Məsuliyyətin, şəffaflığın və operativliyin ASAN nümunəsi

Sumqayıt “ASAN xidmət” mərkəzinə indiyədək iki milyondan artıq vətəndaş müraciət edib

Mühafizə xidmətinin əməkdaşları hərtərəfli yoxladıqdan sonra vətəndaş içəri daxil olur. Məlumat bölməsinə yaxınlaşır və istədiyi xidmətlə bağlı elektron növbəyə duraraq gözləmə yerlərində əyləşir. Hər şey nizamla, qayda-qanunla tənzimlənir. Bu proses ölkəmizdə fəaliyyət göstərən bütün “ASAN xidmət” mərkəzlərində hər gün yaşanır.

Fiziki qüsurlu şəxslərə xidmət ən yüksək səviyyədədir

İnnovativ yeniliklərlə təchiz edilmiş Sumqayıt “ASAN xidmət” mərkəzində eyni ab-havanı görmək mümkündür. Burada vətəndaşların rahatlığı üçün hər cür şərait var. Sumqayıt şəhəri, 15-ci məhəllə, Bakı küçəsi 42d ünvanında yerləşən Sumqayıt “ASAN xidmət” mərkəzinin açılışı Prezident İlham Əliyevin iştirakı ilə 2013-cü il may ayının 3-də olub.

Mərkəzdə olarkən oradakı iş mühiti ilə və yeni nəsil texnologiyalarla yaxından tanış olmaq imkanımız yarandı. İlk diqqətimizi çəkən cəhət üçmərtəbəli binada əlillər üçün bütün zəruri elementlərin yer alması oldu. Belə ki, binanın girişində onlar üçün xüsusi lift quraşdırılıb. Fiziki cəhətdən qüsurlu olan şəxslər binaya daxil olmadan bu lift vasitəsilə birbaşa ikinci mərtəbəyə qalxa bilirlər. Gözdən əlillərin sərbəst hərəkəti üçün isə hər bir mərtəbənin döşəməsinə xüsusi örtüklər çəkilib və müvafiq yerlərdə onların oxuya biləcəkləri hərflərlə - brayn əlifbası ilə hazırlanmış lövhələr quraşdırılıb. Əlil şəxslər bu lövhələrə toxunmaqla hansı istiqamətə getməli olduqlarını asanlıqla müəyyən edirlər.

İlk innovativ yenilik - “Touch Screen”

Sumqayıt “ASAN xidmət”də böyük məsləhətçi - bizə bələdçilik edən Səbinə Nəsirovanın sözlərinə görə, mərkəzdə vətəndaşların qəbulunun elektron növbə əsasında həyata keçirilməsi üçün ən müasir avadanlıq quraşdırılıb. Elektron lövhələr və işarələr vətəndaşların məlumat əldə etməsini asanlaşdırır. “ASAN xidmət” mərkəzinin əsas prinsipləri operativlik, şəffaflıq, nəzakətlilik, məsuliyyət, etik davranış qaydalarına nəzarət və rahatlıqdır. Mərkəz internetə daim açıq olan kompüterlərlə təchiz edilib və vətəndaşların burada bütün növ elektron xidmətlərdən yararlanması üçün hər cür şərait yaradılıb.

Binada vətəndaşların gözləməsi və vaxtını səmərəli keçirməsi üçün funksional yardımçı xidmətlər - bank, sığorta, hüquqi yardım və tərcümə mərkəzləri, laboratoriya, tibbi xidmət, uşaq əyləncə guşəsi, internet-kafe, poçt şöbələri, fotostudiya fəaliyyət göstərir. Burada ilk dəfə ölkədə tətbiq olunan elektron ərizə doldurma aparatı (Touch Screen) var. Mərkəzə müraciət edən vətəndaş bu aparat vasitəsilə elektron ərizəni dolduraraq çap etdirə bilir.

Bir kitab gətir, bir kitab apar

Mərkəzdəki xüsusi terminallar vasitəsilə mobil rabitə, internet, işıq, su, qaz və digər kommunal xidmətlərinin, kredit və sığorta ödənişlərinin həyata keçirilməsi mümkündür. Burada videomüşahidə kameraları və rüsumların məbləğlərini əks etdirən rüsum tablosu da quraşdırılıb. “ASAN xidmət” mərkəzində Ədliyyə, Daxili İşlər, Vergilər nazirlikləri, Əmlak Məsələləri Dövlət Komitəsi, Dövlət Gömrük Komitəsi, Dövlət Miqrasiya Xidməti, Dövlət Sosial Müdafiə Fondu və Milli Arxiv İdarəsi tərəfindən müxtəlif hüquqi xidmətlər həyata keçirilir. Mərkəzdə vətəndaşlara funksional yardımçı xidmətlər də göstərilir. Korrupsiya hallarının qarşısının alınması, şəffaflığın təmin edilməsi məqsədilə mərkəzdə xidmət prosesi videokamera vasitəsilə qeydiyyata alınır. Xidmət prosesi müasir İP telefon və İP şəbəkə sistemi ilə təmin edilib.

