ keçirmək üçün minbir bəd əməldən çıxırlar. Amma əbəs yerə, nəyin bahasına olursa-olsun, erməni qoşunları torpaqlarımızdan qovulub çıxarılacaq, məcburi köçkünlərimiz öz dədə-baba yurdlarına qayıdacaqlar. Çünki Azərbaycanın güclü ordusu, Milli Qəhrəman Samit İmanov kimi Vətəni canından əziz tutan oğulları var.

Seyran CAVADOV,

Azərbaycan.- 2017.- 2 aprel.- S.6.