Sumqayıt “ASAN xidmət” mərkəzində yer alan kitab guşəsi də insanların marağına xidmət edir. Guşədə müxtəlif mövzuları əks etdirən onlarla kitab var. Maraqlı cəhət ondan ibarətdir ki, bu kitab guşəsini formalaşdıran elə vətəndaşların özləridir. Belə ki, hər bir şəxs əvəzində bir kitab qoymaq şərtilə guşədən başqa bir kitab götürüb özü ilə apara bilər. Burada gözləmə mövqeyində olan və guşənin ətrafında kitab oxuyan vətəndaşları hər vaxt görmək mümkündür.

Bütün xidmət sahələrində könüllülərin əməyi var

Qeyd edək ki, “ASAN xidmət” sektorunda konüllülərin rolu danılmazdır. Sumqayıt “ASAN xidmət” mərkəzində də vətəndaşlara könüllülük prinsipi əsasında xidmət göstərmək üçün hazırda 70 gənc müxtəlif işlərə cəlb olunub. Onların xidmətindən geniş istifadə edilir. Elektron növbə, uşaq guşəsi, ərizə masası, bir sözlə, buradakı hər bir bölmədə könüllü gəncləri görmək olar. Təqdirəlayiq haldır ki, mərkəzin fəaliyyətə başladığı ilk vaxtdan bu günə qədər onlarca könüllü gənc işlə təmin olunub. Hazırda şəxsiyyət vəsiqəsi və xarici pasport bölmələrinin bütün əməkdaşları vaxtilə burada könüllü kimi çalışanlardır. Onlardan Leyla Babayeva, Günel Quliyeva, İlahə Səmədova və Firuzə Hacıyeva “ASAN xidmət” mərkəzində çalışdıqlarına görə qürur duyduqlarını və işlərindən zövq aldıqlarını bildirdilər.

Prezident İlham Əliyev Sumqayıt “ASAN xidmət” mərkəzinin açılışı zamanı könüllülərlə görüşərkən onların fəaliyyətini yüksək qiymətləndirmişdir: “Bu, sizin üçün də gözəl təcrübədir. İlk növbədə, gələcək fəaliyyətiniz üçün, hesab edirəm ki, çox vacib olan təcrübədir. Digər tərəfdən, bax, bu valantyorluq sizin niyyətinizi göstərir, onu ifadə edir. Yəni siz cəmiyyətin fəal üzvlərisiniz. Əgər siz könüllü şəkildə, necə deyərlər, vətəndaşlara və dövlətə təmənnasız kömək etmək istəyirsinizsə, deməli, sizin niyyətiniz çox xoşməramlıdır və ölkəmizin ümumi inkişafına tam uyğundur. Bax, belə gənclər olmalıdır, Vətəni sevən, insanlara xoş münasibət bildirən, peşəkar, bilikli və müasir. Mən sizə uğurlar arzulayıram. Sizə bax, bu təşəbbüsə görə minnətdarlığımı bildirmək istəyirəm”.

Bu gün həmin gənclərin müxtəlif vəzifələrdə çalışdıqlarını görərkən onların Prezident İlham Əliyevin etimadını layiqli şəkildə doğrultduğuna əmin olursan. Yəqin ki, “ASAN” brendi könüllülər institutunun formalaşmasında xüsusi rol oynadığı kimi, könüllülər də dövlətin möhkəmlənməsində, onun müdafiəsində aparıcı olacaqlar.

Xatırladaq ki, Sumqayıt “ASAN xidmət” mərkəzi Sumqayıt şəhəri ilə yanaşı, Abşeron, Xızı, Siyəzən, Şabran, Quba, Qusar, Xaçmaz, Şamaxı və Qobustan rayonlarında qeydiyyatda olan sakinlərə də xidmət göstərir. Bu günə qədər mərkəzdə 2 milyondan çox vətəndaş müraciəti qeydə alınıb.

Digər “ASAN xidmət” mərkəzləri kimi Sumqayıt “ASAN xidmət” də hər gün saat 10:00-dan 20:00-dək fəaliyyət göstərir. Şənbə və bazar günlərində isə iş vaxtı saat 10:00-dan 17:00-dək müəyyənləşib. Xidmətin “asan.gov.az” internet saytı vasitəsilə vətəndaşlar üçün “online” növbəyə yazılma, elektron ərizələr doldurma, sənədlərin müvafiq orqanlara elektron qaydada göndərmə və digər imkanlar da yaradılıb. “Çağrı xidməti” (108) vasitəsilə vətəndaş mərkəzə gəlmədən internet və ya telefonla bütün xidmət növləri, tələb edilən sənədlər barədə məlumat ala və növbə tuta bilir.

Elgün MƏNSİMOV,

Azərbaycan.- 2017.-9 aprel.- S.1, 3.